೧೨. ಉರುವೇಲಪಾಟಿಹಾರಿಯಕಥಾ

೩೮. ಪರಿಯಾದಿಯೇಯ್ಯನ್ತಿ ಏತ್ಥ ದಾಧಾತುಸ್ಸ ಪರೀತಿ ಚ ಆತಿ ಚ ಉಪಸಗ್ಗವಸೇನ ಅಭಿಭವನತ್ಥೋತಿ ಆಹ ‘‘ಅಭಿಭವೇಯ್ಯ’’ನ್ತಿ.

೩೯. ಪಚ್ಛಾ ಪಕ್ಖಿತ್ತಾತಿ ಸಙ್ಗೀತಿತೋ ಪರಂ ಪೋತ್ಥಕಾರೂಳ್ಹೇಹಿ ಠಪಿತಾತಿ ಅತ್ಥೋ.

೪೪. ‘‘ಏವಂ ವದನ್ತೋ ವಿಯ ಓಣತೋ’’ತಿ ಇಮಿನಾ ‘‘ಆಹರಹತ್ಥೋ’’ತಿಪದಸ್ಸ ತದ್ಧಿತಭಾವಂ ದಸ್ಸೇತಿ. ವಿತ್ಥಿಣ್ಣಮುಖತ್ತಾ ಮನ್ದಂ ಹೀನಂ ಅತಿಮುಖಮೇತಾಸನ್ತಿ ವಚನತ್ಥೇನ ಅಗ್ಗಿಕಪಾಲಾ ಮನ್ದಾಮುಖಿಯೋತಿ ವುಚ್ಚನ್ತೀತಿ ಆಹ ‘‘ಅಗ್ಗಿಭಾಜನಾನಿ ವುಚ್ಚನ್ತೀ’’ತಿ.

೫೧. ಯಸ್ಮಾ ಯೋ ನಾಗದಮನಕಾಲೋ ಚಿರಂ ಪತತಿ ಪವತ್ತತಿ, ತಸ್ಮಾ ಸೋ ಚಿರಪತಿಕೋತಿ ವುಚ್ಚತಿ, ತಸ್ಮಾ ಚಿರಪತಿಕಾ ಪಟ್ಠಾಯ ಅಭಿಪ್ಪಸನ್ನಾತಿ ಯೋಜನಾ. ಇತಿ ಇಮಮತ್ಥಂ ದಸ್ಸೇನ್ತೋ ಆಹ ‘‘ಚಿರಕಾಲತೋ ಪಟ್ಠಾಯಾ’’ತಿ.

೫೨. ಸಬ್ಬತ್ಥಾತಿ ಸಬ್ಬೇಸು ‘‘ಜಟಾಮಿಸ್ಸ’’ನ್ತಿಆದಿಪದೇಸು. ಖಾರಿಕಾಜನ್ತಿ ಏತ್ಥ ಕಮಣ್ಡಲುಆದಿಕಾ ತಾಪಸಪರಿಕ್ಖಾರಾ ಖಾರೀತಿ ವುಚ್ಚನ್ತಿ, ಖಾರಿಸಙ್ಖಾತೇನ ಭಾರೇನ ಪೂರಿತೋ ಕಾಜೋ ಖಾರಿಕಾಜೋತಿ ಅತ್ಥಂ ಏಕದೇಸೇನ ದಸ್ಸೇನ್ತೋ ಆಹ ‘‘ಖಾರಿಭಾರೋ’’ತಿ.