ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಖುದ್ದಸಿಕ್ಖಾ-ಮೂಲಸಿಕ್ಖಾ

ಖುದ್ದಸಿಕ್ಖಾ

ಗನ್ಥಾರಮ್ಭಕಥಾ

(ಕ)

ಆದಿತೋ ಉಪಸಮ್ಪನ್ನ-ಸಿಕ್ಖಿತಬ್ಬಂ ಸಮಾತಿಕಂ;

ಖುದ್ದಸಿಕ್ಖಂ ಪವಕ್ಖಾಮಿ, ವನ್ದಿತ್ವಾ ರತನತ್ತಯಂ.

ತತ್ರಾಯಂ ಮಾತಿಕಾ –

(ಖ)

ಪಾರಾಜಿಕಾ ಚ ಚತ್ತಾರೋ, ಗರುಕಾ ನವ ಚೀವರಂ;

ರಜನಾನಿ ಚ ಪತ್ತೋ ಚ, ಥಾಲಕಾ ಚ ಪವಾರಣಾ.

(ಗ)

ಕಾಲಿಕಾ ಚ ಪಟಿಗ್ಗಾಹೋ, ಮಂಸೇಸು ಚ ಅಕಪ್ಪಿಯಂ;

ನಿಸ್ಸಗ್ಗಿಯಾನಿ ಪಾಚಿತ್ತಿ, ಸಮಣಕಪ್ಪ ಭೂಮಿಯೋ.

(ಘ)

ಉಪಜ್ಝಾಚರಿಯವತ್ತಾನಿ, ವಚ್ಚಪ್ಪಸ್ಸಾವಠಾನಿಕಂ;

ಆಪುಚ್ಛಕರಣಂ ನಗ್ಗೋ, ನ್ಹಾನಕಪ್ಪೋ ಅವನ್ದಿಯೋ.

(ಙ)

ಚಮ್ಮಂ ಉಪಾಹನಾ ಚೇವ, ಅನೋಲೋಕಿಯಮಞ್ಜನೀ;

ಅಕಪ್ಪಿಯಸಯನಾನಿ, ಸಮಾನಾಸನಿಕೋಪಿ ಚ.

(ಚ)

ಅಸಂವಾಸಿಕೋ ಚ ಕಮ್ಮಂ, ಮಿಚ್ಛಾಜೀವವಿವಜ್ಜನಾ;

ವತ್ತಂ ವಿಕಪ್ಪನಾ ಚೇವ, ನಿಸ್ಸಯೋ ಕಾಯಬನ್ಧನಂ.

(ಛ)

ಪಥವೀ ಚ ಪರಿಕ್ಖಾರೋ, ಭೇಸಜ್ಜುಗ್ಗಹದೂಸನಂ;

ವಸ್ಸೂಪನಾಯಿಕಾ ಚೇವಾವೇಭಙ್ಗಿಯಂ ಪಕಿಣ್ಣಕಂ.

(ಜ)

ದೇಸನಾ ಛನ್ದದಾನಾದಿ, ಉಪೋಸಥಪ್ಪವಾರಣಾ;

ಸಂವರೋ ಸುದ್ಧಿ ಸನ್ತೋಸೋ, ಚತುರಕ್ಖಾ ವಿಪಸ್ಸನಾತಿ.

೧. ಪಾರಾಜಿಕನಿದ್ದೇಸೋ

ಪಾರಾಜಿಕಾ ಚ ಚತ್ತಾರೋತಿ –

೧. ಮಗ್ಗತ್ತಯೇ ಅನಿಕ್ಖಿತ್ತಸಿಕ್ಖೋ ಸನ್ಥತಸನ್ಥತೇ;

ಅಲ್ಲೋಕಾಸೇ ನಿಮಿತ್ತಂ ಸಂ, ತಿಲಮತ್ತಮ್ಪಿ ಸನ್ಥತಂ.

೨. ಅಸನ್ಥತಮುಪಾದಿಣ್ಣಂ, ಪವೇಸನ್ತೋ ಚುತೋಥ ವಾ;

ಪವೇಸನಟ್ಠಿತುದ್ಧಾರಪವಿಟ್ಠಕ್ಖಣಸಾದಕೋ.

೩. ಆದಿಯೇಯ್ಯ ಹರೇಯ್ಯಾವಹರೇಯ್ಯ ಇರಿಯಾಪಥಂ;

ಕೋಪೇಯ್ಯ ಠಾನಾ ಚಾವೇಯ್ಯ, ಸಙ್ಕೇತಂ ವೀತಿನಾಮಯೇ.

