೯. ನವಮಸಿಕ್ಖಾಪದಂ

೮೭೫. ನವಮೇ ಅಭಿಸಪೇಯ್ಯಾತಿ ಏತ್ಥ ಸಪಧಾತುಸ್ಸ ಅಕ್ಕೋಸನತ್ಥಂ ಅನ್ತೋಕತ್ವಾ ಕರಧಾತುಯಾ ಅತ್ಥಂ ದಸ್ಸೇನ್ತೋ ಆಹ ‘‘ಸಪಥಂ ಕರೇಯ್ಯಾ’’ತಿ. ನಿರಯೇ ನಿಬ್ಬತ್ತಾಮ್ಹೀತಿ ಅಹಂ ನಿರಯೇ ನಿಬ್ಬತ್ತಾ ಅಮ್ಹೀತಿ ಯೋಜನಾ. ನಿರಯೇ ನಿಬ್ಬತ್ತತೂತಿ ಏಸಾ ಭಿಕ್ಖುನೀ ನಿರಯೇ ನಿಬ್ಬತ್ತತೂತಿ ಯೋಜನಾ. ಈದಿಸಾ ಹೋತೂತಿ ಮಮ ಸದಿಸಾ ಹೋತೂತಿ ಅತ್ಥೋ. ಕಾಣಾತಿ ಏಕಕ್ಖಿಕಾಣಾ, ದ್ವಕ್ಖಿಕಾಣಾ ವಾ. ಕುಣೀತಿ ಹತ್ಥಪಾದಾದಿವಙ್ಕಾ.

೮೭೮. ಏದಿಸಾತಿ ವಿರೂಪಾದಿಜಾತಿಕಾ. ವಿರಮಸ್ಸೂತಿ ವಿರಮಾಹಿ. ಅದ್ಧಾತಿ ಧುವನ್ತಿ. ನವಮಂ.