೬. ಆರಾಮವಗ್ಗೋ

೧. ಪಠಮಸಿಕ್ಖಾಪದ-ಅತ್ಥಯೋಜನಾ

೧೦೨೫. ಆರಾಮವಗ್ಗಸ್ಸ ಪಠಮೇ ಉಪಚಾರನ್ತಿ ಅಪರಿಕ್ಖಿತ್ತಸ್ಸ ಆರಾಮಸ್ಸ ಪರಿಕ್ಖೇಪಾರಹಟ್ಠಾನಂ ಉಪಚಾರಂ.

೧೦೨೭. ‘‘ಸೀಸಾನುಲೋಕಿಕಾ’’ತಿ ಸಾಮಞ್ಞತೋ ವುತ್ತೇಪಿ ಭಿಕ್ಖುನೀನಮೇವ ಸೀಸನ್ತಿ ಆಹ ‘‘ಭಿಕ್ಖುನೀನ’’ನ್ತಿ. ಯತ್ಥಾತಿ ಯಸ್ಮಿಂ ಠಾನೇತಿ. ಪಠಮಂ.

೨. ದುತಿಯಸಿಕ್ಖಾಪದಂ

೧೦೨೮. ದುತಿಯೇ ಅಬ್ಭನ್ತರೋತಿ ಅಬ್ಭನ್ತರೇ ಪರಿಯಾಪನ್ನೋ, ಜಾತೋ ವಾ. ‘‘ಸಙ್ಕಾಮೇಸೀ’’ತಿ ಇಮಿನಾ ಸಂಹರೀತಿ ಏತ್ಥ ಹರಧಾತುಯಾ ಸಙ್ಕಮನತ್ಥಂ ದಸ್ಸೇತಿ. ನ್ಹಾಪಿತಾತಿ ಕಪ್ಪಕಾ. ತೇ ಹಿ ನಹಾಪೇನ್ತಿ ಸೋಚಾಪೇನ್ತೀತಿ ನ್ಹಾಪಿತಾತಿ ವುಚ್ಚನ್ತಿ. ತನ್ತಿ ಕಾಸಾವನಿವಾಸನನ್ತಿ. ದುತಿಯಂ.

೩-೪. ತತಿಯ-ಚತುತ್ಥಸಿಕ್ಖಾಪದಂ

೧೦೩೬. ತತಿಯಚತುತ್ಥೇಸು ಅನುತ್ತಾನಟ್ಠಾನಂ ನತ್ಥೀತಿ. ತತಿಯಚತುತ್ಥಾನಿ.

೫. ಪಞ್ಚಮಸಿಕ್ಖಾಪದಂ

೧೦೪೩. ಪಞ್ಚಮೇ ‘‘ಕುಲೇ ಮಚ್ಛರೋ’’ತಿ ಏತ್ಥ ಮಚ್ಛರನಂ ಮಚ್ಛರೋತಿ ವಚನತ್ಥೋ ಕಾತಬ್ಬೋ. ‘‘ತಂ ಕುಲಂ ಅಸ್ಸದ್ಧಂ ಅಪ್ಪಸನ್ನ’’ನ್ತಿ ಕುಲಸ್ಸ ಅವಣ್ಣಂ ಭಾಸತೀತಿ ಯೋಜನಾ. ‘‘ಭಿಕ್ಖುನಿಯೋ ದುಸ್ಸೀಲಾ ಪಾಪಧಮ್ಮಾ’’ತಿ ಭಿಕ್ಖುನೀನಂ ಅವಣ್ಣಂ ಭಾಸತೀತಿ ಯೋಜನಾ.

೧೦೪೫. ‘‘ಸನ್ತಂಯೇವ ಆದೀನವ’’ನ್ತಿ ಸಮ್ಬನ್ಧಿಯಾ ಸಮ್ಬನ್ಧಂ ದಸ್ಸೇತುಂ ವುತ್ತಂ ‘‘ಕುಲಸ್ಸ ವಾ ಭಿಕ್ಖುನೀನಂ ವಾ’’ತಿ ಇಮಿನಾ ದ್ವೀಸು ಅಞ್ಞತರಮೇವ ನ ಸಮ್ಬನ್ಧೋ ಹೋತಿ, ಅಥ ಖೋ ದ್ವಯಮ್ಪೀತಿ ದಸ್ಸೇತೀತಿ. ಪಞ್ಚಮಂ.

