೧೧೪. ಸಙ್ಘಭೇದೇ ಅನಾಪತ್ತಿವಸ್ಸಚ್ಛೇದಕಥಾ

೨೦೨. ಭಿನ್ನೋತಿ ಏತ್ಥ ತಪಚ್ಚಯಸ್ಸ ಅತೀತತ್ಥೇ ಅಯುತ್ತಭಾವಂ ದಸ್ಸೇನ್ತೋ ಆಹ ‘‘ಭಿನ್ನೇ ಸಙ್ಘೇ ಕರಣೀಯಂ ನತ್ಥೀ’’ತಿ. ಯೋ ಪನಾತಿ ಸಙ್ಘೋ ಪನ. ಇದಂ ‘‘ಭಿಜ್ಜಿಸ್ಸತೀ’’ತಿಪದೇ ಕತ್ತಾ, ‘‘ಆಸಙ್ಕಿತೋ’’ತಿಪದೇ ಕಮ್ಮಂ. ‘‘ಭಿಜ್ಜಿಸ್ಸತೀ’’ತಿ ಇಮಿನಾ ಭಿನ್ನೋತಿ ಏತ್ಥ ತಪಚ್ಚಯಸ್ಸ ಅನಾಗತತ್ಥೇ ಪವತ್ತಭಾವಂ ದಸ್ಸೇತಿ. ಭಿಕ್ಖುನೀಹಿ ಸಙ್ಘೋ ಭಿನ್ನೋತಿ ಏತ್ಥ ಕಿಂ ಭಿಕ್ಖುನೀಹಿ ಸಙ್ಘೋ ಭಿನ್ನೋತಿ ದಟ್ಠಬ್ಬೋತಿ ಆಹ ‘‘ನ ಭಿಕ್ಖುನೀಹಿ ಸಙ್ಘೋ ಭಿನ್ನೋತಿ ದಟ್ಠಬ್ಬೋ’’ತಿ. ಏತನ್ತಿ ಭಿಕ್ಖುನೀಹಿ ಅಭಿನ್ನಭಾವಂ. ಏತಾ ಪನಾತಿ ಭಿಕ್ಖುನಿಯೋ ಪನ. ತನ್ತಿ ಸಙ್ಘಂ. ಏತನ್ತಿ ‘‘ಸಮ್ಬಹುಲಾಹಿ ಭಿಕ್ಖುನೀಹಿ ಸಙ್ಘೋ ಭಿನ್ನೋ’’ತಿ ವಚನಂ.