೫೫. ಅನುಪಜ್ಝಾಯಕಾದಿವತ್ಥುಕಥಾ

೧೧೭. ತೇನ ಖೋ ಪನ ಸಮಯೇನಾತಿ ಏತ್ಥ ತಸದ್ದಸ್ಸ ಅನಿಯಮನಿದ್ದೇಸಭಾವಂ ದಸ್ಸೇನ್ತೋ ಆಹ ‘‘ಯೇನ ಸಮಯೇನಾ’’ತಿ. ಸಿಕ್ಖಾಪದಂ ಅಪಞ್ಞತ್ತಂ ಹೋತೀತಿ ‘‘ನ ಭಿಕ್ಖವೇ ಅನುಪಜ್ಝಾಯಕೋ ಉಪಸಮ್ಪಾದೇತಬ್ಬೋ’’ತಿ ಸಿಕ್ಖಾಪದಂ ಅಪಞ್ಞತ್ತಂ ಹೋತಿ. ‘‘ಉಪಜ್ಝಾಯವಿರಹಿತ’’ನ್ತಿ ಇಮಿನಾ ಅನುಪಜ್ಝಾಯಕನ್ತಿ ಏತ್ಥ ಅಕಾರಸ್ಸ ವಿರಹತ್ಥಂ ದಸ್ಸೇತಿ. ಉಪಜ್ಝಾಯವಿರಹಿತಂ ಉಪಸಮ್ಪದಾಪೇಕ್ಖನ್ತಿ ಸಮ್ಬನ್ಧೋ. ‘‘ಏವ’’ನ್ತಿಆದಿನಾ ದೋಸಂ ದಸ್ಸೇತಿ. ಉಪಜ್ಝಂ ಅಗಾಹಾಪೇತ್ವಾತಿ ‘‘ಉಪಜ್ಝಾಯೋ ಮೇ ಭನ್ತೇ ಹೋಹೀ’’ತಿ (ಮಹಾವ. ೬೫; ಮಹಾವ. ಅಟ್ಠ. ೬೪) ಉಪಜ್ಝಂ ಅಗಾಹಾಪೇತ್ವಾ. ಉಪಸಮ್ಪಾದೇನ್ತಸ್ಸ ಕಾರಕಸಙ್ಘಸ್ಸಾತಿ ಯೋಜನಾ. ಕಮ್ಮಂ ಪನಾತಿ ಉಪಸಮ್ಪದಕಮ್ಮಂ ಪನ. ‘‘ಏಸೇವ ನಯೋ’’ತಿ ಇಮಿನಾ ಉಪಸಮ್ಪಾದೇನ್ತಸ್ಸ ಆಪತ್ತಿ, ಕಮ್ಮಂ ಪನ ನ ಕುಪ್ಪತೀತಿ ವಚನಂ ಅತಿದಿಸತಿ.