೪. ತುವಟ್ಟವಗ್ಗೋ

೧. ಪಠಮಸಿಕ್ಖಾಪದ-ಅತ್ಥಯೋಜನಾ

೯೩೩. ತುವಟ್ಟವಗ್ಗಸ್ಸ ಪಠಮೇ ‘‘ತುವಟ್ಟ ನಿಪಜ್ಜಾಯ’’ನ್ತಿ ಧಾತುಪಾಠೇಸು (ಸದ್ದನೀತಿಧಾತುಮಾಲಾಯಂ ೧೮ ಟಕಾರನ್ತಧಾತು) ವುತ್ತತ್ತಾ ‘‘ತುವಟ್ಟೇಯ್ಯುನ್ತಿ ನಿಪಜ್ಜೇಯ್ಯು’’ನ್ತಿ ವುತ್ತನ್ತಿ. ಪಠಮಂ.

೨. ದುತಿಯಸಿಕ್ಖಾಪದಂ

೯೩೭. ದುತಿಯೇ ಏಕತ್ಥರಣಪಾವುರಣನ್ತಿಏತ್ಥ ಉತ್ತರಪದಾನಂ ದ್ವನ್ದಭಾವಂ, ಪುಬ್ಬಪದೇನ ಚ ಬಾಹಿರತ್ಥಸಮಾಸಭಾವಂ ದಸ್ಸೇತುಂ ವುತ್ತಂ ‘‘ಏಕ’’ನ್ತಿಆದಿ. ತತ್ಥ ಚೇವ, ಚಸದ್ದೇಹಿ ದ್ವನ್ದಭಾವಂ ದೀಪೇತಿ, ‘‘ಏತಾಸ’’ನ್ತಿಇಮಿನಾ ಬಾಹಿರತ್ಥಸಮಾಸಭಾವಂ. ಏತನ್ತಿ ‘‘ಏಕತ್ಥರಣಪಾವುರಣಾ’’ತಿ ಏತಂ ನಾಮನ್ತಿ. ದುತಿಯಂ.

೩. ತತಿಯಸಿಕ್ಖಾಪದಂ

೯೪೧. ತತಿಯೇ ಉಳಾರಕುಲಾತಿ ಜಾತಿಸೇಟ್ಠಕುಲಾ, ಇಸ್ಸರಿಯಭೋಗಾದೀಹಿ ವಾ ವಿಪುಲಕುಲಾ. ಗುಣೇಹೀತಿ ಸೀಲಾದಿಗುಣೇಹಿ. ‘‘ಉಳಾರಾತಿ ಸಮ್ಭಾವಿತಾ’’ತಿ ಇಮಿನಾ ಇತಿಲೋಪತುಲ್ಯಾಧಿಕರಣಸಮಾಸಂ ದಸ್ಸೇತಿ.

‘‘ಅಭಿಭೂತಾ’’ತಿ ಇಮಿನಾ ‘‘ಅಪಕತಾ’’ತಿ ಏತ್ಥ ಕರಧಾತು ಸಬ್ಬಧಾತ್ವತ್ಥವಾಚೀಪಿ ಇಧ ಅಪಪುಬ್ಬತ್ತಾ ವಿಸೇಸತೋ ಅಭಿಭವನತ್ಥೇ ವತ್ತತೀತಿ ದಸ್ಸೇತಿ. ಏತಾಸನ್ತಿ ಭಿಕ್ಖುನೀನಂ. ‘‘ಸಞ್ಞಾಪಯಮಾನಾ’’ತಿ ಇಮಿನಾ ಸಞ್ಞಾಪನಂ ಸಞ್ಞತ್ತೀತಿ ವಚನತ್ಥಂ ದಸ್ಸೇತಿ. ಹೇತೂದಾಹರಣಾದೀಹೀತಿ ಏತ್ಥ ಆದಿಸದ್ದೇನ ಉಪಮಾದಯೋ ಸಙ್ಗಣ್ಹಾತಿ. ‘‘ವಿವಿಧೇಹಿ ನಯೇಹಿ ಞಾಪನಾ’’ತಿ ಇಮಿನಾ ವಿವಿಧೇಹಿ ಞಾಪನಂ ವಿಞ್ಞತ್ತೀತಿ ವಚನತ್ಥಂ ದಸ್ಸೇತಿ.

