೧೧೨. ಪಹಿತೇಯೇವಅನುಜಾನನಕಥಾ

೧೯೯. ಭಿಕ್ಖುಗತಿಕೋತಿ ಭಿಕ್ಖು ಏವ ಗತಿ ಪತಿಟ್ಠಾ ಏತಸ್ಸಾತಿ ಭಿಕ್ಖುಗತಿಕೋತಿ ವುತ್ತೇ ಭಿಕ್ಖುನಿಸ್ಸಿತಕೋ ಪುರಿಸೋತಿ ಆಹ ‘‘ಭಿಕ್ಖೂಹಿ ಸದ್ಧಿಂ ವಸನಕಪುರಿಸೋ’’ತಿ. ಪಲುಜ್ಜತೀತಿ ವಿನಸ್ಸತಿ. ಭಣ್ಡಂ ಛೇದಾಪಿತನ್ತಿ ಏತ್ಥ ಭಣ್ಡಸದ್ದೋ ಪರಿಕ್ಖಾರತ್ಥೋ ಏವ, ನ ಮೂಲಧನತ್ಥೋತಿ ಆಹ ‘‘ದಬ್ಬಸಮ್ಭಾರಭಣ್ಡ’’ನ್ತಿ. ಛೇದಾಪಿತನ್ತಿ ಚುರಾದಿಗಣಿಕಧಾತುಂ ‘‘ಛಿನ್ದಾಪಿತ’’ನ್ತಿ ರುಧಾದಿಗಣಿಕಧಾತುಯಾ ವಣ್ಣೇತಿ. ದಜ್ಜಾಹನ್ತಿ ಏಕಾರಲೋಪಸನ್ಧೀತಿ ಆಹ ‘‘ದಜ್ಜೇ ಅಹ’’ನ್ತಿ. ‘‘ದಜ್ಜೇಹ’’ನ್ತಿಪಿ ಪಾಠೋ. ಏವಞ್ಹಿ ಸತಿ ಅಕಾರಲೋಪಸನ್ಧಿ. ದಜ್ಜೇತಿ ದದೇಯ್ಯಂ, ದದಾಮಿ ವಾ. ಸಙ್ಘಕರಣೀಯೇನಾತಿ ಸಙ್ಘಸ್ಸ ಕಾತಬ್ಬೇನ ಕಿಚ್ಚೇನ. ತಮತ್ಥಂ ದಸ್ಸೇನ್ತೋ ಆಹ ‘‘ಯಂಕಿಞ್ಚೀ’’ತಿಆದಿ. ತತ್ಥ ಯಂಕಿಞ್ಚಿ ಕಾತಬ್ಬನ್ತಿ ಯೋಜನಾ. ಚೇತಿಯಛತ್ತವೇದಿಕಾದೀಸೂತಿ ಚೇತಿಯಸ್ಸ ಛತ್ತೇ ಚ ವೇದಿಕಾಯ ಚ. ಆದಿಸದ್ದೇನ ಸುಧಾಲಿಮ್ಪಾದಯೋ ಸಙ್ಗಣ್ಹಾತಿ. ತಸ್ಸಾತಿ ಸಙ್ಘಕರಣೀಯಸ್ಸ. ನಿಪ್ಫಾದನತ್ಥಂ ಗನ್ತಬ್ಬನ್ತಿ ಸಮ್ಬನ್ಧೋ.

ಏತ್ಥಾತಿ ವಸ್ಸೂಪನಾಯಿಕಕ್ಖನ್ಧಕೇ. ‘‘ಅನಿಮನ್ತಿತೇನಾ’’ತಿ ಪದಂ ‘‘ಗನ್ತು’’ನ್ತಿ ಪದೇ ಭಾವಕತ್ತಾ. ಗನ್ತುನ್ತಿ ಗಮಿತುಂ, ಗಮನಂ ವಾ ‘‘ನ ವಟ್ಟತೀ’’ತಿ ಪದೇ ಕತ್ತಾ. ಪಠಮಂಯೇವಾತಿ ಧಮ್ಮಸ್ಸವನತೋ ಪಠಮಮೇವ. ಸನ್ನಿಪತಿತಬ್ಬಂ ಇತಿ ಕತಿಕಾ ಕತಾ ಹೋತೀತಿ ಯೋಜನಾ. ಭಣ್ಡಕನ್ತಿ ಚೀವರಾದಿಭಣ್ಡಕಂ. ಗನ್ತುಂ ನ ವಟ್ಟತೀತಿ ಸಯಮೇವ ಗನ್ತುಂ ನ ವಟ್ಟತೀತಿ ಅತ್ಥೋ ದಟ್ಠಬ್ಬೋ. ತೇನ ವುತ್ತಂ ‘‘ಸಚೇ ಪನಾ’’ತಿಆದಿ. ತತ್ಥಾತಿ ತಂ ವಿಹಾರಂ. ‘‘ವಟ್ಟತೀ’’ತಿ ಇಮಿನಾ ವಸ್ಸಚ್ಛೇದೋ ಚ ಆಪತ್ತಿ ಚ ನ ಹೋತೀತಿ ದಸ್ಸೇತಿ. ಅತ್ಥಾಯಪೀತಿ ಪಿಸದ್ದೇನ ‘‘ಭಣ್ಡಕಂ ಧೋವಿಸ್ಸಾಮೀ’’ತಿ ಅತ್ಥಂ ಅಪೇಕ್ಖತಿ. ನನ್ತಿ ಅನ್ತೇವಾಸಿಕಂ. ವಟ್ಟತೀತಿ ಆಚರಿಯಸ್ಸ ಆಣಾಯ ಸತ್ತಾಹೇ ಅನತಿಕ್ಕನ್ತೇ ವಟ್ಟತಿ, ವಸ್ಸಚ್ಛೇದೋ ಚ ಆಪತ್ತಿ ಚ ನ ಹೋತಿ. ಸತ್ತಾಹೇ ಅತಿಕ್ಕನ್ತೇ ವಸ್ಸಚ್ಛೇದೋವ ಹೋತಿ, ನ ಆಪತ್ತೀತಿ ಅಧಿಪ್ಪಾಯೋ.