೫. ಪಕಿಣ್ಣಕನಿದ್ದೇಸೋ

೫೩. ಸಙ್ಘಿಕಂ ಗರುಭಣ್ಡಂ ಯೋ, ದೇತಿ ಅಞ್ಞಸ್ಸ ಇಸ್ಸರೋ;

ಥುಲ್ಲಚ್ಚಯಂ ಯಥಾವತ್ಥುಂ, ಥೇಯ್ಯಾ ಪಾರಾಜಿಕಾದಿಪಿ.

೫೪. ಕುಸಾದಿಮಯಚೀರಾನಿ, ಕಮ್ಬಲಂ ಕೇಸವಾಲಜಂ;

ಸಮಯಂ ವಿನಾ ಧಾರಯತೋ, ಲೂಕಪಕ್ಖಾಜಿನಕ್ಖಿಪಂ.

೫೫. ಸತ್ಥಕಮ್ಮೇ ವತ್ಥಿಕಮ್ಮೇ, ಸಂ ನಿಮಿತ್ತಞ್ಚ ಛಿನ್ದತೋ;

ಥುಲ್ಲಚ್ಚಯಂ ಮನುಸ್ಸಾನಂ, ಮಂಸಾದಿಭೋಜನೇಪಿ ವಾ.

೫೬. ಕದಲೇರಕಕ್ಕದುಸ್ಸಾನಿ, ಪೋತ್ಥಕಂ ಸಬ್ಬನೀಲಕಂ;

ಸಬ್ಬಪೀತಾದಿಕಞ್ಚಾಪಿ, ಧಾರಯನ್ತಸ್ಸ ದುಕ್ಕಟಂ.

೫೭. ಹತ್ಥಿಸ್ಸುರಗಸೋಣಾನಂ, ಸೀಹಬ್ಯಗ್ಘಚ್ಛದೀಪಿನಂ;

ತರಚ್ಛಸ್ಸ ಚ ಮಂಸಾದಿಂ, ಉದ್ದಿಸ್ಸಕತಕಮ್ಪಿ ಚ.

೫೮. ಅನಾಪುಚ್ಛಿತಮಂಸಞ್ಚ, ಭುಞ್ಜತೋ ದುಕ್ಕಟಂ ಸಿಯಾ;

ಯಾತಾನುಪುಬ್ಬಂ ಹಿತ್ವಾನ, ದಕತಿತ್ಥಾದಿಕಂ ವಜೇ.

೫೯. ಸಹಸಾ ವುಬ್ಭಜಿತ್ವಾನ, ಪವಿಸೇ ನಿಕ್ಖಮೇಯ್ಯ ವಾ;

ವಚ್ಚಪಸ್ಸಾವಕುಟಿಕಂ, ವಿನಾ ಉಕ್ಕಾಸಿಕಂ ವಿಸೇ.

೬೦. ನಿತ್ಥುನನ್ತೋ ಕರೇ ವಚ್ಚಂ, ದನ್ತಕಟ್ಠಞ್ಚ ಖಾದಯಂ;

ವಚ್ಚಪಸ್ಸಾವದೋಣೀನಂ, ಬಹಿ ವಚ್ಚಾದಿಕಂ ಕರೇ.

೬೧. ಖರೇನ ಚಾವಲೇಖೇಯ್ಯ, ಕಟ್ಠಂ ಪಾತೇಯ್ಯ ಕೂಪಕೇ;

ಊಹತಞ್ಚ ನ ಧೋವೇಯ್ಯ, ಉಕ್ಲಾಪಞ್ಚ ನ ಸೋಧಯೇ.

೬೨. ದಕಕಿಚ್ಚಂ ಕರೋನ್ತಸ್ಸ, ಕತ್ವಾ ‘‘ಚಪುಚಪೂ’’ತಿ ಚ;

ಅನಜ್ಝಿಟ್ಠೋವ ಥೇರೇನ, ಪಾತಿಮೋಕ್ಖಮ್ಪಿ ಉದ್ದಿಸೇ.

೬೩. ಅನಾಪುಚ್ಛಾಯ ಪಞ್ಹಸ್ಸ, ಕಥನೇ ವಿಸ್ಸಜ್ಜನೇಪಿ ಚ;

ಸಜ್ಝಾಯಕರಣೇ ದೀಪ-ಜಾಲನೇ ವಿಜ್ಝಾಪನೇಪಿ ಚ.

೬೪. ವಾತಪಾನಕವಾಟಾನಿ, ವಿವರೇಯ್ಯ ಥಕೇಯ್ಯ ವಾ;

ವನ್ದನಾದಿಂ ಕರೇ ನಗ್ಗೋ, ಗಮನಂ ಭೋಜನಾದಿಕಂ.

೬೫. ಪರಿಕಮ್ಮಂ ಕರೇ ಕಾರೇ, ತಿಪಟಿಚ್ಛನ್ನಕಂ ವಿನಾ;

ಕಾಯಂ ನಹಾಯಂ ಘಂಸೇಯ್ಯ, ಕುಟ್ಟೇ ಥಮ್ಭೇ ತರುಮ್ಹಿ ವಾ.

೬೬. ಕುರುವಿನ್ದಕಸುತ್ತೇನ, ಅಞ್ಞಮಞ್ಞಸ್ಸ ಕಾಯತೋ;

ಅಗಿಲಾನೋ ಬಹಾರಾಮೇ, ಚರೇಯ್ಯ ಸಉಪಾಹನೋ.

೬೭. ಉಪಾಹನಂ ಯೋ ಧಾರೇತಿ, ಸಬ್ಬನೀಲಾದಿಕಮ್ಪಿ ಚ;

ನಿಮಿತ್ತಂ ಇತ್ಥಿಯಾ ರತ್ತೋ, ಮುಖಂ ವಾ ಭಿಕ್ಖದಾಯಿಯಾ.

೬೮. ಉಜ್ಝಾನಸಞ್ಞೀ ಅಞ್ಞಸ್ಸ, ಪತ್ತಂ ವಾ ಅತ್ತನೋ ಮುಖಂ;

ಆದಾಸಾದಿಮ್ಹಿ ಪಸ್ಸೇಯ್ಯ, ಉಚ್ಚಾಸನಮಹಾಸನೇ.

೬೯. ನಿಸಜ್ಜಾದಿಂ ಕರೋನ್ತಸ್ಸ, ದುಕ್ಕಟಂ ವನ್ದನೇಪಿ ಚ;

ಉಕ್ಖಿತ್ತಾನುಪಸಮ್ಪನ್ನ-ನಾನಾಸಂವಾಸಕಾದಿನಂ.

೭೦. ಏಕತೋ ಪಣ್ಡಕಿತ್ಥೀಹಿ, ಉಭತೋಬ್ಯಞ್ಜನೇನ ವಾ;

ದೀಘಾಸನೇ ನಿಸೀದೇಯ್ಯ, ಅದೀಘೇ ಆಸನೇ ಪನ.

೭೧. ಅಸಮಾನಾಸನಿಕೇನ, ಮಞ್ಚಪೀಠೇ ಸಯೇಯ್ಯ ವಾ;

ಕುಲಸಙ್ಗಹತ್ಥಂ ದದತೋ, ಫಲಪುಪ್ಫಾದಿಕಮ್ಪಿ ಚ.

೭೨. ಗನ್ಥಿಮಾದಿಂ ಕರೇ ಕಾರೇ, ಜಿನವಾರಿತಪಚ್ಚಯೇ;

ಪರಿಭುಞ್ಜೇಯ್ಯ ಅಬ್ಯತ್ತೋ, ಅನಿಸ್ಸಾಯ ವಸೇಯ್ಯ ವಾ.

೭೩. ಅನುಞ್ಞಾತೇಹಿ ಅಞ್ಞಸ್ಸ, ಭೇಸಜ್ಜಂ ವಾ ಕರೇ ವದೇ;

ಕರೇ ಸಾಪತ್ತಿಕೋ ಭಿಕ್ಖು, ಉಪೋಸಥಪ್ಪವಾರಣಂ.

