೧೧. ಏಕಾದಸಮನಿಸ್ಸಗ್ಗಿಯಪಾಚಿತ್ತಿಯಸಿಕ್ಖಾಪದಂ

೭೮೪. ಏಕಾದಸಮೇ ಗರುಪಾವುರಣಂ ನಾಮ ಸೀತಕಾಲೇ ಪಾವುರಣವತ್ಥನ್ತಿ ದಸ್ಸೇನ್ತೋ ಆಹ ‘‘ಸೀತಕಾಲೇ ಪಾವುರಣ’’ನ್ತಿ. ಸೀತಕಾಲೇ ಹಿ ಮನುಸ್ಸಾ ಥೂಲಪಾವುರಣಂ ಪಾರುಪನ್ತಿ. ‘‘ಚತುಕ್ಕಂಸಪರಮ’’ನ್ತಿ ಏತ್ಥ ಕಂಸಸದ್ದೋ ಭುಞ್ಜನಪತ್ತೇ ಚ ಸುವಣ್ಣಾದಿಲೋಹವಿಸೇಸೇ ಚ ಚತುಕಹಾಪಣೇ ಚಾತಿ ತೀಸು ಅತ್ಥೇಸು ದಿಸ್ಸತಿ, ಇಧ ಪನ ಚತುಕಹಾಪಣೇ ವತ್ತತೀತಿ ದಸ್ಸೇನ್ತೋ ಆಹ ‘‘ಕಂಸೋ ನಾಮ ಚತುಕ್ಕಹಾಪಣಿಕೋ ಹೋತೀ’’ತಿ. ಚತುಕ್ಕಂಸಸಙ್ಖಾತಂ ಪರಮಂ ಇಮಸ್ಸಾತಿ ಚತುಕ್ಕಂಸಪರಮಂ, ಸೋಳಸಕಹಾಪಣಗ್ಘನಕಂ ಪಾವುರಣನ್ತಿ ಅತ್ಥೋತಿ. ಏಕಾದಸಮಂ.