೨. ದುತಿಯಪಾರಾಜಿಕಸಿಕ್ಖಾಪದಂ

೬೬೪. ದುತಿಯೇ ಕಚ್ಚಿ ನೋ ಸಾತಿ ಏತ್ಥ ನೋಸದ್ದೋ ನುಸದ್ದತ್ಥೋತಿ ಆಹ ‘‘ಕಚ್ಚಿ ನು ಸಾ’’ತಿ. ಪರಿವಾರವಿಪತ್ತೀತಿ ಪರಿಜನಸ್ಸ ವಿನಾಸನಂ. ‘‘ಅಕಿತ್ತೀ’’ತಿ ಏತ್ಥ ಸಮ್ಮುಖಾ ನಿನ್ದಂ ಗಹೇತ್ವಾ ‘‘ಅಯಸೋ’’ತಿಇಮಿನಾ ಪರಮ್ಮುಖಾ ನಿನ್ದಾ ಗಹೇತಬ್ಬಾತಿ ದಸ್ಸೇತುಂ ವುತ್ತಂ ‘‘ಪರಮ್ಮುಖಗರಹಾ ವಾ’’ತಿ.

೬೬೬. ‘‘ಯಾ ಪಾರಾಜಿಕಂ ಆಪನ್ನಾ’’ತಿಇಮಿನಾ ‘‘ಸಾ ವಾ’’ತಿ ಏತ್ಥ ತಸದ್ದಸ್ಸ ವಿಸಯಂ ದಸ್ಸೇತಿ. ಚತುನ್ನನ್ತಿ ನಿದ್ಧಾರಣತ್ಥೇ ಚೇತಂ ಸಾಮಿವಚನಂ, ಚತೂಸೂತಿ ಅತ್ಥೋ. ಪಚ್ಛಾತಿ ಸಬ್ಬಪಾರಾಜಿಕಾನಂ ಪಚ್ಛಾ. ಇಮಸ್ಮಿಂ ಓಕಾಸೇತಿ ಪಠಮತತಿಯಪಾರಾಜಿಕಾನಮನ್ತರೇ ಠಾನೇ. ಠಪಿತನ್ತಿ ಸಙ್ಗೀತಿಕಾರೇಹಿ ನಿಕ್ಖಿತ್ತಂ. ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ. ತತ್ರಾತಿ ದುಟ್ಠುಲ್ಲಸಿಕ್ಖಾಪದೇತಿ. ದುತಿಯಂ.