೫. ಚಿತ್ತಾಗಾರವಗ್ಗೋ

೧. ಪಠಮಸಿಕ್ಖಾಪದ-ಅತ್ಥಯೋಜನಾ

೯೭೮. ಚಿತ್ತಾಗಾರವಗ್ಗಸ್ಸ ಪಠಮೇ ರಞ್ಞೋ ಕೀಳನಟ್ಠಾನಂ ಅಗಾರಂ ರಾಜಾಗಾರನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ರಞ್ಞೋ ಕೀಳನಘರ’’ನ್ತಿ. ಚಿತ್ತಂ ಅಗಾರಂ ಚಿತ್ತಾಗಾರಂ. ಆರಾಮನ್ತಿ ನಗರತೋ ನಾತಿದೂರಆರಾಮೋತಿ ಆಹ ‘‘ಉಪವನ’’ನ್ತಿ. ಉಯ್ಯಾನನ್ತಿ ಸಮ್ಪನ್ನಪುಪ್ಫಫಲತಾಯ ಉದ್ಧಂ ಉಲ್ಲೋಕೇತ್ವಾ ಮನುಸ್ಸಾ ಯನ್ತಿ ಗಚ್ಛನ್ತಿ ಏತ್ಥಾತಿ ಉಯ್ಯಾನಂ. ಪೋಕ್ಖರಣಿನ್ತಿ ಪೋಕ್ಖರಂ ಪದುಮಂ ನೇತೀತಿ ಪೋಕ್ಖರಣೀ. ಪಞ್ಚಪೀತಿ ರಾಜಾಗಾರಾದೀನಿ ಪಞ್ಚಪಿ. ಸಬ್ಬತ್ಥಾತಿ ದಸ್ಸನತ್ಥಾಯ ಗಮನೇ ಚ ಗನ್ತ್ವಾ ಪಸ್ಸನೇ ಚಾತಿ ಸಬ್ಬೇಸು.

೯೮೧. ‘‘ಅಜ್ಝಾರಾಮೇ’’ತಿಆದಿನಾ ಆರಾಮೇ ಠಿತಾಯ ಆರಾಮತೋ ಬಹಿ ಕತೇ ರಾಜಾಗಾರಾದಿಕೇ ಪಸ್ಸನ್ತಿಯಾಪಿ ಅನಾಪತ್ತೀತಿ ದಸ್ಸೇತಿ. ತಾನೀತಿ ರಾಜಾಗಾರಾದೀನೀತಿ. ಪಠಮಂ.

೨. ದುತಿಯಸಿಕ್ಖಾಪದಂ

೯೮೨. ದುತಿಯೇ ಅನುತ್ತಾನಟ್ಠಾನಂ ನತ್ಥೀತಿ. ದುತಿಯಂ.

೩. ತತಿಯಸಿಕ್ಖಾಪದಂ

೯೮೮. ತತಿಯೇ ಯತ್ತಕನ್ತಿ ಯತ್ತಕಂ ಸುತ್ತನ್ತಿ ಸಮ್ಬನ್ಧೋ. ಅಞ್ಛಿತನ್ತಿ ಕಡ್ಢಿತಂ. ತಸ್ಮಿನ್ತಿ ತತ್ತಕೇ ಸುತ್ತೇತಿ ಸಮ್ಬನ್ಧೋ. ತಕ್ಕಮ್ಹೀತಿ ಏತ್ಥ ತಕ್ಕೋತಿ ಏಕೋ ಅಯೋಮಯೋ ಸುತ್ತಕನ್ತನಸ್ಸ ಉಪಕರಣವಿಸೇಸೋ. ಸೋ ಹಿ ತಕೀಯತಿ ಸುತ್ತಂ ಬನ್ಧೀಯತಿ ಏತ್ಥ, ಏತೇನಾತಿ ವಾ ತಕ್ಕೋತಿ ವುಚ್ಚತಿ, ತಸ್ಮಿಂ. ಕನ್ತನತೋತಿ ಕನ್ತೀಯತೇ ಕಪ್ಪಾಸಾದಿಭಾವಸ್ಸ ಛಿನ್ದೀಯತೇ ಕನ್ತನಂ, ತತೋ.

