೧೧೩. ಅನ್ತರಾಯೇ ಅನಾಪತ್ತಿವಸ್ಸಚ್ಛೇದಕಥಾ

೨೦೧. ಅವಿದೂರೇತಿ ಆಸನ್ನೇ. ತತ್ಥಾತಿ ಗಾಮೇ. ಸತ್ತಾಹವಾರೇನಾತಿ ಸತ್ತಾಹೇ ಏಕವಾರೇನ. ಅರುಣೋ ಉಟ್ಠಾಪೇತಬ್ಬೋತಿ ವಿಹಾರೇ ಅರುಣೋ ಉಟ್ಠಾಪೇತಬ್ಬೋ. ತತ್ರೇವಾತಿ ಗಾಮೇಯೇವ. ಮಯನ್ತಿ ಭಿಕ್ಖೂ ಸನ್ಧಾಯ ವುತ್ತಂ. ಪುನ ಮಯನ್ತಿ ಮನುಸ್ಸೇ ಸನ್ಧಾಯ ವುತ್ತಂ. ತೇಸಂಯೇವಾತಿ ವಸ್ಸಚ್ಛೇದಭಿಕ್ಖೂನಂ ಏವ. ತನ್ತಿ ಸಲಾಕಭತ್ತಾದಿಂ. ವಸ್ಸಗ್ಗೇನಾತಿ ವಸ್ಸಗಣನಾಯ.

ವಸ್ಸಾವಾಸಿಕನ್ತಿ ವಸ್ಸಾವಾಸಾನಂ ದಾತಬ್ಬಂ ಚೀವರಂ. ತತ್ಥಾತಿ ತಸ್ಮಿಂ ವಿಹಾರೇ. ಯೇಸಂ ಪಾಪಿತನ್ತಿ ಸಮ್ಬನ್ಧೋ. ವಿಹಾರೇತಿ ವುಟ್ಠಿತಗಾಮವಿಹಾರೇ. ಉಪನಿಕ್ಖಿತ್ತಕಂ ಭಣ್ಡನ್ತಿ ಸಮ್ಬನ್ಧೋ. ಇಧಾತಿ ಭಿಕ್ಖುನೋ ನಿವಾಸಟ್ಠಾನೇ. ಯಂ ಚೀವರಾದಿವೇಭಙ್ಗಿಯಭಣ್ಡಂ ಅತ್ಥಿ, ತನ್ತಿ ಯೋಜನಾ. ತತ್ಥೇವಾತಿ ವುಟ್ಠಿತಗಾಮವಿಹಾರೇ ಏವ. ಇತೋತಿ ಖೇತ್ತವತ್ಥುಆದಿತೋ. ಕಪ್ಪಿಯಕಾರಕಾನಂ ಹತ್ಥೇತಿ ಸಮ್ಬನ್ಧೋ. ತತ್ರುಪ್ಪಾದೇಪೀತಿ ತಸ್ಸ ವಿಹಾರಸ್ಸ ದಿನ್ನಖೇತ್ತವತ್ಥುಆದಿತೋ ಉಪ್ಪಾದೇ ಪಚ್ಚಯೇಪಿ. ‘‘ತತ್ಥೇವ ಗನ್ತ್ವಾ ಅಪಲೋಕೇತ್ವಾ ಭಾಜೇತಬ್ಬ’’ನ್ತಿ ವಚನಸ್ಸ ಯುತ್ತಿಂ ದಸ್ಸೇನ್ತೋ ಆಹ ‘‘ಸಙ್ಘಿಕಞ್ಹೀ’’ತಿಆದಿ. ಅನ್ತೋವಿಹಾರೇ ವಾತಿ ಅನ್ತೋಸೀಮಾಯ ವಾ. ಉಭಯತ್ಥಾತಿ ಅನ್ತೋಸೀಮಬಹಿಸೀಮ ಸಙ್ಖಾತೇಸು ದ್ವೀಸು ಠಾನೇಸು ಠಿತಂ ವೇಭಙ್ಗಿಯಭಣ್ಡನ್ತಿ ಸಮ್ಬನ್ಧೋ.