೪. ಅದಿನ್ನಂ ಥೇಯ್ಯಚಿತ್ತೇನ, ಭವೇ ಪಾರಾಜಿಕೋಥ ವಾ;

ಥೇಯ್ಯಾಬಲಕುಸಚ್ಛನ್ನಪರಿಕಪ್ಪಾವಹಾರಕೋ;

ಭಣ್ಡಕಾಲಗ್ಘದೇಸೇಹಿ, ಪರಿಭೋಗೇತ್ಥ ನಿಚ್ಛಯೋ.

೫. ಮನುಸ್ಸವಿಗ್ಗಹಂ ಚಿಚ್ಚ, ಜೀವಿತಾ ವಾ ವಿಯೋಜಯೇ;

ಸತ್ಥಹಾರಕಂ ವಾಸ್ಸ ಮರಣಚೇತನೋ ಉಪನಿಕ್ಖಿಪೇ.

೬. ಗಾಹೇಯ್ಯ ಮರಣೂಪಾಯಂ, ವದೇಯ್ಯ ಮರಣೇ ಗುಣಂ;

ಚುತೋ ಪಯೋಗಾ ಸಾಹತ್ಥಿನಿಸ್ಸಗ್ಗಾಣತ್ತಿಥಾವರಾ.

೭. ಇದ್ಧಿವಿಜ್ಜಾಮಯಾ ಕಾಲವತ್ಥಾವುಧಿರಿಯಾಪಥಾ;

ಕ್ರಿಯಾವಿಸೇಸೋ ಓಕಾಸೋ, ಛ ಆಣತ್ತಿನಿಯಾಮಕಾ.

೮. ಝಾನಾದಿಭೇದ ನೋಸನ್ತಮತ್ತನತ್ತುಪನಾಯಿಕಂ;

ಕತ್ವಾ ಕೋಟ್ಠಾಸಮೇಕೇಕಂ, ಪಚ್ಚುಪ್ಪನ್ನಭವಸ್ಸಿತಂ.

೯. ಅಞ್ಞಾಪದೇಸರಹಿತಂ, ದೀಪೇನ್ತೋನಧಿಮಾನಿಕೋ;

ಕಾಯೇನ ವಾಚಾ ವಿಞ್ಞತ್ತಿ-ಪಥೇ ಞಾತೇ ಚುತೋ ಭವೇ.

೧೦. ಪಾರಾಜಿಕೇತೇ ಚತ್ತಾರೋ, ಅಸಂವಾಸಾ ಯಥಾ ಪುರೇ;

ಅಭಬ್ಬಾ ಭಿಕ್ಖುಭಾವಾಯ, ಸೀಸಚ್ಛಿನ್ನೋವ ಜೀವಿತುಂ.

೧೧. ಪರಿಯಾಯೋ ಚ ಆಣತ್ತಿ, ತತಿಯೇ ದುತಿಯೇ ಪನ;

ಆಣತ್ತಿಯೇವ ಸೇಸೇಸು, ದ್ವಯಮೇತಂ ನ ಲಬ್ಭತಿ.

೧೨. ಸೇವೇತುಕಾಮತಾಚಿತ್ತಂ, ಮಗ್ಗೇ ಮಗ್ಗಪ್ಪವೇಸನಂ;

ಇಮಂ ಮೇಥುನಧಮ್ಮಸ್ಸ, ಆಹು ಅಙ್ಗದ್ವಯಂ ಬುಧಾ.

೧೩. ಮನುಸ್ಸಸಂ ತಥಾಸಞ್ಞೀ, ಥೇಯ್ಯಚಿತ್ತಞ್ಚ ವತ್ಥುನೋ;

ಗರುತಾ ಅವಹಾರೋ ಚ, ಅದಿನ್ನಾದಾನಹೇತುಯೋ.

೧೪. ಪಾಣೋ ಮಾನುಸ್ಸಕೋ ಪಾಣ-ಸಞ್ಞಿತಾ ಘಾತಚೇತನಾ;

ಪಯೋಗೋ ತೇನ ಮರಣಂ, ಪಞ್ಚೇತೇ ವಧಹೇತುಯೋ.

೧೫. ಅಸನ್ತತಾ ಅತ್ತನಿ ಪಾಪಮಿಚ್ಛತಾ-

ಯಾರೋಚನಾ ತಸ್ಸ ಮನುಸ್ಸಜಾತಿತಾ;

ನಾಞ್ಞಾಪದೇಸೋ ಚ ತದೇವ ಜಾನನಂ,

ಪಞ್ಚೇತ್ಥ ಅಙ್ಗಾನಿ ಅಸನ್ತದೀಪನೇ.