೬. ಛಟ್ಠಸಿಕ್ಖಾಪದಂ

೧೦೪೮. ಛಟ್ಠೇ ಓವಾದಾಯಾತಿ ಏತ್ಥ ನ ಯೋ ವಾ ಸೋ ವಾ ಓವಾದೋ ಹೋತಿ, ಅಥ ಖೋ ಗರುಧಮ್ಮೋಯೇವಾತಿ ಆಹ ‘‘ಗರುಧಮ್ಮತ್ಥಾಯಾ’’ತಿ. ಸಹ ವಸತಿ ಏತ್ಥ, ಏತೇನಾತಿ ವಾ ಸಂವಾಸೋತಿ ವಚನತ್ಥೇನ ಉಪೋಸಥಪವಾರಣಾ ಸಂವಾಸೋ ನಾಮಾತಿ ಆಹ ‘‘ಉಪೋಸಥಪವಾರಣಾಪುಚ್ಛನತ್ಥಾಯಾ’’ತಿ. ‘‘ಪುಚ್ಛನತ್ಥಾಯಾ’’ತಿ ಇಮಿನಾ ‘‘ಸಂವಾಸಾಯಾ’’ತಿ ಏತ್ಥ ಉತ್ತರಪದಲೋಪಭಾವಂ ದಸ್ಸೇತಿ. ಏತ್ಥಾತಿ ಭಿಕ್ಖುನಿವಿಭಙ್ಗೇ, ಸಿಕ್ಖಾಪದೇ ವಾ ಪಾಳಿಯಂ ವಾತಿ. ಛಟ್ಠಂ.

೭-೯. ಸತ್ತಮ-ಅಟ್ಠಮ-ನವಮಸಿಕ್ಖಾಪದಂ

೧೦೫೩. ಸತ್ತಮಟ್ಠಮನವಮೇಸು ಅನುತ್ತಾನವಚನಂ ನತ್ಥಿ. ಕೇವಲಂ ಪನ ‘‘ಇಮಿಸ್ಸಾಪೀ’’ತಿ ಪದಂ ವಿಸೇಸೋ, ಇಮಿಸ್ಸಾಪಿ ಪಾಳಿಯಾತಿ ಅತ್ಥೋತಿ. ಸತ್ತಮಟ್ಠಮನವಮಾನಿ.

೧೦. ದಸಮಸಿಕ್ಖಾಪದಂ

೧೦೬೨. ದಸಮೇ ದ್ವೇ ಕಾಯಾ ಉಪರಿಮಕಾಯೋ ಹೇಟ್ಠಿಮಕಾಯೋತಿ. ತತ್ಥ ಕಟಿತೋ ಉದ್ಧಂ ಉಪರಿಮಕಾಯೋ, ಹೇಟ್ಠಾ ಹೇಟ್ಠಿಮಕಾಯೋ. ತತ್ಥ ‘‘ಪಸಾಖೇ’’ತಿ ಇದಂ ಹೇಟ್ಠಿಮಕಾಯಸ್ಸ ನಾಮನ್ತಿ ಆಹ ‘‘ಅಧೋಕಾಯೇ’’ತಿ. ಹೀತಿ ಸಚ್ಚಂ. ತತೋತಿ ಅಧೋಕಾಯತೋ. ಇಮಿನಾ ಪಞ್ಚಮೀಬಾಹಿರತ್ಥಸಮಾಸಂ ದಸ್ಸೇತಿ. ರುಕ್ಖಸ್ಸ ಸಾಖಾ ಪಭಿಜ್ಜಿತ್ವಾ ಗತಾ ವಿಯ ಉಭೋ ಊರೂ ಪಭಿಜ್ಜಿತ್ವಾ ಗತಾತಿ ಯೋಜನಾ.

೧೦೬೫. ಫಾಲೇಹೀತಿ ಏತ್ಥ ಇತಿಸದ್ದೋ ಆದ್ಯತ್ಥೋ. ತೇನ ‘‘ಧೋವಾ’’ತಿಆದೀನಿ ಚತ್ತಾರಿ ಪದಾನಿ ಸಙ್ಗಣ್ಹಾತಿ. ಆಣತ್ತಿದುಕ್ಕಟಾನೀತಿ ಹೇಟ್ಠಾ ವುತ್ತೇಸು ಅಟ್ಠಸು ದುಕ್ಕಟೇಸು ವಿನಯದುಕ್ಕಟಮೇವ. ಸೇಸೇಸೂತಿ ಭಿನ್ದನತೋ ಸೇಸೇಸು ಫಾಲನಾದೀಸೂತಿ. ದಸಮಂ.

ಆರಾಮವಗ್ಗೋ ಛಟ್ಠೋ.