೧೧೮. ಪಟಿಸ್ಸವದುಕ್ಕಟಾಪತ್ತಿಕಥಾ

೨೦೭. ಪಟಿಸ್ಸವೇ ಆಪತ್ತಿ ದುಕ್ಕಟಸ್ಸಾತಿ ಏತ್ಥ ಕಿಂ ವಸ್ಸಾವಾಸಪಟಿಸ್ಸುತೇಯೇವ ದುಕ್ಕಟಾಪತ್ತಿ ಹೋತೀತಿ ಆಹ ‘‘ನ ಕೇವಲ’’ನ್ತಿಆದಿ. ಏತಸ್ಸೇವಾತಿ ವಸ್ಸಾವಾಸಸ್ಸೇವ. ಏವಮಾದಿನಾಪೀತಿ ಪಿಸದ್ದೋ ‘‘ಪಟಿಸ್ಸವೇ’’ತಿ ಏತ್ಥ ಯೋಜೇತಬ್ಬೋ. ‘‘ಪಟಿಸ್ಸವೇಪೀ’’ತಿ ಹಿ ಅತ್ಥೋ. ತಸ್ಸ ತಸ್ಸಾತಿ ಕಮ್ಮಸ್ಸ. ತಞ್ಚ ಖೋತಿ ತಞ್ಚ ದುಕ್ಕಟಂ ವಿಸಂವಾದನಪಚ್ಚಯಾ ಹೋತೀತಿ ಯೋಜನಾ. ಪಠಮಮ್ಪೀತಿ ಪಿಸದ್ದೋ ‘‘ಪಚ್ಛಾಪೀ’’ತಿ ಪದಂ ಸಮ್ಪಿಣ್ಡೇತಿ. ಪಠಮಮ್ಪಿ ಹಿ ಪಾಚಿತ್ತಿಯಂ, ಪಚ್ಛಾಪಿ ದುಕ್ಕಟನ್ತಿ ಅತ್ಥೋ.

ಸೋ ತದಹೇವ ಅಕರಣೀಯೋತಿಆದೀಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ಪುರಿಮಿಕಾ ಚ ನ ಪಞ್ಞಾಯತೀತಿ ಏತ್ಥ ಪುರೇ ಭವಾ ಪುರಿಮಾ, ಸಾ ಏವ ಪುರಿಮಿಕಾ, ಪಾಟಿಪದತಿಥೀ. ನಾನಾಸೀಮಾಯ ದ್ವೀಸು ಆವಾಸೇಸು ವಸ್ಸಂ ಉಪಗಚ್ಛನ್ತಸ್ಸ ದುತಿಯೇ ‘‘ವಸಿಸ್ಸಾಮೀ’’ತಿ ಪಠಮಾವಾಸಸ್ಸ ಉಪಚಾರತೋ ನಿಕ್ಖನ್ತಮತ್ತೇ ಪಠಮಸೇನಾಸನಗ್ಗಾಹಸ್ಸ ಪಸ್ಸಮ್ಭನಂ ಸನ್ಧಾಯ ವುತ್ತಂ ‘‘ಪುರಿಮಿಕಾ ಚ ನ ಪಞ್ಞಾಯತೀ’’ತಿ. ಅರುಣಂ ಅನುಟ್ಠಾಪೇತ್ವಾತಿ ವಸ್ಸಂ ಉಪಗಮನವಿಹಾರೇ ಅರುಣಂ ಅನುಟ್ಠಾಪೇತ್ವಾ. ತದಹೇವಾತಿ ತಸ್ಮಿಂ ವಸ್ಸೂಪಗಮನಅಹನಿ ಏವ, ಪಕ್ಕನ್ತಸ್ಸಾಪೀತಿ ಸಮ್ಬನ್ಧೋ. ಪಿಸದ್ದಸ್ಸ ಗರಹತ್ಥಂ ದಸ್ಸೇನ್ತೋ ಆಹ ‘‘ಕೋ ಪನ ವಾದೋ’’ತಿಆದಿ. ಆಲಯೋತಿ ಚಿತ್ತಸ್ಸ ಅಲ್ಲೀಯನಂ. ಅಸತಿಯಾತಿ ಸತಿಪಮುಟ್ಠೇನ. ವಸ್ಸಂ ನ ಉಪೇತೀತಿ ‘‘ಇಮಸ್ಮಿಂ ವಿಹಾರೇ ಇಮಂ ತೇಮಾಸಂ ವಸ್ಸಂ ಉಪೇಮೀ’’ತಿ (ಮಹಾವ. ಅಟ್ಠ. ೧೮೪) ವಚೀಭೇದಂ ಕತ್ವಾ ವಸ್ಸಂ ನ ಉಪೇತಿ.

ಸತ್ತಾಹನ್ತಿ ಸತ್ತಾಹೇನ, ಅನಾಗತಾಯಾತಿ ಸಮ್ಬನ್ಧೋ. ನವಮಿತೋತಿ ಪುಬ್ಬಕತ್ತಿಕಮಾಸಸ್ಸ ಜುಣ್ಹಪಕ್ಖನವಮಿತೋ, ಪಚ್ಛಿಮಕತ್ತಿಕಮಾಸಸ್ಸ ಜುಣ್ಹಪಕ್ಖನವಮಿತೋ ವಾ. ಮಾ ವಾ ಆಗಚ್ಛತು, ಅನಾಪತ್ತೀತಿ ವಸ್ಸಂವುತ್ಥತ್ತಾ ಮಾ ವಾ ಆಗಚ್ಛತು, ಅನಾಪತ್ತೀತಿ ಅತ್ಥೋ.

ಇತಿ ವಸ್ಸೂಪನಾಯಿಕಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ.