೯. ಛತ್ತುಪಾಹನವಗ್ಗೋ

೧. ಪಠಮಸಿಕ್ಖಾಪದ-ಅತ್ಥಯೋಜನಾ

೧೧೮೧. ಛತ್ತವಗ್ಗಸ್ಸ ಪಠಮೇ ಕದ್ದಮಾದೀನೀತಿ ಚಿಕ್ಖಲ್ಲಾದೀನಿ. ಆದಿಸದ್ದೇನ ಉದಕಾದೀನಿ ಸಙ್ಗಣ್ಹಾತಿ. ಗಚ್ಛಾದೀನೀತಿ ಖುದ್ದಪಾದಪಾದೀನಿ. ಆದಿಸದ್ದೇನ ಅಞ್ಞಾನಿಪಿ ಛತ್ತಂ ಧಾರೇತುಂ ಅಸಕ್ಕುಣೇಯ್ಯಾನಿ ಸಮ್ಬಾಧಟ್ಠಾನಾನಿ ಸಙ್ಗಣ್ಹಾತೀತಿ. ಪಠಮಂ.

೨. ದುತಿಯಸಿಕ್ಖಾಪದಂ

೧೧೮೪. ದುತಿಯೇ ಯಾನೇನಾತಿ ಯನ್ತಿ ಇಚ್ಛಿತಟ್ಠಾನಂ ಸುಖೇನ ಗಚ್ಛನ್ತಿ ಅನೇನಾತಿ ಯಾನನ್ತಿ. ದುತಿಯಂ.

೩. ತತಿಯಸಿಕ್ಖಾಪದಂ

೧೧೯೧. ತತಿಯೇ ‘‘ವಿಪ್ಪಕಿರಿಯಿಂಸೂ’’ತಿ ಕಿರಿಯಾಪದಸ್ಸ ಕತ್ತುನಾ ಅವಿನಾಭಾವತೋ ಕತ್ತಾರಂ ದಸ್ಸೇತುಂ ವುತ್ತಂ ‘‘ಮಣಯೋ’’ತಿ. ಮಣಯೋತಿ ಚ ರತನಾನೀತಿ. ತತಿಯಂ.

೪. ಚತುತ್ಥಸಿಕ್ಖಾಪದಂ

೧೧೯೪. ಚತುತ್ಥೇ ಸೀಸೂಪಗಾದೀಸೂತಿ ಆದಿಸದ್ದೇನ ಗೀವೂಪಗಾದಯೋ ಸಙ್ಗಣ್ಹಾತಿ. ಯಂ ಯನ್ತಿ ಅಲಙ್ಕಾರನ್ತಿ. ಚತುತ್ಥಂ.

೫. ಪಞ್ಚಮಸಿಕ್ಖಾಪದಂ

೧೧೯೯. ಪಞ್ಚಮೇ ಗನ್ಧೇನ ಚಾತಿ ಗನ್ಧೇತಿ ಅತ್ತನೋ ವತ್ಥುಂ ಸೂಚೇತಿ ಪಕಾಸೇತೀತಿ ಗನ್ಧೋ. ವಣ್ಣಕೇನ ಚಾತಿ ವಿಲೇಪನೇನ ಚ. ತಞ್ಹಿ ವಣ್ಣಯತಿ ಛವಿಸೋಭಂ ಪಕಾಸೇತೀತಿ ವಣ್ಣಕನ್ತಿ ವುಚ್ಚತಿ. ಚಸದ್ದೇನ ಸಮಾಹಾರದ್ವನ್ದವಾಕ್ಯಂ ದೀಪೇತೀತಿ. ಪಞ್ಚಮಂ.

೬. ಛಟ್ಠಸಿಕ್ಖಾಪದಂ

೧೨೦೨. ಛಟ್ಠೇ ಅನುತ್ತಾನವಚನಂ ನತ್ಥೀತಿ. ಛಟ್ಠಂ.

೭. ಸತ್ತಮಸಿಕ್ಖಾಪದಂ

೧೨೦೮. ಸತ್ತಮೇ ಉಮ್ಮದ್ದನೇತಿ ಉಪ್ಪೀಳಿತ್ವಾ ಮದ್ದನೇ. ಸಂಬಾಹನೇಪೀತಿ ಪುನಪ್ಪುನಂ ಬಾಹನೇಪೀತಿ. ಸತ್ತಮಂ.

೮-೧೦. ಅಟ್ಠಮಾದಿಸಿಕ್ಖಾಪದಂ

೧೨೧೦. ಅಟ್ಠಮಾದೀಸು ತೀಸು ಅನುತ್ತಾನವಚನಂ ನತ್ಥೀತಿ. ಅಟ್ಠಮನವಮದಸಮಾನಿ.

೧೧. ಏಕಾದಸಮಸಿಕ್ಖಾಪದಂ

೧೨೧೪. ಏಕಾದಸಮೇ ಅಭಿಮುಖಮೇವಾತಿ ಅಭಿಮುಖೇ ಏವ. ಮುಖಸ್ಸ ಹಿ ಅಭಿ ಅಭಿಮುಖನ್ತಿ ವಚನತ್ಥೋ ಕಾತಬ್ಬೋ, ಸತ್ತಮಿಯಾ ಅಂಕಾರೋ. ಇಮಿನಾ ಪುರತೋತಿ ಏತ್ಥ ತೋಪಚ್ಚಯೋ ಭುಮ್ಮತ್ಥೇ ಹೋತೀತಿ ದಸ್ಸೇತಿ. ಉಪಚಾರನ್ತಿ ದ್ವಾದಸಹತ್ಥೂಪಚಾರನ್ತಿ. ಏಕಾದಸಮಂ.

೧೨. ದ್ವಾದಸಮಸಿಕ್ಖಾಪದಂ

೧೨೧೯. ದ್ವಾದಸಮೇ ‘‘ಅನೋಕಾಸಕತ’’ನ್ತಿಪದಸ್ಸ ಅಯುತ್ತಸಮಾಸಭಾವಞ್ಚ ವಿಸೇಸನಪರಪದಬಾಹಿರಸಮಾಸಭಾವಞ್ಚ ದಸ್ಸೇತುಂ ವುತ್ತಂ ‘‘ಅಕತಓಕಾಸ’’ನ್ತಿ. ಓಕಾಸೋ ನ ಕತೋ ಯೇನಾತಿ ಅನೋಕಾಸಕತೋ, ಭಿಕ್ಖು, ತಂ. ‘‘ಅನಿಯಮೇತ್ವಾ’’ತಿ ಇಮಿನಾ ‘‘ಅನೋದಿಸ್ಸಾ’’ತಿ ಪದಸ್ಸ ತ್ವಾಪಚ್ಚಯನ್ತಭಾವಂ ದಸ್ಸೇತೀತಿ. ದ್ವಾದಸಮಂ.

೧೩. ತೇರಸಮಸಿಕ್ಖಾಪದಂ

೧೨೨೬. ತೇರಸಮೇ ಉಪಚಾರೇಪೀತಿ ಅಪರಿಕ್ಖಿತ್ತಸ್ಸ ಗಾಮಸ್ಸ ಪರಿಕ್ಖೇಪಾರಹಟ್ಠಾನಸಙ್ಖಾತೇ ಉಪಚಾರೇಪಿ.

೧೨೨೭. ‘‘ಅಚ್ಛಿನ್ನಚೀವರಿಕಾಯಾ’’ತಿ ಸಾಮಞ್ಞತೋ ವುತ್ತೇಪಿ ವಿಸೇಸೋಯೇವಾಧಿಪ್ಪೇತೋತಿ ಆಹ ‘‘ಸಙ್ಕಚ್ಚಿಕಚೀವರಮೇವಾ’’ತಿ. ಸಮನ್ತತೋ ಪುರಿಸಾನಂ ದಸ್ಸನಂ ಕನ್ತೀಯತಿ ಛಿನ್ದೀಯತಿ ಏತ್ಥಾತಿ ಸಙ್ಕಚ್ಚಿ, ಅಧಕ್ಖಕಉಬ್ಭನಾಭಿಟ್ಠಾನಂ, ಸಙ್ಕಚ್ಚೇ ನಿವಸಿತಬ್ಬನ್ತಿ ಸಂಕಚ್ಚಿಕಂ, ತಮೇವ ಚೀವರನ್ತಿ ಸಙ್ಕಚ್ಚಿಕಚೀವರನ್ತಿ. ತೇರಸಮಂ.

ಛತ್ತುಪಾಹನವಗ್ಗೋ ನವಮೋ.

ಸಬ್ಬಾನೇವ ಸಿಕ್ಖಾಪದಾನೀತಿ ಸಮ್ಬನ್ಧೋ. ತತೋತಿ ತೇಹಿ ಅಟ್ಠಾಸೀತಿಸತಸಿಕ್ಖಾಪದೇಹಿ, ಅಪನೇತ್ವಾತಿ ಸಮ್ಬನ್ಧೋ.

ತತ್ರಾತಿ ತೇಸು ಖುದ್ದಕೇಸು. ಏತ್ಥಾತಿ ದಸಸು ಸಿಕ್ಖಾಪದೇಸೂತಿ.

ಭಿಕ್ಖುನಿವಿಭಙ್ಗೇ ಖುದ್ದಕವಣ್ಣನಾಯ

ಯೋಜನಾ ಸಮತ್ತಾ.

೫. ಪಾಟಿದೇಸನೀಯಸಿಕ್ಖಾಪದ-ಅತ್ಥಯೋಜನಾ

ಖುದ್ದಕಾನಂ ಅನನ್ತರಾ ಪಾಟಿದೇಸನೀಯಾ ನಾಮ ಅಟ್ಠ ಯೇ ಧಮ್ಮಾ ಸಙ್ಖೇಪೇನೇವ ಸಙ್ಗಹಂ ಆರೂಳ್ಹಾ ಸಙ್ಗೀತಿಕಾರೇಹಿ, ತೇಸಂ ಅಟ್ಠನ್ನಂ ಪಾಟಿದೇಸನೀಯನಾಮಕಾನಂ ಧಮ್ಮಾನಂ ಸಙ್ಖೇಪೇನೇವ ಏಸಾ ವಣ್ಣನಾ ಪವತ್ತತೇತಿ ಯೋಜನಾ.

೧೨೨೮. ಯಾನಿ ಸಬ್ಬಿತೇಲಾದೀನೀತಿ ಸಮ್ಬನ್ಧೋ. ಹೀತಿ ವಿತ್ಥಾರೋ. ಏತ್ಥಾತಿ ಅಟ್ಠಸು ಪಾಟಿದೇಸನೀಯೇಸು. ಪಾಳಿವಿನಿಮುತ್ತಕೇಸೂತಿ ಪಾಳಿತೋ ವಿನಿಮುತ್ತಕೇಸು. ಸಬ್ಬೇಸೂತಿ ಅಖಿಲೇಸು ಸಬ್ಬಿತೇಲಾದೀಸೂತಿ.

ಭಿಕ್ಖುನಿವಿಭಙ್ಗೇ ಪಾಟಿದೇಸನೀಯವಣ್ಣನಾಯ ಯೋಜನಾ ಸಮತ್ತಾ.

ಪನಾತಿ ಪಕ್ಖನ್ತರಜೋತಕೋ. ಯೇ ಧಮ್ಮಾ ಉದ್ದಿಟ್ಠಾತಿ ಸಮ್ಬನ್ಧೋ. ತೇಸನ್ತಿ ಪಾಟಿದೇಸನೀಯಾನಂ. ಪುನ ತೇಸನ್ತಿ ಸೇಖಿಯಅಧಿಕರಣಸಮಥಧಮ್ಮಾನಂ.