೭೪. ದ್ವಾರಬನ್ಧಾದಿಕೇ ಠಾನೇ, ಪರಿವತ್ತಕವಾಟಕಂ;

ಅಪಿಧಾಯ ವಿನಾಭೋಗಂ, ನಿಯೋಗಂ ವಾ ಸಯೇ ದಿವಾ.

೭೫. ಧಞ್ಞಿತ್ಥಿರೂಪರತನಂ, ಆವುಧಿತ್ಥಿಪಸಾಧನಂ;

ತೂರಿಯಭಣ್ಡಂ ಫಲಂ ರುಕ್ಖೇ, ಪುಬ್ಬಣ್ಣಾದಿಞ್ಚ ಆಮಸೇ.

೭೬. ಸಸಿತ್ಥೋದಕತೇಲೇಹಿ, ಫಣಹತ್ಥಫಣೇಹಿ ವಾ;

ಕೇಸಮೋಸಣ್ಠನೇಕಸ್ಮಿಂ, ಭಾಜನೇ ಭೋಜನೇಪಿ ಚ.

೭೭. ಏಕತ್ಥರಣಪಾವುರಣಾ, ಸಯೇಯ್ಯುಂ ದ್ವೇಕಮಞ್ಚಕೇ;

ದನ್ತಕಟ್ಠಞ್ಚ ಖಾದೇಯ್ಯ, ಅಧಿಕೂನಂ ಪಮಾಣತೋ.

೭೮. ಯೋಜೇತಿ ವಾ ಯೋಜಾಪೇತಿ, ನಚ್ಚಂ ಗೀತಞ್ಚ ವಾದಿತಂ;

ದಸ್ಸನಂ ಸವನಂ ತೇಸಂ, ಕರೋನ್ತಸ್ಸ ಚ ದುಕ್ಕಟಂ.

೭೯. ವೀಹಾದಿರೋಪಿಮೇ ಚಾಪಿ, ಬಹಿಪಾಕಾರಕುಟ್ಟಕೇ;

ವಚ್ಚಾದಿಛಡ್ಡನಾದಿಮ್ಹಿ, ದೀಘಕೇಸಾದಿಧಾರಣೇ.

೮೦. ನಖಮಟ್ಠಕರಣಾದಿಮ್ಹಿ, ಸಮ್ಬಾಧೇ ಲೋಮಹಾರಣೇ;

ಪರಿಕಮ್ಮಕತಂ ಭೂಮಿಂ, ಅಕ್ಕಮೇ ಸಉಪಾಹನೋ.

೮೧. ಅಧೋತಅಲ್ಲಪಾದೇಹಿ, ಸಙ್ಘಿಕಂ ಮಞ್ಚಪೀಠಕಂ;

ಪರಿಕಮ್ಮಕತಂ ಭಿತ್ತಿಂ, ಆಮಸನ್ತಸ್ಸ ದುಕ್ಕಟಂ.

೮೨. ಸಙ್ಘಾಟಿಯಾಪಿ ಪಲ್ಲತ್ಥೇ, ದುಪ್ಪರಿಭುಞ್ಜೇಯ್ಯ ಚೀವರಂ;

ಅಕಾಯಬನ್ಧನೋ ಗಾಮಂ, ವಜೇ ಕತ್ವಾನ ವಚ್ಚಕಂ.

೮೩. ನಾಚಮೇಯ್ಯ ದಕೇ ಸನ್ತೇ, ಸಮಾದೇಯ್ಯ ಅಕಪ್ಪಿಯೇ;

ದೇಸನಾರೋಚನಾದಿಮ್ಹಿ, ಸಭಾಗಾಪತ್ತಿಯಾಪಿ ಚ.

೮೪. ನ ವಸೇ ವಸ್ಸಂ ವಿಸಂವಾದೇ, ಸುದ್ಧಚಿತ್ತೇ ಪಟಿಸ್ಸವಂ;

ವಸ್ಸಂ ವಸಿತ್ವಾ ಗಮನೇ, ಅನನುಞ್ಞಾತಕಿಚ್ಚತೋ.

೮೫. ವಿನಾಪದಂ ತರುಸ್ಸುದ್ಧಂ, ಪೋರಿಸಮ್ಹಾಭಿರೂಹಣೇ;

ಅಪರಿಸ್ಸಾವನೋದ್ಧಾನಂ, ವಜೇ ತಂ ಯಾಚತೋ ನ ದೇ.

