೩. ತತಿಯಸಿಕ್ಖಾಪದಂ

೯೪೧. ತತಿಯೇ ಉಳಾರಕುಲಾತಿ ಜಾತಿಸೇಟ್ಠಕುಲಾ, ಇಸ್ಸರಿಯಭೋಗಾದೀಹಿ ವಾ ವಿಪುಲಕುಲಾ. ಗುಣೇಹೀತಿ ಸೀಲಾದಿಗುಣೇಹಿ. ‘‘ಉಳಾರಾತಿ ಸಮ್ಭಾವಿತಾ’’ತಿ ಇಮಿನಾ ಇತಿಲೋಪತುಲ್ಯಾಧಿಕರಣಸಮಾಸಂ ದಸ್ಸೇತಿ.

‘‘ಅಭಿಭೂತಾ’’ತಿ ಇಮಿನಾ ‘‘ಅಪಕತಾ’’ತಿ ಏತ್ಥ ಕರಧಾತು ಸಬ್ಬಧಾತ್ವತ್ಥವಾಚೀಪಿ ಇಧ ಅಪಪುಬ್ಬತ್ತಾ ವಿಸೇಸತೋ ಅಭಿಭವನತ್ಥೇ ವತ್ತತೀತಿ ದಸ್ಸೇತಿ. ಏತಾಸನ್ತಿ ಭಿಕ್ಖುನೀನಂ. ‘‘ಸಞ್ಞಾಪಯಮಾನಾ’’ತಿ ಇಮಿನಾ ಸಞ್ಞಾಪನಂ ಸಞ್ಞತ್ತೀತಿ ವಚನತ್ಥಂ ದಸ್ಸೇತಿ. ಹೇತೂದಾಹರಣಾದೀಹೀತಿ ಏತ್ಥ ಆದಿಸದ್ದೇನ ಉಪಮಾದಯೋ ಸಙ್ಗಣ್ಹಾತಿ. ‘‘ವಿವಿಧೇಹಿ ನಯೇಹಿ ಞಾಪನಾ’’ತಿ ಇಮಿನಾ ವಿವಿಧೇಹಿ ಞಾಪನಂ ವಿಞ್ಞತ್ತೀತಿ ವಚನತ್ಥಂ ದಸ್ಸೇತಿ.

೯೪೩. ಚಙ್ಕಮನೇ ಪದವಾರಗಣನಾಯ ಆಪತ್ತಿಯಾ ನ ಕಾರೇತಬ್ಬೋತಿ ಆಹ ‘‘ನಿವತ್ತನಗಣನಾಯಾ’’ತಿ. ಪದಾದಿಗಣನಾಯಾತಿ ಪದಅನುಪದಾದಿಗಣನಾಯಾತಿ. ತತಿಯಂ.