೨. ಅನ್ಧಕಾರವಗ್ಗೋ

೧. ಪಠಮಸಿಕ್ಖಾಪದ-ಅತ್ಥಯೋಜನಾ

೮೩೯. ಅನ್ಧಕಾರವಗ್ಗಸ್ಸ ಪಠಮೇ ಅಪ್ಪದೀಪೇತಿ ಉಪಲಕ್ಖಣವಸೇನ ವುತ್ತತ್ತಾ ಅಞ್ಞೇಪಿ ಆಲೋಕಾ ಗಹೇತಬ್ಬಾತಿ ದಸ್ಸೇನ್ತೋ ಆಹ ‘‘ಪದೀಪಚನ್ದಸೂರಿಯಅಗ್ಗೀಸೂ’’ತಿಆದಿ. ಅಸ್ಸಾತಿ ‘‘ಅಪ್ಪದೀಪೇ’’ತಿಪದಸ್ಸ.

೮೪೧. ನರಹೋಅಸ್ಸಾದಾಪೇಕ್ಖಾ ಹುತ್ವಾ ಚ ರಸ್ಸಾದತೋ ಅಞ್ಞವಿಹಿತಾವ ಹುತ್ವಾ ಚಾತಿ ಯೋಜನಾ. ಇಮಿನಾ ‘‘ಸನ್ತಿಟ್ಠತಿ ವಾ ಸಲ್ಲಪತಿ ವಾ’’ತಿ ಪದೇ ಕಿರಿಯಾವಿಸೇಸನಭಾವಂ ದಸ್ಸೇತಿ. ದಾನೇನ ವಾ ನಿಮಿತ್ತಭೂತೇನ, ಪೂಜಾಯ ವಾ ನಿಮಿತ್ತಭೂತಾಯ ಮನ್ತೇತೀತಿ ಯೋಜನಾತಿ. ಪಠಮಂ.

೨. ದುತಿಯಸಿಕ್ಖಾಪದಂ

೮೪೨. ದುತಿಯೇ ಇದಮೇವ ಪದಂ ನಾನನ್ತಿ ಸಮ್ಬನ್ಧೋತಿ. ದುತಿಯಂ.

೩. ತತಿಯಸಿಕ್ಖಾಪದಂ

೮೪೬. ತತಿಯೇ ‘‘ಇದಮೇವಾ’’ತಿ ಪದಂ ಅನುವತ್ತೇತಬ್ಬಂ. ತಾದಿಸಮೇವಾತಿ ಪಠಮಸದಿಸಮೇವಾತಿ ಅತ್ಥೋತಿ. ತತಿಯಂ.

೪. ಚತುತ್ಥಸಿಕ್ಖಾಪದಂ

೮೫೦. ಚತುತ್ಥೇ ಕಣ್ಣಸ್ಸ ಸಮೀಪಂ ನಿಕಣ್ಣಂ, ತಮೇವ ನಿಕಣ್ಣಿಕನ್ತಿ ವುತ್ತೇ ಕಣ್ಣಮೂಲನ್ತಿ ಆಹ ‘‘ಕಣ್ಣಮೂಲಂ ವುಚ್ಚತೀ’’ತಿ. ‘‘ಕಣ್ಣಮೂಲೇ’’ತಿ ಇಮಿನಾ ‘‘ನಿಕಣ್ಣಿಕ’’ನ್ತಿ ಏತ್ಥ ಭುಮ್ಮತ್ಥೇ ಉಪಯೋಗವಚನನ್ತಿ ದಸ್ಸೇತಿ. ಆಹರಣತ್ಥಾಯಾತಿ ಆಹರಾಪನತ್ಥಾಯಾತಿ. ಚತುತ್ಥಂ.

೫. ಪಞ್ಚಮಸಿಕ್ಖಾಪದಂ

೮೫೪. ಪಞ್ಚಮೇ ತೇಸನ್ತಿ ಘರಸಾಮಿಕಾನಂ. ಘರಮ್ಪೀತಿ ನ ಕೇವಲಂ ಆಸನಮೇವ, ಘರಮ್ಪಿ ಸೋಧೇಮಾತಿ ಅತ್ಥೋ. ತತೋತಿ ಪರಿವಿತಕ್ಕನತೋ, ಪರನ್ತಿ ಸಮ್ಬನ್ಧೋ.

