೮. ಕುಮಾರಿಭೂತವಗ್ಗೋ

೧-೨-೩. ಪಠಮ-ದುತಿಯ-ತತಿಯಸಿಕ್ಖಾಪದ-ಅತ್ಥಯೋಜನಾ

೧೧೧೯. ಕುಮಾರಿಭೂತವಗ್ಗಸ್ಸ ಪಠಮದುತಿಯತತಿಯೇಸು ಯಾ ಪನ ತಾ ಮಹಾಸಿಕ್ಖಮಾನಾತಿ ಸಮ್ಬನ್ಧೋ. ಸಬ್ಬಪಠಮಾ ದ್ವೇ ಮಹಾಸಿಕ್ಖಮಾನಾತಿ ಗಬ್ಭಿನಿವಗ್ಗೇ ಸಬ್ಬಾಸಂ ಸಿಕ್ಖಮಾನಾನಂ ಪಠಮಂ ವುತ್ತಾ ದ್ವೇ ಮಹಾಸಿಕ್ಖಮಾನಾ. ತಾ ಪನಾತಿ ಮಹಾಸಿಕ್ಖಮಾನಾ ಪನ. ಸಿಕ್ಖಮಾನಾಇಚ್ಚೇವ ವತ್ತಬ್ಬಾತಿ ಸಮ್ಮುತಿಕಮ್ಮೇಸು ಸಾಮಞ್ಞತೋ ವತ್ತಬ್ಬಾ. ‘‘ಗಿಹಿಗತಾ’’ತಿ ವಾ ‘‘ಕುಮಾರಿಭೂತಾ’’ತಿ ವಾ ನ ವತ್ತಬ್ಬಾ, ವದನ್ತಿ ಚೇ, ಸಮ್ಮುತಿಕಮ್ಮಂ ಕುಪ್ಪತೀತಿ ಅಧಿಪ್ಪಾಯೋ. ಗಿಹಿಗತಾಯಾತಿ ಏತ್ಥ ಗಿಹಿಗತಾ ನಾಮ ಪುರಿಸನ್ತರಗತಾ ವುಚ್ಚತಿ. ಸಾ ಹಿ ಯಸ್ಮಾ ಪುರಿಸಸಙ್ಖಾತೇನ ಗಿಹಿನಾ ಗಮಿಯಿತ್ಥ, ಅಜ್ಝಾಚಾರವಸೇನ, ಗಿಹಿಂ ವಾ ಗಮಿತ್ಥ, ತಸ್ಮಾ ಗಿಹಿಗತಾತಿ ವುಚ್ಚತಿ. ಅಯಂ ಸಿಕ್ಖಮಾನಾತಿ ಸಮ್ಬನ್ಧೋ. ಕುಮಾರಿಭೂತಾ ನಾಮ ಸಾಮಣೇರಾ ವುಚ್ಚತಿ. ಸಾ ಹಿ ಯಸ್ಮಾ ಅಗಿಹಿಗತತ್ತಾ ಕುಮಾರೀ ಹುತ್ವಾ ಭೂತಾ, ಕುಮಾರಿಭಾವಂ ವಾ ಭೂತಾ ಗತಾ, ತಸ್ಮಾ ಕುಮಾರಿಭೂತಾತಿ ವುಚ್ಚತಿ. ತಿಸ್ಸೋಪೀತಿ ಗಿಹಿಗತಾ ಕುಮಾರಿಭೂತಾ ಮಹಾಸಿಕ್ಖಮಾನಾತಿ ತಿಸ್ಸೋಪಿ. ಸಿಕ್ಖಮಾನಾತಿ ಸಿಕ್ಖಂ ಮಾನೇತೀತಿ ಸಿಕ್ಖಮಾನಾತಿ. ಪಠಮ ದುತಿಯ ತತಿಯಾನಿ.