೯೮೯. ದಸಿಕಸುತ್ತಾದಿನ್ತಿ ಏತ್ಥ ದಸಾತಿ ವತ್ಥಸ್ಸಾವಯವೋ. ಸೋ ಹಿ ದಿಯ್ಯತಿ ಅವಖಣ್ಡೀಯತೀತಿ ದಸಾತಿ ವುಚ್ಚತಿ, ತಸ್ಸಂ ದಸಾಯಂ ಪವತ್ತಂ ದಸಿಕಂ, ತಮೇವ ಸುತ್ತಂ ದಸಿಕಸುತ್ತಂ. ಆದಿಸದ್ದೇನ ವಕ್ಖಮಾನಂ ದುಕ್ಕನ್ತಿತಸುತ್ತಾದಿಂ ಸಙ್ಗಣ್ಹಾತೀತಿ. ತತಿಯಂ.

೪. ಚತುತ್ಥಸಿಕ್ಖಾಪದಂ

೯೯೨. ಚತುತ್ಥೇ ಆದಿಂ ಕತ್ವಾತಿ ಧೋವನಾದೀನಿ ಆದಿಂ ಕತ್ವಾ. ಖಾದನೀಯಾದೀಸೂತಿ ಪೂವಖಾದನೀಯಾದೀಸು. ರೂಪಗಣನಾಯಾತಿ ಪೂವಾದೀನಂ ಸಣ್ಠಾನಗಣನಾಯ.

೯೯೩. ಯಾಗುಪಾನೇತ್ತ ಯಾಗುಸಙ್ಖಾತೇ ಪಾನೇ. ತೇಸನ್ತಿ ಮನುಸ್ಸಾನಂ. ವೇಯ್ಯಾವಚ್ಚಕರಟ್ಠಾನೇ ಠಪೇತ್ವಾತಿ ಮಾತಾಪಿತರೋ ಅತ್ತನೋ ವೇಯ್ಯಾವಚ್ಚಕರಟ್ಠಾನೇ ಠಪೇತ್ವಾತಿ. ಚತುತ್ಥಂ.

೫. ಪಞ್ಚಮಸಿಕ್ಖಾಪದಂ

೯೯೬. ಪಞ್ಚಮೇ ವಿನಿಚ್ಛಿನನ್ತೀತಿ ಅಧಿಕರಣಂ ವಿನಿಚ್ಛಿನನ್ತೀ ಭಿಕ್ಖುನೀತಿ ಯೋಜನಾತಿ. ಪಞ್ಚಮಂ.

೬. ಛಟ್ಠಸಿಕ್ಖಾಪದಂ

೯೯೯. ಛಟ್ಠೇ ಅನುತ್ತಾನವಚನಂ ನತ್ಥೀತಿ.

೭. ಸತ್ತಮಸಿಕ್ಖಾಪದಂ

೧೦೦೭. ಸತ್ತಮೇ ‘‘ಪುನ ಪರಿಯಾಯೇ’’ತಿ ಏತ್ಥ ಪರಿಯಾಯಸದ್ದೋ ವಾರವೇವಚನೋತಿ ಆಹ ‘‘ಪುನ ವಾರೇ’’ತಿ. ಮಹಗ್ಘಚೀವರನ್ತಿ ಮಹಗ್ಘಂ ಆವಸಥಚೀವರನ್ತಿ. ಸತ್ತಮಂ.

೮. ಅಟ್ಠಮಸಿಕ್ಖಾಪದಂ

೧೦೦೮. ಅಟ್ಠಮೇ ಅನಿಸ್ಸಜ್ಜಿತ್ವಾತಿ ಏತ್ಥ ಬ್ರಹ್ಮದೇಯ್ಯೇನ ನ ಅನಿಸ್ಸಜ್ಜನಂ, ಅಥ ಖೋ ತಾವಕಾಲಿಕಮೇವಾತಿ ದಸ್ಸೇನ್ತೋ ಆಹ ‘‘ರಕ್ಖನತ್ಥಾಯಾ’’ತಿಆದಿ.