೯೪೩. ಚಙ್ಕಮನೇ ಪದವಾರಗಣನಾಯ ಆಪತ್ತಿಯಾ ನ ಕಾರೇತಬ್ಬೋತಿ ಆಹ ‘‘ನಿವತ್ತನಗಣನಾಯಾ’’ತಿ. ಪದಾದಿಗಣನಾಯಾತಿ ಪದಅನುಪದಾದಿಗಣನಾಯಾತಿ. ತತಿಯಂ.

೪. ಚತುತ್ಥಸಿಕ್ಖಾಪದಂ

೯೪೯. ಚತುತ್ಥೇ ಅನುತ್ತಾನಟ್ಠಾನಂ ನತ್ಥೀತಿ. ಚತುತ್ಥಂ.

೫. ಪಞ್ಚಮಸಿಕ್ಖಾಪದಂ

೯೫೨. ಪಞ್ಚಮೇ ಆಣತ್ತಾ ಭಿಕ್ಖುನೀತಿ ಯೋಜನಾ. ಇದಞ್ಚ ಪಚ್ಚಾಸನ್ನವಸೇನ ವುತ್ತಂ ಯಂಕಿಞ್ಚಿಪಿ ಆಣಾಪೇತುಂ ಸಕ್ಕುಣೇಯ್ಯತ್ತಾತಿ. ಪಞ್ಚಮಂ.

೬-೯. ಛಟ್ಠಾದಿಸಿಕ್ಖಾಪದಂ

೯೫೫. ಛಟ್ಠ-ಸತ್ತಮ-ಅಟ್ಠಮ-ನವಮೇಸು ಅನುತ್ತಾನವಚನಂ ನತ್ಥೀತಿ. ಛಟ್ಠ ಸತ್ತಮ ಅಟ್ಠಮ ನವಮಾನಿ.

೧೦. ದಸಮಸಿಕ್ಖಾಪದಂ

೯೭೩. ದಸಮೇ ಅಹುನ್ದರಿಕಾತಿ ತಸ್ಮಿಂ ಕಾಲೇ, ದೇಸೇ ವಾ ಸಮ್ಬಾಧಸ್ಸ ನಾಮಮೇತನ್ತಿ ಆಹ ‘‘ಅಹುನ್ದರಿಕಾತಿ ಸಮ್ಬಾಧಾ’’ತಿ.

೯೭೫. ಯಥಾ ‘‘ಉತ್ತರಿಛಪ್ಪಞ್ಚವಾಚಾಹೀ’’ತಿ (ಪಾಚಿ. ೬೨-೬೫) ಏತ್ಥ ಪಞ್ಚಸದ್ದೋ ನ ಕೋಚಿ ಅತ್ಥೋ, ವಾಚಾಸಿಲಿಟ್ಠತ್ಥಂ ಲೋಕವೋಹಾರವಸೇನ ವುತ್ತೋ, ನ ಏವಮಿಧ, ಇಧ ಪನ ಅತ್ಥೋ ಅತ್ಥಿ, ಪಞ್ಚ ಯೋಜನಾನಿ ಗಚ್ಛನ್ತಿಯಾಪಿ ಅನಾಪತ್ತಿಯೇವಾತಿ ಆಹ ‘‘ಪವಾರೇತ್ವಾ…ಪೇ… ಅನಾಪತ್ತೀ’’ತಿ. ಪಚ್ಚಾಗಚ್ಛತೀತಿ ಪಟಿನಿವತ್ತೇತ್ವಾ ಆಗಚ್ಛತೀತಿ. ದಸಮಂ.

ತುವಟ್ಟವಗ್ಗೋ ಚತುತ್ಥೋ.