೪. ಚತುತ್ಥಸಿಕ್ಖಾಪದಂ

೧೧೩೬. ಚತುತ್ಥೇ ಅನುತ್ತಾನವಚನಂ ನತ್ಥೀತಿ. ಚತುತ್ಥಂ.

೫. ಪಞ್ಚಮಸಿಕ್ಖಾಪದಂ

ಪಞ್ಚಮೇ ಏತ್ಥ ಸಿಕ್ಖಾಪದೇ ‘‘ಸಙ್ಘೇನ ಪರಿಚ್ಛಿನ್ದಿತಬ್ಬಾ’’ತಿ ಯಂ ವಚನಂ ವುತ್ತಂ, ತಸ್ಸಾತಿ ಯೋಜನಾತಿ. ಪಞ್ಚಮಂ.

೬-೭-೮. ಛಟ್ಠ-ಸತ್ತಮ-ಅಟ್ಠಮಸಿಕ್ಖಾಪದಂ

ಛಟ್ಠಸತ್ತಮಟ್ಠಮೇಸು ಅನುತ್ತಾನಟ್ಠಾನಂ ನತ್ಥೀತಿ. ಛಟ್ಠಸತ್ತಮಟ್ಠಮಾನಿ.

೯. ನವಮಸಿಕ್ಖಾಪದಂ

೧೧೫೮. ನವಮೇ ಅನ್ತೋತಿ ಅಬ್ಭನ್ತರೇ. ಇಮಿನಾ ಆತ್ಯೂಪಸಗ್ಗಸ್ಸತ್ಥಂ ದಸ್ಸೇತಿ. ‘‘ಸೋಕ’’ನ್ತಿಆದಿನಾ ಅನ್ತೋ ವಾಸೇತಿ ಪವೇಸೇತೀತಿ ಆವಾಸಾ. ಸೋಕಂ ಆವಾಸಾ ಸೋಕಾವಾಸಾತಿ ವಚನತ್ಥಂ ದಸ್ಸೇತಿ. ಘರಂ ಘರಸಾಮಿಕಾ ಆವಿಸನ್ತಿ ವಿಯ, ಏವಂ ಅಯಮ್ಪಿ ಸೋಕಂ ಆವಿಸತೀತಿ ಯೋಜನಾ. ಇತೀತಿ ಏವಂ. ಯನ್ತಿ ಸೋಕಂ. ಸ್ವಾಸ್ಸಾತಿ ಸೋ ಅಸ್ಸಾ. ಸೋತಿ ಸೋಕೋ. ಅಸ್ಸಾತಿ ಸಿಕ್ಖಮಾನಾಯ. ಆವಾಸೋತಿ ಆವಾಸೋಕಾಸೋ. ‘‘ಏದಿಸಾ ಅಯ’’ನ್ತಿ ಇಮಿನಾ ‘‘ಅಜಾನನ್ತೀ’’ತಿ ಏತ್ಥ ಅಜಾನನಾಕಾರಂ ದಸ್ಸೇತೀತಿ. ನವಮಂ.

೧೦. ದಸಮಸಿಕ್ಖಾಪದಂ

೧೧೬೨. ದಸಮೇ ಅನಾಪುಚ್ಛಾತಿ ಏತ್ಥ ತ್ವಾಪಚ್ಚಯೋ ಲೋಪೋತಿ ಆಹ ‘‘ಅನಾಪುಚ್ಛಿತ್ವಾ’’ತಿ. ದ್ವಿಕ್ಖತ್ತುನ್ತಿ ದ್ವೇ ವಾರೇ. ಸಕಿನ್ತಿ ಏಕವಾರಂ.

