೫೬. ಅಪತ್ತಕಾದಿವತ್ಥುಕಥಾ

೧೧೮. ಯೋ ಪಿಣ್ಡೋ ಹತ್ಥೇಸು ಲಬ್ಭತೀತಿ ಯೋಜನಾ. ತದತ್ಥಾಯಾತಿ ತಸ್ಸ ಪಿಣ್ಡಸ್ಸ ಅತ್ಥಾಯ. ಸೇಯ್ಯಥಾಪಿ ತಿತ್ಥಿಯಾತಿ ಏತ್ಥ ಸೇಯ್ಯಥಾಪಿಸದ್ದೋ ಉಪಮತ್ಥೋ, ತಿತ್ಥಿಯಸದ್ದೋ ಆಜೀವಕನಾಮಕೇ ತಿತ್ಥಿಯೇ ಹೋತೀತಿ ದಸ್ಸೇನ್ತೋ ಆಹ ‘‘ಯಥಾಪಿ ಆಜೀವಕನಾಮಕಾ ತಿತ್ಥಿಯಾ’’ತಿ. ತಸ್ಮಾ ಆಜೀವಕಸಙ್ಖಾತೇ ತಿತ್ಥಿಯೇ ಉಪಮಂ ಕತ್ವಾ ಉಜ್ಝಾಯನ್ತೀತಿ ಆಹ ‘‘ಸೂಪಬ್ಯಞ್ಜನೇಹೀ’’ತಿಆದಿ. ಹೀತಿ ಸಚ್ಚಂ, ಯಸ್ಮಾ ವಾ. ತೇತಿ ಆಜೀವಕಾ. ಕಮ್ಮಂ ಪನ ನ ಕುಪ್ಪತೀತಿ ಪತ್ತಚೀವರೇಸು ಅಸನ್ತೇಸುಪಿ ಕಮ್ಮವಾಚಾಯ ‘‘ಪರಿಪುಣ್ಣಸ್ಸ ಪತ್ತಚೀವರ’’ನ್ತಿ ಪರಿಕಿತ್ತಿತತ್ತಾ ಕಮ್ಮಂ ನ ಕುಪ್ಪತೀತಿ ಅಧಿಪ್ಪಾಯೋ.

ಯಾಚಿತಕೇನಾತಿ ಏತ್ಥ ಯಾಚಿತೋ ಹುತ್ವಾ ಗಹಿತೋ ಯಾಚಿತಕೋತಿ ದಸ್ಸೇನ್ತೋ ಆಹ ‘‘ಯಾಚಿತ್ವಾ ಗಹಿತೇನಾ’’ತಿ. ‘‘ಈದಿಸೇನ ಹೀ’’ತಿಆದಿನಾ ದೋಸಂ ದಸ್ಸೇತಿ. ತಸ್ಮಾತಿ ಯಸ್ಮಾ ಆಪತ್ತಿ ಹೋತಿ, ತಸ್ಮಾ. ತಸ್ಸಾತಿ ಉಪಸಮ್ಪದಾಪೇಕ್ಖಸ್ಸ. ನಿರಪೇಕ್ಖೇಹಿ ಆಚರಿಯುಪಜ್ಝಾಯಾದೀಹೀತಿ ಯೋಜನಾ. ನಿಸ್ಸಜ್ಜಿತ್ವಾತಿ ಬ್ರಹ್ಮದೇಯ್ಯೇನ ನಿಸ್ಸಜ್ಜಿತ್ವಾ. ಅನಧಿಟ್ಠಾನುಪಗಾನಂ ಪತ್ತಚೀವರಾನಂ ಅಪತ್ತಚೀವರತ್ತಾ ವುತ್ತಂ ‘‘ಅಧಿಟ್ಠಾನುಪಗಂ ಪತ್ತಚೀವರ’’ನ್ತಿ. ಪಣ್ಡುಪಲಾಸನ್ತಿ ಸಮಣುದ್ದೇಸಭಾವಾಪೇಕ್ಖಂ. ಸೋ ಹಿ ರೂಳ್ಹಿವಸೇನ ಪಣ್ಡುಪಲಾಸೋತಿ ವುಚ್ಚತಿ. ಅಥ ವಾ ಯಥಾ ಪಣ್ಡುಪಲಾಸೋ ನ ಹರಿತೋ, ನಾಪಿ ಸುಕ್ಖೋ ಹೋತಿ, ಏವಂ ಸೋಪಿ ಪಬ್ಬಜಾಪೇಕ್ಖೋ ನ ಗಿಹೀ ಹೋತಿ, ನಾಪಿ ಸಾಮಣೇರೋ, ತಸ್ಮಾ ಸಮಣುದ್ದೇಸಭಾವಾಪೇಕ್ಖೋ ‘‘ಪಣ್ಡುಪಲಾಸೋ’’ತಿ ವುಚ್ಚತಿ.

ವಸನ್ತಸ್ಸ ಪಣ್ಡುಪಲಾಸಸ್ಸಾತಿ ಸಮ್ಬನ್ಧೋ. ಅನಾಮಟ್ಠಪಿಣ್ಡಪಾತನ್ತಿ ಭಿಕ್ಖೂಹಿ ಅನಾಮಸಿತಬ್ಬಗ್ಗಂ ಪಿಣ್ಡಪಾತಂ. ಸಾಮಣೇರಭಾಗಸಮಕೋತಿ ಸಾಮಣೇರೇಹಿ ಲದ್ಧೇನ ಭಾಗೇನ ಸಮಂ ಪವತ್ತೋ. ಅಸ್ಸಾತಿ ಪಣ್ಡುಪಲಾಸಸ್ಸ. ಸಾಮಣೇರಸ್ಸ ಸಬ್ಬಂ ಪಟಿಜಗ್ಗನಕಮ್ಮಂ ಕಾತುಂ ವಟ್ಟತಿ ವಿಯ, ಅಸ್ಸ ಕಾತುಂ ವಟ್ಟತೀತಿ ಯೋಜನಾ.