೬೪. ಚತ್ತಾರೋನಿಸ್ಸಯಾದಿಕಥಾ

೧೨೮. ಉಪಸಮ್ಪನ್ನಸಮನನ್ತರಮೇವಾತಿ ಉಪಸಮ್ಪನ್ನೋ ಹುತ್ವಾ ಸಮನನ್ತರಮೇವ, ನ ಕಾಲನ್ತರೇತಿ ಅತ್ಥೋ. ಏಕಪೋರಿಸಾತಿ ಏತ್ಥ ಪೋರಿಸಸದ್ದೋ ಉಪರಿ ವಿತ್ಥತೇ ಭುಜಪಮಾಣೇ ಚ ಪೋಸಪಮಾಣೇ ಚ ವತ್ತತಿ. ಪುರಿಸಸ್ಸ ಪಮಾಣಾ ಪೋರಿಸಾ, ಪಮಾಣತ್ಥೇ ಣಪಚ್ಚಯೋ. ಛಾಯಾತಿ ಆತಪಾಭಾವೋ. ಮೇತಬ್ಬಾತಿ ಪಮೇತಬ್ಬಾ. ‘‘ವಸ್ಸಾನೋ’’ತಿಆದಿ ‘‘ಉತುಪಮಾಣಂ ಆಚಿಕ್ಖಿತಬ್ಬ’’ನ್ತಿ ಏತ್ಥ ಆಚಿಕ್ಖಣಾಕಾರದಸ್ಸನಂ. ಉತುನೋ ಪಮಾಣನ್ತಿ ಅತ್ಥಂ ನಿವಾರೇನ್ತೋ ಆಹ ‘‘ಏತ್ಥ ಚಾ’’ತಿಆದಿ. ಅರತಿ ಪುನಪ್ಪುನಂ ಗಚ್ಛತೀತಿ ಉತು, ಪಮಿಯತಿ ಸಂವಚ್ಛರೋ ಪರಿಚ್ಛಿಜ್ಜಿಯತಿ ಅನೇನಾತಿ ಪಮಾಣಂ. ಯತ್ತಕೇಹಿ ದಿವಸೇಹಿ ಅಪರಿಪುಣ್ಣೋತಿ ಸಮ್ಬನ್ಧೋ. ಯಸ್ಸಾತಿ ದಿವಸಭಾಗಸ್ಸ. ಯೋ ಉತು ಅಪರಿಪುಣ್ಣೋ, ತಸ್ಸ ಉತುನೋತಿ ಪಾಠಸೇಸೋ ಯೋಜೇತಬ್ಬೋ. ‘‘ಉತುಪಮಾಣಂ ಆಚಿಕ್ಖಿತಬ್ಬಂ, ದಿವಸಭಾಗೋ ಆಚಿಕ್ಖಿತಬ್ಬೋ’’ತಿ ಪದಾನಂ ಅಪರಮ್ಪಿ ಅತ್ಥವಿಕಪ್ಪಂ ದಸ್ಸೇನ್ತೋ ಆಹ ‘‘ಅಥ ವಾ’’ತಿಆದಿ. ತತ್ಥ ಅಯಂ ನಾಮ ಉತೂತಿ ಅಯಂ ಉತು ವಸ್ಸಾನೋ ನಾಮಾತಿ ವಾ ಹೇಮನ್ತೋ ನಾಮಾತಿ ವಾ ಗಿಮ್ಹೋ ನಾಮಾತಿ ವಾ. ಪುಬ್ಬನ್ಹೋತಿ ಅಹಸ್ಸ ಪುಬ್ಬೋ ಪುಬ್ಬನ್ಹೋ. ತತ್ಥ ಪಚ್ಛಿಮನಯೋವ ಪಾಸಂಸತರೋ. ಕಸ್ಮಾ? ಪುರಿಮನಯೇ ಉತುಪರಿಪುಣ್ಣೇ ದಿವಸಭಾಗಾಚಿಕ್ಖಣಸ್ಸ ಅಭಾವಾ, ಪಚ್ಛಿಮನಯೇ ಪನ ಪರಿಪುಣ್ಣಂ ವಾ ಅಪರಿಪುಣ್ಣಂ ವಾ ಉತುಪಮಾಣಂ ಆಚಿಕ್ಖಿತಬ್ಬಂ. ಉಪಸಮ್ಪನ್ನದಿವಸಭಾಗೋವ ‘‘ಪುಬ್ಬನ್ಹೋ’’ತಿ ವಾ ‘‘ಸಾಯನ್ಹೋ’’ತಿ ವಾ ಆಚಿಕ್ಖಿತಬ್ಬೋ. ಸಂಗೀತೀತಿ ಏತ್ಥ ಸಂ ಏಕತೋ ಕತ್ವಾ ಗಾಯಿತಬ್ಬಾ ಕಥೇತಬ್ಬಾತಿ ಸಂಗೀತೀತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಇದಮೇವ ಸಬ್ಬಂ ಏಕತೋ ಕತ್ವಾ’’ತಿಆದಿ. ತತ್ಥ ಕಿನ್ತಿ ಕಿಂ ಉತುಂ. ಇದಂ ನಾಮಾತಿ ಇದಂ ನಾಮ ಉತುಂ. ವದೇಯ್ಯಾಸೀತಿ ಆಗನ್ತುಕಾನಂ ವುಡ್ಢನವಕಭಾವಾದಿಞಾಪನತ್ಥಂ ಕಥೇಯ್ಯಾಸಿ.