೧೧೬೩. ಅಪುಬ್ಬಂ ಸಮುಟ್ಠಾನಸೀಸಂ ಇಮಸ್ಸಾತಿ ಅಪುಬ್ಬಸಮುಟ್ಠಾನಸೀಸಂ. ದ್ವೀಸುಪಿ ಠಾನೇಸೂತಿ ವಾಚಾತೋ ಚ ಕಾಯವಾಚಾತೋ ಚಾತಿ ದ್ವೀಸು ಠಾನೇಸುಪಿ. ಅನನುಜಾನಾಪೇತ್ವಾತಿ ಮಾತಾಪಿತೂಹಿ ಚ ಸಾಮಿಕೇನ ಚ ನ ಅನುಜಾನಾಪೇತ್ವಾತಿ. ದಸಮಂ.

೧೧. ಏಕಾದಸಮಸಿಕ್ಖಾಪದಂ

೧೧೬೭. ಏಕಾದಸಮೇ ತತ್ಥಾತಿ ‘‘ಪಾರಿವಾಸಿಯಛನ್ದದಾನೇನಾ’’ತಿ ವಚನೇ. ಅಞ್ಞತ್ರಾತಿ ಅಞ್ಞಂ ಠಾನಂ.

ಏಕಂ ಅಜ್ಝೇಸನ್ತೀತಿ ಏಕಂ ಭಿಕ್ಖುಂ ಧಮ್ಮಕಥನತ್ಥಾಯ ನಿಯ್ಯೋಜೇನ್ತಿ. ಅಞ್ಞಂ ಪನಾತಿ ಉಪೋಸಥಿಕತೋ ಅಞ್ಞಂ ಪನ.

ತತ್ರಾತಿ ತೇಸು ಭಿಕ್ಖೂಸು. ಸುಭಾಸುಭಂ ನಕ್ಖತ್ತಂ ಪಠತೀತಿ ನಕ್ಖತ್ತಪಾಠಕೋ. ದಾರುಣನ್ತಿ ಕಕ್ಖಳಂ. ತೇತಿ ಭಿಕ್ಖೂ. ತಸ್ಸಾತಿ ನಕ್ಖತ್ತಪಾಠಕಸ್ಸ ಭಿಕ್ಖುಸ್ಸ. ‘‘ನಕ್ಖತ್ತಂ ಪಟಿಮಾನೇನ್ತಂ, ಅತ್ಥೋ ಬಾಲಂ ಉಪಚ್ಚಗಾ’’ತಿಜಾತಕಪಾಳಿ (ಜಾ. ೧.೧.೪೯). ಅಯಂ ಪನೇತ್ಥ ಯೋಜನಾ – ನಕ್ಖತ್ತಂ ಪಟಿಮಾನೇನ್ತಂ ಬಾಲಂ ಅತ್ಥೋ ಹಿತಂ ಉಪಚ್ಚಗಾ ಉಪಸಮೀಪೇ ಅತಿಕ್ಕಮಿತ್ವಾ ಅಗಾತಿ. ಏಕಾದಸಮಂ.

೧೨. ದ್ವಾದಸಮಸಿಕ್ಖಾಪದಂ

೧೧೭೦. ದ್ವಾದಸಮೇ ನಪ್ಪಹೋತೀತಿ ಭಿಕ್ಖುನಿಯೋ ನಿವಾಸಾಪೇತುಂ ನ ಸಕ್ಕೋತೀತಿ. ದ್ವಾದಸಮಂ.

೧೩. ತೇರಸಮಸಿಕ್ಖಾಪದಂ

೧೧೭೫. ತೇರಸಮೇ ಏಕಂ ವಸ್ಸನ್ತಿ ಏತ್ಥ ವಸ್ಸಸದ್ದೋ ಸಂವಚ್ಛರಪರಿಯಾಯೋ, ಉಪಯೋಗವಚನಞ್ಚ ಭುಮ್ಮತ್ಥೇ ಹೋತೀತಿ ಆಹ ‘‘ಏಕಸ್ಮಿಂ ಸಂವಚ್ಛರೇ’’ತಿ. ತೇರಸಮಂ.

ಕುಮಾರಿಭೂತವಗ್ಗೋ ಅಟ್ಠಮೋ.