೧೬. ಅಸಾಧಾರಣಾ ಚತ್ತಾರೋ, ಭಿಕ್ಖುನೀನಮಭಬ್ಬಕಾ;

ಏಕಾದಸ ಚ ವಿಬ್ಭನ್ತಾ, ಭಿಕ್ಖುನೀ ಮುದುಪಿಟ್ಠಿಕೋ.

೧೭. ಲಮ್ಬೀ ಮುಖೇನ ಗಣ್ಹನ್ತೋ, ಅಙ್ಗಜಾತಂ ಪರಸ್ಸ ಚ;

ತತ್ಥೇವಾಭಿನಿಸೀದನ್ತೋ, ಚತ್ತಾರೋ ಅನುಲೋಮಿಕಾ.

೧೮. ಮಗ್ಗೇ ಮಗ್ಗಪ್ಪವೇಸನಾ, ಮೇಥುನಸ್ಸ ಇಧಾಗತಾ;

ಚತ್ತಾರೋತಿ ಚತುಬ್ಬೀಸ, ಸಮೋಧಾನಾ ಪರಾಜಿಕಾತಿ.

೨. ಸಙ್ಘಾದಿಸೇಸನಿದ್ದೇಸೋ

ಗರುಕಾ ನವಾತಿ –

೧೯. ಮೋಚೇತುಕಾಮತಾ ಸುಕ್ಕ-ಸ್ಸುಪಕ್ಕಮ್ಮ ವಿಮೋಚಯಂ;

ಅಞ್ಞತ್ರ ಸುಪಿನನ್ತೇನ, ಸಮಣೋ ಗರುಕಂ ಫುಸೇ.

೨೦. ಇತ್ಥಿಸಞ್ಞೀ ಮನುಸ್ಸಿತ್ಥಿಂ, ಕಾಯಸಂಸಗ್ಗರಾಗವಾ;

ಸಮ್ಫುಸನ್ತೋ ಉಪಕ್ಕಮ್ಮ, ಸಮಣೋ ಗರುಕಂ ಫುಸೇ.

೨೧. ತಥಾ ಸುಣನ್ತಿಂ ವಿಞ್ಞುಞ್ಚ, ಮಗ್ಗಂ ವಾರಬ್ಭ ಮೇಥುನಂ;

ದುಟ್ಠುಲ್ಲವಾಚಾರಾಗೇನ, ಓಭಾಸೇತ್ವಾ ಗರುಂ ಫುಸೇ.

೨೨. ವತ್ವಾತ್ತಕಾಮುಪಟ್ಠಾನ-ವಣ್ಣಂ ಮೇಥುನರಾಗಿನೋ;

ವಾಚಾ ಮೇಥುನಯುತ್ತೇನ, ಗರುಂ ಮೇಥುನಯಾಚನೇ.

೨೩. ಪಟಿಗ್ಗಹೇತ್ವಾ ಸನ್ದೇಸಂ, ಇತ್ಥಿಯಾ ಪುರಿಸಸ್ಸ ವಾ;

ವೀಮಂಸಿತ್ವಾ ಹರಂ ಪಚ್ಚಾ, ಸಮಣೋ ಗರುಕಂ ಫುಸೇ.

೨೪. ಸಂಯಾಚಿತಪರಿಕ್ಖಾರಂ, ಕತ್ವಾದೇಸಿತವತ್ಥುಕಂ;

ಕುಟಿಂ ಪಮಾಣಾತಿಕ್ಕನ್ತಂ, ಅತ್ತುದ್ದೇಸಂ ಗರುಂ ಫುಸೇ.

೨೫. ಮಹಲ್ಲಕಂ ವಿಹಾರಂ ವಾ, ಕತ್ವಾದೇಸಿತವತ್ಥುಕಂ;

ಅತ್ತನೋ ವಸನತ್ಥಾಯ, ಸಮಣೋ ಗರುಕಂ ಫುಸೇ.

೨೬. ಅಮೂಲಕೇನ ಚೋದೇನ್ತೋ, ಚೋದಾಪೇನ್ತೋವ ವತ್ಥುನಾ;

ಅನ್ತಿಮೇನ ಚ ಚಾವೇತುಂ, ಸುಣಮಾನಂ ಗರುಂ ಫುಸೇ.

