೬. ಛಟ್ಠಸಿಕ್ಖಾಪದಂ

೯೦೯. ಛಟ್ಠೇ ‘‘ಅಞ್ಞಂ ಪರಿಕ್ಖಾರ’’ನ್ತಿಏತ್ಥ ಪರಿಕ್ಖಾರಸ್ಸ ಸರೂಪಂ ದಸ್ಸೇನ್ತೋ ಆಹ ‘‘ಯಂಕಿಞ್ಚೀ’’ತಿಆದಿ. ಯಂಕಿಞ್ಚಿ ಅಞ್ಞತರನ್ತಿ ಸಮ್ಬನ್ಧೋ. ಕಿತ್ತಕಂಅಗ್ಘನಕನ್ತಿ ಕಿಂ ಪಮಾಣೇನ ಅಗ್ಘೇನ ಅರಹಂ ಚೀವರಂ. ದಾತುಕಾಮತ್ಥಾತಿ ತುಮ್ಹೇ ದಾತುಕಾಮಾ ಭವಥಾತಿ ಅತ್ಥೋ. ಕತಿಪಾಹೇನಾತಿ ಕತಿಪಯಾನಿ ಅಹಾನಿ ಕತಿಪಾಹಂ, ಯಕಾರಲೋಪೋ. ಕತಿಪಯಸದ್ದೋಹಿ ದ್ವಿತಿವಾಚಕೋ ರೂಳ್ಹೀಸದ್ದೋ, ತೇನ ಕತಿಪಾಹೇನ. ಸಮಗ್ಘನ್ತಿ ಅಪ್ಪಗ್ಘಂ. ಸಂಸದ್ದೋ ಹಿ ಅಪ್ಪತ್ಥವಾಚಕೋತಿ. ಛಟ್ಠಂ.