೧೨೯. ದುತಿಯನ್ತಿ ಸಹಾಯಂ ಭಿಕ್ಖುಂ ವಾ ಸಾಮಣೇರಂ ವಾ ಪುರಿಸಂ ವಾ. ಅಕರಣೀಯಾನೀತಿ ಉಪಸಮ್ಪನ್ನೇಹಿ ಅಕತ್ತಬ್ಬಾನಿ. ಪಣ್ಡುಪಲಾಸೋತಿ ಏತ್ಥ ಪಣ್ಡೂತಿ ಸೇತಪೀತಮಿಸ್ಸೋ ವಣ್ಣೋ, ಪಲಾಸಸದ್ದೋ ಪಣ್ಣವಾಚಕೋ, ನ ಹರಿತವಾಚಕೋ, ನಾಪಿ ಕಿಂಸುಕದುಮವಾಚಕೋತಿ ದಸ್ಸೇನ್ತೋ ಆಹ ‘‘ಪಣ್ಡುವಣ್ಣೋ ಪಣ್ಣೋ’’ತಿ. ಪಣ್ಡುಪಲಾಸೋತಿ ಸಮಾಸೋಪಿ ಬ್ಯಾಸೋಪಿ ಯುತ್ತೋಯೇವ. ಸಮಾಸಕಾಲೇ ಪಣ್ಡು ಯಸ್ಸತ್ಥೀತಿ ಪಣ್ಡು, ಸೋಯೇವ ಪಲಾಸೋ ಪಣ್ಡುಪಲಾಸೋತಿ ಕಾತಬ್ಬೋ. ಪುಪ್ಫಫಲಾದಿಂ ಬನ್ಧತೀತಿ ಬನ್ಧನನ್ತಿ ವಚನತ್ಥೇನ ಬನ್ಧನಸದ್ದೋ ವಣ್ಟಪರಿಯಾಯೋತಿ ಆಹ ‘‘ವಣ್ಟತೋ’’ತಿ. ಪುಥುಸಿಲಾತಿ (ಮ. ನಿ. ಅಟ್ಠ. ೩.೬೦) ಏತ್ಥ ಪುಥುಸದ್ದೋ ಮಹನ್ತಪರಿಯಾಯೋತಿ ಆಹ ‘‘ಮಹಾಸಿಲಾ’’ತಿ.

೧೩೦. ತಸ್ಸಾತಿ ಉಕ್ಖೇಪನೀಯಕಮ್ಮಾರಹಸ್ಸ ಭಿಕ್ಖುನೋ. ಸಾಮಗ್ಗೀತಿ ಸಙ್ಘಸಾಮಗ್ಗೀ. ತೇನಾತಿ ಉಕ್ಖೇಪನೀಯಕಮ್ಮಾರಹೇನ ಭಿಕ್ಖುನಾ. ಸಮ್ಭೋಗೇತಿ ಆಮಿಸೇನ ಚ ಧಮ್ಮೇನ ಚ ಸಮ್ಭೋಗಹೇತು. ಏತ್ಥ ಸಹಸೇಯ್ಯಾಪಿ ಸಙ್ಗಹಿತಾ ಆಪತ್ತಿಭಾವತೋ. ಅನಾಪತ್ತೀತಿ ಅನುಕ್ಖಿತ್ತಕಭಾವತೋ ಪಾಚಿತ್ತಿಯಾಪತ್ತಿಯಾ ಅನಾಪತ್ತಿ, ಅಲಜ್ಜಿಲಕ್ಖಣಾಭಾವತೋ ದುಕ್ಕಟೇನ ಅನಾಪತ್ತೀತಿ ದಟ್ಠಬ್ಬಂ.

ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ

ದ್ವಾಸತ್ತತಿಅಧಿಕವತ್ಥುಸತಪಟಿಮಣ್ಡಿತಸ್ಸ ಮಹಾಖನ್ಧಕಸ್ಸ

ಅತ್ಥವಣ್ಣನಾಯ ಯೋಜನಾ ಸಮತ್ತಾ.