೧೦೧೨. ಪಟಿಜಗ್ಗಿಕನ್ತಿ ರಕ್ಖಣಕಂ. ವಚೀಭೇದನ್ತಿ ‘‘ಪಟಿಜಗ್ಗಾಹೀ’’ತಿ ವಚೀಭೇದಂ. ರಟ್ಠೇತಿ ವಿಜಿತೇ. ತಞ್ಹಿ ರಠನ್ತಿ ಗಾಮನಿಗಮಾದಯೋ ತಿಟ್ಠನ್ತಿ ಏತ್ಥಾತಿ ರಟ್ಠನ್ತಿ ವುಚ್ಚತೀತಿ. ಅಟ್ಠಮಂ.

೯. ನವಮಸಿಕ್ಖಾಪದಂ

೧೦೧೫. ನವಮೇ ಸಿಪ್ಪಸದ್ದೋ ಪಚ್ಚೇಕಂ ಯೋಜೇತಬ್ಬೋ ‘‘ಹತ್ಥಿಸಿಪ್ಪಞ್ಚ ಅಸ್ಸಸಿಪ್ಪಞ್ಚ ರಥಸಿಪ್ಪಞ್ಚ ಧನುಸಿಪ್ಪಞ್ಚ ಥರುಸಿಪ್ಪಞ್ಚಾ’’ತಿ. ತತ್ಥ ಥರುಸಿಪ್ಪನ್ತಿ ಅಸಿಕೀಳನಸಿಪ್ಪಂ. ಮನ್ತಸದ್ದೋಪಿ ಪಚ್ಚೇಕಂ ಯೋಜೇತಬ್ಬೋ ‘‘ಆಥಬ್ಬಣಮನ್ತೋ ಚ ಖೀಲನಮನ್ತೋ ಚ ವಸೀಕರಣಮನ್ತೋ ಚ ಸೋಸಾಪನಮನ್ತೋ ಚಾ’’ತಿ. ತತ್ಥ ಆಥಬ್ಬಣಮನ್ತೋತಿ ಆಥಬ್ಬಣವೇದೇನ ವಿಹಿತೋ ಪರೂಪಘಾತಕರೋ ಮನ್ತೋ. ಖೀಲನಮನ್ತೋತಿ ಸಾರದಾರುಖೀಲಂ ಮನ್ತೇನ ಜಪ್ಪಿತ್ವಾ ಪಥವಿಯಂ ನಿಖಣಿತ್ವಾ ಧಾರಣಮನ್ತೋ. ವಸೀಕರಣಮನ್ತೋತಿ ಮನ್ತೇನ ಜಪ್ಪಿತ್ವಾ ಪರಸ್ಸ ಉಮ್ಮತ್ತಭಾವಮಾಪನ್ನಕರಣೋ ಮನ್ತೋ. ಸೋಸಾಪನಮನ್ತೋತಿ ಪರಸ್ಸ ಮಂಸಲೋಹಿತಾದಿಸೋಸಾಪನಮನ್ತೋ. ಅಗದಪಯೋಗೋತಿ ಭುಸವಿಸಸ್ಸ ಪಯೋಜನಂ. ಆದಿಸದ್ದೇನ ಅಞ್ಞೇಪಿ ಪರೂಪಘಾತಕರಣೇ ಸಿಪ್ಪೇ ಸಙ್ಗಣ್ಹಾತಿ. ಯಕ್ಖಪರಿತ್ತನ್ತಿ ಯಕ್ಖೇಹಿ ಸಮನ್ತತೋ ತಾಣಂ. ನಾಗಮಣ್ಡಲನ್ತಿ ಸಪ್ಪಾನಂ ಪವೇಸನನಿವಾರಣತ್ಥಂ ಮಣ್ಡಲಬನ್ಧಮನ್ತೋ. ಆದಿಸದ್ದೇನ ವಿಸಪಟಿಹನನಮನ್ತಾದಯೋ ಸಙ್ಗಣ್ಹಾತೀತಿ. ನವಮಂ.

೧೦. ದಸಮಸಿಕ್ಖಾಪದಂ

೧೦೧೮. ದಸಮೇ ಅನುತ್ತಾನವಚನಂ ನತ್ಥೀತಿ. ದಸಮಂ.

ಚಿತ್ತಾಗಾರವಗ್ಗೋ ಪಞ್ಚಮೋ.