೨೭. ಅಞ್ಞಸ್ಸ ಕಿರಿಯಂ ದಿಸ್ವಾ, ತೇನ ಲೇಸೇನ ಚೋದಯಂ;

ವತ್ಥುನಾ ಅನ್ತಿಮೇನಾಞ್ಞಂ, ಚಾವೇತುಂ ಗರುಕಂ ಫುಸೇ.

೨೮. ಛಾದೇತಿ ಜಾನಮಾಪನ್ನಂ, ಪರಿವಸೇಯ್ಯ ತಾವತಾ;

ಚರೇಯ್ಯ ಸಙ್ಘೇ ಮಾನತ್ತಂ, ಪರಿವುತ್ಥೋ ಛ ರತ್ತಿಯೋ.

ಚಿಣ್ಣಮಾನತ್ತಮಬ್ಭೇಯ್ಯ, ತಂ ಸಙ್ಘೋ ವೀಸತೀಗಣೋ.

೨೯. ಆಪತ್ತಿನುಕ್ಖಿತ್ತಮನನ್ತರಾಯ

ಪಹುತ್ತತಾಯೋ ತಥಸಞ್ಞಿತಾ ಚ;

ಛಾದೇತುಕಾಮೋ ಅಥ ಛಾದನಾತಿ,

ಛನ್ನಾ ದಸಙ್ಗೇಹ್ಯರುಣುಗ್ಗಮಮ್ಹೀತಿ.

೩. ಚೀವರನಿದ್ದೇಸೋ

ಚೀವರನ್ತಿ –

೩೦. ಖೋಮಕೋಸೇಯ್ಯಕಪ್ಪಾಸ-ಸಾಣಭಙ್ಗಾನಿ ಕಮ್ಬಲಂ;

ಕಪ್ಪಿಯಾನಿ ಛಳೇತಾನಿ, ಸಾನುಲೋಮಾನಿ ಜಾತಿತೋ.

೩೧. ದುಕೂಲಞ್ಚೇವ ಪಟ್ಟುಣ್ಣ-ಪಟಂ ಸೋಮಾರಚೀನಜಂ;

ಇದ್ಧಿಜಂ ದೇವದಿನ್ನಞ್ಚ, ತಸ್ಸ ತಸ್ಸಾನುಲೋಮಿಕಂ.

೩೨. ತಿಚೀವರಂ ಪರಿಕ್ಖಾರ-ಚೋಳಂ ವಸ್ಸಿಕಸಾಟಿಕಂ;

ಅಧಿಟ್ಠೇ ನ ವಿಕಪ್ಪೇಯ್ಯ, ಮುಖಪುಞ್ಛನನಿಸೀದನಂ.

೩೩. ಪಚ್ಚತ್ಥರಣಕಂ ಕಣ್ಡು-ಚ್ಛಾದಿಮೇತ್ಥ ತಿಚೀವರಂ;

ನ ವಸೇಯ್ಯ ವಿನೇಕಾಹಂ, ಚಾತುಮಾಸಂ ನಿಸೀದನಂ.

೩೪. ‘‘ಇಮಂ ಸಙ್ಘಾಟಿಂಧಿಟ್ಠಾಮಿ’’, ಸಙ್ಘಾಟಿಮಿಚ್ಚಧಿಟ್ಠಯೇ;

ಅಹತ್ಥಪಾಸಮೇತನ್ತಿ, ಸೇಸೇಸುಪಿ ಅಯಂ ನಯೋ.

೩೫. ಅಧಿಟ್ಠಹನ್ತೋ ಸಙ್ಘಾಟಿ-ಪ್ಪಭುತಿಂ ಪುಬ್ಬಚೀವರಂ;

ಪಚ್ಚುದ್ಧರಿತ್ವಾಧಿಟ್ಠೇಯ್ಯ, ಪತ್ತಾಧಿಟ್ಠಹನೇ ತಥಾ.

೩೬. ಏತಂ ಇಮಂ ವ ಸಙ್ಘಾಟಿಂ, ಸಂಸೇ ಪಚ್ಚುದ್ಧರಾಮಿತಿ;

ಏವಂ ಸಬ್ಬಾನಿ ನಾಮೇನ, ವತ್ವಾ ಪಚ್ಚುದ್ಧರೇ ವಿದೂ.

೩೭. ಸಙ್ಘಾಟಿ ಪಚ್ಛಿಮನ್ತೇನ, ದೀಘಸೋ ಮುಟ್ಠಿಪಞ್ಚಕೋ;

ಉತ್ತಮನ್ತೇನ ಸುಗತ-ಚೀವರೂನಾಪಿ ವಟ್ಟತಿ.

