೧೭೦. ಯಾಗುಮಧುಗೋಳಕಾದಿಕಥಾ

೨೮೨. ಏಕಕೋತಿ ಏತ್ಥ ಏಕತೋ ಅಸಹಾಯತ್ಥೇ ಕಪಚ್ಚಯೋತಿ ಆಹ ‘‘ನತ್ಥಿ ಮೇ ದುತಿಯೋ’’ತಿ. ಸೋತಿ ಬ್ರಾಹ್ಮಣೋ. ವಯಂ ಕತ್ವಾತಿ ಪರಿಬ್ಬಯಂ ಕತ್ವಾ, ಪಟಿಯಾದಾಪೇಸಿ ಕಿರಾತಿ ಯೋಜನಾ. ಅನುಮೋದನಗಾಥಾಯಾತಿ ಅನುಮೋದನಪಕಾಸಕಾಯ ಗಾಥಾಯ. ‘‘ಪತ್ಥಯತಂ ಇಚ್ಛತ’’ನ್ತಿ ಪದಾನಂ ಅಲಮತ್ಥಪಯೋಗೇ ಸಮ್ಪದಾನತ್ತಾ ವುತ್ತಂ ‘‘ಅಲಮೇವ ದಾತುನ್ತಿ ಇಮಿನಾ ಸಮ್ಬನ್ಧೋ’’ತಿ. ಸೋಯೇವ ಗಹೇತಬ್ಬೋತಿ ‘‘ದಾತು’’ನ್ತಿಭಾವಸ್ಸ ಕತ್ತುಭಾವೇನ ಸೋ ಏವ ಪಾಠೋ ಗಹೇತಬ್ಬೋತಿ ಅತ್ಥೋ.

೨೮೩. ಯಾ ಯಾಗು ಪವಾರಣಂ ಜನೇತಿ, ಸಾ ಯಾಗು ಭೋಜ್ಜಯಾಗು ನಾಮಾತಿ ಯೋಜನಾ. ಯನ್ತಿ ಕಾಲಂ. ‘‘ಆದಿಂ ಕತ್ವಾ’’ತಿ ಇಮಿನಾ ಯದಗ್ಗೇನಾತಿ ಏತ್ಥ ಅಗ್ಗಸದ್ದೋ ಆದ್ಯತ್ಥೋ ಕಿರಿಯಾವಿಸೇಸನತ್ಥೇ ಕರಣವಚನನ್ತಿ ದಸ್ಸೇತಿ. ‘‘ಸಗ್ಗನಿಬ್ಬತ್ತಕಪುಞ್ಞ’’ನ್ತಿ ಇಮಿನಾ ಸಗ್ಗಾತಿ ಏತ್ಥ ಫಲೂಪಚಾರಂ ದಸ್ಸೇತಿ. ಸೋತಿ ಗುಳೋ.

೨೮೪. ತಥಾರೂಪೇನಾತಿ ತಥಾಸಭಾವೇನ. ಗುಳಸ್ಸ ಅನುರೂಪಸಭಾವೇನಾತಿ ಅತ್ಥೋ.