ತನ್ತಿ ಅತ್ಥವಿನಿಚ್ಛಯಂ, ವಿದೂ ವದನ್ತೀತಿ ಸಮ್ಬನ್ಧೋ. ಯಕಾರೋ ಪದಸನ್ಧಿಕರೋ. ಅಯಂ ಪನೇತ್ಥ ಯೋಜನಾ – ತೇಸಂ ಪಾಟಿದೇಸನೀಯಾನಂ ಅನನ್ತರಾ ಯೇ ಚ ಸೇಖಿಯಾ ಪಞ್ಚಸತ್ತತಿ ಯೇ ಚ ಧಮ್ಮಾ, ಚಸದ್ದೋ ಲುತ್ತನಿದ್ದಿಟ್ಠೋ, ಅಧಿಕರಣವ್ಹಯಾ ಅಧಿಕರಣಸಮಥನಾಮಕಾ ಸತ್ತ ಯೇ ಚ ಧಮ್ಮಾ ಭಗವತಾ ಉದ್ದಿಟ್ಠಾ, ತೇಸಂ ಸೇಖಿಯಅಧಿಕರಣಸಮಥಧಮ್ಮಾನಂ ಯೋ ಅತ್ಥವಿನಿಚ್ಛಯೋ ವಿಭಙ್ಗೇ ಮಯಾ ವುತ್ತೋ, ತಾದಿಸಮೇವ ತಂ ಅತ್ಥವಿನಿಚ್ಛಯಂ ಭಿಕ್ಖುನೀನಂ ವಿಭಙ್ಗೇಪಿ ವಿದೂ ವದನ್ತಿ ಯಸ್ಮಾ, ತಸ್ಮಾ ತೇಸಂ ಧಮ್ಮಾನಂ ಸೇಖಿಯಅಧಿಕರಣಸಮಥಧಮ್ಮಾನಂ ಯಾ ಅತ್ಥವಣ್ಣನಾ ತತ್ಥ ಮಹಾವಿಭಙ್ಗೇ ವಿಸುಂ ಮಯಾ ನ ವುತ್ತಾ. ಇಮಾ ಅತ್ಥವಣ್ಣನಾ ಇಧಾಪಿ ಭಿಕ್ಖುನೀನಂ ವಿಭಙ್ಗೇಪಿ, ಪಿಸದ್ದೋ ಲುತ್ತನಿದ್ದಿಟ್ಠೋ, ಮಯಾ ನ ವುತ್ತಾಯೇವಾತಿ. ನಕಾರೋ ದ್ವೀಸು ಕಿರಿಯಾಸು ಯೋಜೇತಬ್ಬೋ.

‘‘ಸಬ್ಬಾಸವಪಹಂ ಮಗ್ಗಂ, ಪುಞ್ಞಕಮ್ಮೇನ ಚಿಮಿನಾ;

ಉಪ್ಪಾದೇತ್ವಾ ಸಸನ್ತಾನೇ, ಸತ್ತಾ ಪಸ್ಸನ್ತು ನಿಬ್ಬುತಿ’’ನ್ತಿ.

ಅಯಂ ಗಾಥಾ ಏತರಹಿ ಪೋತ್ಥಕೇಸು ನತ್ಥಿ, ಟೀಕಾಸು ಪನ ಅತ್ಥಿ. ತಸ್ಮಾ ಏವಮೇತ್ಥ ಯೋಜನಾ ವೇದಿತಬ್ಬಾ – ಇಮಿನಾ ಪುಞ್ಞಕಮ್ಮೇನ ಚ ವಿಭಙ್ಗವಣ್ಣನಾಯ ಕತೇನ ಇಮಿನಾ ಪುಞ್ಞಕಮ್ಮೇನ ಚ ಅಞ್ಞೇನ ಪುಞ್ಞಕಮ್ಮೇನ ಚ. ಚಸದ್ದೋ ಹಿ ಅವುತ್ತಸಮ್ಪಿಣ್ಡನತ್ಥೋ. ಸತ್ತಾ ಸಬ್ಬೇ ಸತ್ತಾ ಸಬ್ಬಾಸವಪಹಂ ಸಬ್ಬೇಸಂ ಆಸವಾನಂ ವಿಘಾತಕಂ ಮಗ್ಗಂ ಅರಹತ್ತಮಗ್ಗಂ ಸಸನ್ತಾನೇ ಅತ್ತನೋ ನಿಯಕಜ್ಝತ್ತೇ ಉಪ್ಪಾದೇತ್ವಾ ಜನೇತ್ವಾ ನಿಬ್ಬುತಿಂ ಖನ್ಧಪರಿನಿಬ್ಬಾನಂ ಞಾಣಾಲೋಚನೇನ ಪಸ್ಸನ್ತೂತಿ.

ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ

ಭಿಕ್ಖುನಿವಿಭಙ್ಗವಣ್ಣನಾಯ

ಯೋಜನಾ ಸಮತ್ತಾ.

ಜಾದಿಲಞ್ಛಿತನಾಮೇನ, ನೇಕಾನಂ ವಾಚಿತೋ ಮಯಾ;

ಭಿಕ್ಖುನೀನಂ ವಿಭಙ್ಗಸ್ಸ, ಸಮತ್ತೋ ಯೋಜನಾನಯೋತಿ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