೮೬. ಅತ್ತನೋ ಘಾತನೇ ಇತ್ಥಿ-ರೂಪಾದಿಂ ಕಾರಯೇಯ್ಯ ವಾ;

ಹಿತ್ವಾ ಮಾಲಾದಿಕಂ ಚಿತ್ತಂ, ಜಾತಕಾದಿಂ ಸಯಂ ಕರೇ.

೮೭. ಭುಞ್ಜನ್ತಮುಟ್ಠಪೇ ತಸ್ಸ, ಸಾಲಾದೀಸು ನಿಸೀದತೋ;

ವುಡ್ಢಾನಂ ಪನ ಓಕಾಸಂ, ಅದತ್ವಾ ವಾಪಿ ದುಕ್ಕಟಂ.

೮೮. ಯಾನಾದಿಮಭಿರೂಹೇಯ್ಯ, ಕಲ್ಲಕೋ ರತನತ್ತಯಂ;

ಆರಬ್ಭ ವದೇ ದವಞ್ಞ-ಪರಿಸಾಯೋಪಲಾಲನೇ.

೮೯. ಕಾಯಾದಿಂ ವಿವರಿತ್ವಾನ, ಭಿಕ್ಖುನೀನಂ ನ ದಸ್ಸಯೇ;

ವಾಚೇ ಲೋಕಾಯತಂ ಪಲಿತಂ, ಗಣ್ಹೇಯ್ಯ ಗಣ್ಹಾಪೇಯ್ಯ ವಾ.

೯೦. ಯತ್ಥ ಕತ್ಥಚಿ ಪೇಳಾಯಂ, ಭುಞ್ಜತೋ ಪತ್ತಹತ್ಥಕೋ;

ವಾತಪಾನಕವಾಟಂ ವಾ, ಪಣಾಮೇ ಸೋದಕಮ್ಪಿ ಚ.

೯೧. ಉಣ್ಹೇಯ್ಯ ಪಟಿಸಾಮೇಯ್ಯ, ಅತಿಉಣ್ಹೇಯ್ಯ ವೋದಕಂ;

ಠಪೇಯ್ಯ ಭೂಮಿಯಂ ಪತ್ತಂ, ಅಙ್ಕೇ ವಾ ಮಞ್ಚಪೀಠಕೇ.

೯೨. ಮಿಡ್ಢನ್ತೇ ಪರಿಭಣ್ಡನ್ತೇ, ಪಾದೇ ಛತ್ತೇ ಠಪೇತಿ ವಾ;

ಚಲಕಾದಿಂ ಠಪೇ ಪತ್ತಂ, ಪತ್ತೇ ವಾ ಹತ್ಥಧೋವನೇ.

೯೩. ಪತ್ತೇನ ನೀಹರನ್ತಸ್ಸ, ಉಚ್ಛಿಟ್ಠಮುದಕಮ್ಪಿ ಚ;

ಅಕಪ್ಪಿಯಮ್ಪಿ ಪತ್ತಂ ವಾ, ಪರಿಭುಞ್ಜೇಯ್ಯ ದುಕ್ಕಟಂ.

೯೪. ವದೇ ‘‘ಜೀವಾ’’ತಿ ಖಿಪಿತೇ, ನ ಸಿಕ್ಖತಿ ಅನಾದರೋ;

ಪರಿಮಣ್ಡಲಕಾದಿಮ್ಹಿ, ಸೇಖಿಯೇ ದುಕ್ಕಟಂ ಸಿಯಾ.

೯೫. ಯೋ ಭಣ್ಡಗಾರೇ ಪಯುತೋವ ಭಣ್ಡಕಂ,

ಮಾತೂನ ಪಾಚಿತ್ತಿಯಮಸ್ಸ ಗೋಪಯೇ;

ದವಾಯ ಹೀನೇನಪಿ ಜಾತಿಆದಿನಾ,

ವದೇಯ್ಯ ದುಬ್ಭಾಸಿತಮುತ್ತಮಮ್ಪಿ ಯೋತಿ.