೮೫೮. ಚೋರಾ ವಾ ಉಟ್ಠಿತಾ ಹೋನ್ತೀತಿ ಯೋಜನಾತಿ. ಪಞ್ಚಮಂ.

೬. ಛಟ್ಠಸಿಕ್ಖಾಪದಂ

೮೬೦. ಛಟ್ಠೇ ಅಭಿನಿಸೀದೇಯ್ಯಾತಿ ಏತ್ಥ ಅಭಿಸದ್ದೋ ಉಪಸಗ್ಗಮತ್ತೋವಾತಿ ದಸ್ಸೇನ್ತೋ ಆಹ ‘‘ನಿಸೀದೇಯ್ಯಾ’’ತಿ. ಏಸೇವ ನಯೋ ಅಭಿನಿಪಜ್ಜೇಯ್ಯಾತಿ ಏತ್ಥಾಪಿ. ದ್ವೇ ಆಪತ್ತಿಯೋತಿ ಸಮ್ಬನ್ಧೋತಿ. ಛಟ್ಠಂ.

೭. ಸತ್ತಮಸಿಕ್ಖಾಪದಂ

೮೬೪. ಸತ್ತಮೇ ಸಬ್ಬನ್ತಿ ಸಕಲಂ ವತ್ತಬ್ಬವಚನನ್ತಿ. ಸತ್ತಮಂ.

೮. ಅಟ್ಠಮಸಿಕ್ಖಾಪದಂ

೮೬೯. ಅಟ್ಠಮೇ ಅನುತ್ತಾನವಚನಂ ನತ್ಥೀತಿ. ಅಟ್ಠಮಂ.

೯. ನವಮಸಿಕ್ಖಾಪದಂ

೮೭೫. ನವಮೇ ಅಭಿಸಪೇಯ್ಯಾತಿ ಏತ್ಥ ಸಪಧಾತುಸ್ಸ ಅಕ್ಕೋಸನತ್ಥಂ ಅನ್ತೋಕತ್ವಾ ಕರಧಾತುಯಾ ಅತ್ಥಂ ದಸ್ಸೇನ್ತೋ ಆಹ ‘‘ಸಪಥಂ ಕರೇಯ್ಯಾ’’ತಿ. ನಿರಯೇ ನಿಬ್ಬತ್ತಾಮ್ಹೀತಿ ಅಹಂ ನಿರಯೇ ನಿಬ್ಬತ್ತಾ ಅಮ್ಹೀತಿ ಯೋಜನಾ. ನಿರಯೇ ನಿಬ್ಬತ್ತತೂತಿ ಏಸಾ ಭಿಕ್ಖುನೀ ನಿರಯೇ ನಿಬ್ಬತ್ತತೂತಿ ಯೋಜನಾ. ಈದಿಸಾ ಹೋತೂತಿ ಮಮ ಸದಿಸಾ ಹೋತೂತಿ ಅತ್ಥೋ. ಕಾಣಾತಿ ಏಕಕ್ಖಿಕಾಣಾ, ದ್ವಕ್ಖಿಕಾಣಾ ವಾ. ಕುಣೀತಿ ಹತ್ಥಪಾದಾದಿವಙ್ಕಾ.

೮೭೮. ಏದಿಸಾತಿ ವಿರೂಪಾದಿಜಾತಿಕಾ. ವಿರಮಸ್ಸೂತಿ ವಿರಮಾಹಿ. ಅದ್ಧಾತಿ ಧುವನ್ತಿ. ನವಮಂ.

೧೦. ದಸಮಸಿಕ್ಖಾಪದಂ

೮೭೯. ದಸಮೇ ಅನುತ್ತಾನಟ್ಠಾನಂ ನತ್ಥೀತಿ. ದಸಮಂ.

ಅನ್ಧಕಾರವಗ್ಗೋ ದುತಿಯೋ.