೫೮. ಅಲಜ್ಜೀನಿಸ್ಸಯವತ್ಥುಕಥಾ

೧೨೦. ‘‘ಅಲಜ್ಜೀನಂ ಓವಾದ’’ನ್ತಿ ಪಾಠಸೇಸೇನ ಯೋಜಿತೇ ಸಾಮ್ಯತ್ಥೇ ಸಾಮಿವಚನಮ್ಪಿ ಯುಜ್ಜತೇವ. ತಂ ನಯಂ ಅದಸ್ಸೇತ್ವಾ ‘‘ಉಪಯೋಗತ್ಥೇ ಸಾಮಿವಚನ’’ನ್ತಿ ವುತ್ತಂ. ‘‘ಭಿಕ್ಖೂಹಿ ಸಭಾಗತ’’ನ್ತಿ ಇಮಿನಾ ಭಿಕ್ಖೂಹಿ ಸಮಾನೋ ಸೀಲಾದಿಗುಣಸಙ್ಖಾತೋ ಭಾಗೋ ಇಮಸ್ಸಾತಿ ಭಿಕ್ಖುಸಭಾಗೋ, ತಸ್ಸ ಭಾವೋ ಭಿಕ್ಖುಸಭಾಗತನ್ತಿ ವಚನತ್ಥಂ ದಸ್ಸೇತಿ. ‘‘ಲಜ್ಜಿಭಾವ’’ನ್ತಿ ಇಮಿನಾ ಭಾವಪಚ್ಚಯಸ್ಸ ಸರೂಪಂ ದಸ್ಸೇತಿ. ನವಟ್ಠಾನನ್ತಿ ಅಭಿನವಟ್ಠಾನಂ. ಗತೇನ ಭಿಕ್ಖುನಾತಿ ಸಮ್ಬನ್ಧೋ.

ಥೇರೋತಿ ನಿಸ್ಸಯದಾಯಕೋ ಥೇರೋ. ಗಹೇತುಕಾಮೋತಿ ನಿಸ್ಸಯಂ ಗಹೇತುಕಾಮೋ. ಆಚಾರನ್ತಿ ನಿಸ್ಸಯಪಟಿಪನ್ನಸ್ಸ ಆಚಾರಂ. ತದಹೇವಾತಿ ತಸ್ಮಿಂ ಗತಅಹನಿ ಏವ. ಆಭೋಗಸ್ಸ ಕತತ್ತಾ, ಅರುಣುಗ್ಗಮನಸ್ಸ ಚ ಅಜಾನನತ್ತಾ ವುತ್ತಂ ‘‘ಅನಾಪತ್ತೀ’’ತಿ. ಅರುಣುಗ್ಗಮನಂ ಅಜಾನನ್ತೋಪಿ ಆಭೋಗಸ್ಸ ಅಕತತ್ತಾ ವುತ್ತಂ ‘‘ಅರುಣುಗ್ಗಮನೇ ದುಕ್ಕಟ’’ನ್ತಿ. ‘‘ದ್ವೇ ತೀಣಿ ದಿವಸಾನೀ’’ತಿ ಪದೇನ ಚತು ಪಞ್ಚ ಛ ದಿವಸಾನಿಪಿ ಗಹೇತಬ್ಬಾನಿ ಲಕ್ಖಣಹಾರನಯೇನ ಅನಿಸ್ಸಿತೇನ ವಸಿತಬ್ಬಭಾವೇನ ಸಮಾನಫಲತ್ತಾ. ತೇನಾಹ ‘‘ಸತ್ತಾಹಂ ವಸಿಸ್ಸಾಮೀ’’ತಿ. ಲದ್ಧಪರಿಹಾರೋತಿ ಲದ್ಧೋ ಪರಿಹಾರೋ ಆಪತ್ತಿಅಪನಯನಂ ಯೇನಾತಿ ಲದ್ಧಪರಿಹಾರೋ.