೫೪. ಉಭತೋಬ್ಯಞ್ಜನಕವತ್ಥುಕಥಾ

೧೧೬. ಉಭತೋಬ್ಯಞ್ಜನಕೋತಿ ಏತ್ಥ ಬಾಹಿರತ್ಥಸಮಾಸಂ ದಸ್ಸೇನ್ತೋ ಆಹ ‘‘ಇತ್ಥಿನಿಮಿತ್ತುಪ್ಪಾದನಕಮ್ಮತೋ ಚಾ’’ತಿಆದಿ. ತತ್ಥ ‘‘ಇತ್ಥಿ…ಪೇ… ಕಮ್ಮತೋ ಚಾ’’ತಿ ಇಮಿನಾ ಉಭಯಸರೂಪಂ ದಸ್ಸೇತಿ. ಉಭತೋ ಕಮ್ಮತೋ ಪವತ್ತನ್ತಿ ಪಾಠಸೇಸೋ ಯೋಜೇತಬ್ಬೋ. ಬ್ಯಞ್ಜನನ್ತಿ ನಿಮಿತ್ತಂ. ಅಸ್ಸಾತಿ ಜನಸ್ಸ. ಕರೋತಿಪಿ ಕಾರೇತಿಪೀತಿ ಏತ್ಥ ಕರಧಾತುಯಾ ಸುದ್ಧಕಮ್ಮಕಾರಿತಕಮ್ಮಾನಿ ದಸ್ಸೇನ್ತೋ ಆಹ ‘‘ಪುರಿಸನಿಮಿತ್ತೇನಾ’’ತಿಆದಿ. ತತ್ಥ ‘‘ವೀತಿಕ್ಕಮ’’ನ್ತಿ ಇಮಿನಾ ಸುದ್ಧಕಮ್ಮಂ ದಸ್ಸೇತಿ, ‘‘ಪರ’’ನ್ತಿ ಇಮಿನಾ ಕಾರಿತಕಮ್ಮಂ ದಸ್ಸೇತಿ. ಸಮಾದಪೇತ್ವಾತಿ ಉಯ್ಯೋಜೇತ್ವಾ. ತಸ್ಸ ದುವಿಧಭಾವಂ ದಸ್ಸೇನ್ತೋ ಆಹ ‘‘ದುವಿಧೋ’’ತಿಆದಿ. ತತ್ಥ ಇತ್ಥಿಭಾವೇನ ಲಕ್ಖಿತೋ ಉಭತೋಬ್ಯಞ್ಜನಕೋ ಇತ್ಥಿಉಭತೋಬ್ಯಞ್ಜನಕೋ. ಏಸ ನಯೋ ಇತರತ್ಥಾಪಿ.

ತತ್ಥಾತಿ ದುವಿಧೇಸು ಉಭತೋಬ್ಯಞ್ಜನಕೇಸು. ಇತ್ಥಿನಿಮಿತ್ತನ್ತಿ ಇತ್ಥಿಯಾ ಅಙ್ಗಜಾತಂ. ಏಸೇವ ನಯೋ ‘‘ಪುರಿಸನಿಮಿತ್ತ’’ನ್ತಿ ಏತ್ಥಾಪಿ. ಪಾಕಟಂ ಪಟಿಚ್ಛನ್ನನ್ತಿ ಸಭಾವತೋ ಪಾಕಟಂ ಪಟಿಚ್ಛನ್ನಂ. ಪುನ ಪಟಿಚ್ಛನ್ನಂ ಪಾಕಟನ್ತಿ ರಾಗವಸೇನ ಪಟಿಚ್ಛನ್ನಂ ಪಾಕಟಂ. ಪರಂ ಗಣ್ಹಾಪೇತೀತಿ ಪರಮೇವ ಗಣ್ಹಾಪೇತೀತಿ ಅತ್ಥೋ. ಇದನ್ತಿ ಕಾರಣಂ. ಏತೇಸನ್ತಿ ದ್ವಿನ್ನಂ ಉಭತೋಬ್ಯಞ್ಜನಕಾನಂ. ಕುರುನ್ದಿಯಂ ಪನ ವುತ್ತಂ, ಕಿಂ ವುತ್ತನ್ತಿ ಯೋಜನಾ. ತತ್ಥಾತಿ ಉಭತೋಬ್ಯಞ್ಜನಕೇ. ವಿಚಾರಣಕ್ಕಮೋತಿ ವೀಮಂಸನಾನುಕ್ಕಮೋ. ‘‘ತತ್ಥ ವಿಚಾರಕ್ಕಮೋ’’ತಿಪಿ ಪಾಠೋ. ವಿಚಾರಣಕ್ಕಮೋ ಧಮ್ಮಸಙ್ಗಹಟ್ಠಕಥಾಯ ವೇದಿತಬ್ಬೋ, ಇಧ ಪನ ಕಿಂ ವೇದಿತಬ್ಬನ್ತಿ ಆಹ ‘‘ಇದಮಿಧ ವೇದಿತಬ್ಬ’’ನ್ತಿ. ತತ್ಥ ಇದನ್ತಿ ನಪಬ್ಬಜ್ಜೂಪಸಮ್ಪದಕಾರಣಂ. ಇಧಾತಿ ಇಮಿಸ್ಸಂ ವಿನಯಟ್ಠಕಥಾಯಂ.