೩೮. ಮುಟ್ಠಿತ್ತಿಕಞ್ಚ ತಿರಿಯಂ, ತಥಾ ಏಕಂಸಿಕಸ್ಸಪಿ;

ಅನ್ತರವಾಸಕೋ ಚಾಪಿ, ದೀಘಸೋ ಮುಟ್ಠಿಪಞ್ಚಕೋ;

ಅಡ್ಢತೇಯ್ಯೋ ದ್ವಿಹತ್ಥೋ ವಾ, ತಿರಿಯನ್ತೇನ ವಟ್ಟತಿ.

೩೯. ನಿಸೀದನಸ್ಸ ದೀಘೇನ, ವಿದತ್ಥಿ ದ್ವೇ ವಿಸಾಲತೋ;

ದಿಯಡ್ಢಂ ದಸಾ ವಿದತ್ಥಿ, ಸುಗತಸ್ಸ ವಿದತ್ಥಿಯಾ.

೪೦. ಕಣ್ಡುಪ್ಪಟಿಚ್ಛಾದಿಕಸ್ಸ, ತಿರಿಯಂ ದ್ವೇ ವಿದತ್ಥಿಯೋ;

ದೀಘನ್ತತೋ ಚತಸ್ಸೋವ, ಸುಗತಸ್ಸ ವಿದತ್ಥಿಯಾ.

೪೧. ವಸ್ಸಿಕಸಾಟಿಕಾಯಾಪಿ, ದೀಘಸೋ ಛ ವಿದತ್ಥಿಯೋ;

ತಿರಿಯಂ ಅಡ್ಢತೇಯ್ಯಾವ, ಸುಗತಸ್ಸ ವಿದತ್ಥಿಯಾ.

೪೨. ಏತ್ಥ ಛೇದನಪಾಚಿತ್ತಿ, ಕರೋನ್ತಸ್ಸ ತದುತ್ತರಿ;

ಪಚ್ಚತ್ಥರಣ ಮುಖಚೋಳಾ, ಆಕಙ್ಖಿತಪ್ಪಮಾಣಿಕಾ.

೪೩. ಪರಿಕ್ಖಾರಚೋಳೇ ಗಣನಾ, ಪಮಾಣಂ ವಾ ನ ದೀಪಿತಂ;

ತಥಾ ವತ್ವಾ ಅಧಿಟ್ಠೇಯ್ಯ, ಥವಿಕಾದಿಂ ವಿಕಪ್ಪಿಯಂ.

೪೪. ಅಹತಾಹತಕಪ್ಪಾನಂ, ಸಙ್ಘಾಟಿ ದಿಗುಣಾ ಸಿಯಾ;

ಏಕಚ್ಚಿಯೋತ್ತರಾಸಙ್ಗೋ, ತಥಾ ಅನ್ತರವಾಸಕೋ.

೪೫. ಉತುದ್ಧಟಾನ ದುಸ್ಸಾನಂ, ಸಙ್ಘಾಟಿ ಚ ಚತುಗ್ಗುಣಾ;

ಭವೇಯ್ಯುಂ ದಿಗುಣಾ ಸೇಸಾ, ಪಂಸುಕೂಲೇ ಯಥಾರುಚಿ.

೪೬. ತೀಸು ದ್ವೇ ವಾಪಿ ಏಕಂ ವಾ, ಛಿನ್ದಿತಬ್ಬಂ ಪಹೋತಿ ಯಂ;

ಸಬ್ಬೇಸು ಅಪ್ಪಹೋನ್ತೇಸು, ಅನ್ವಾಧಿಮಾದಿಯೇಯ್ಯ ವಾ;

ಅಚ್ಛಿನ್ನಞ್ಚ ಅನಾದಿಣ್ಣಂ, ನ ಧಾರೇಯ್ಯ ತಿಚೀವರಂ.

೪೭. ಗಾಮೇ ನಿವೇಸನೇ ಉದ್ದೋ-ಸಿತಪಾಸಾದಹಮ್ಮಿಯೇ;

ನಾವಾಟ್ಟಮಾಳಆರಾಮೇ, ಸತ್ಥಖೇತ್ತಖಲೇ ದುಮೇ.

೪೮. ಅಜ್ಝೋಕಾಸೇ ವಿಹಾರೇ ವಾ, ನಿಕ್ಖಿಪಿತ್ವಾ ತಿಚೀವರಂ;

ಭಿಕ್ಖುಸಮ್ಮುತಿಯಾಞ್ಞತ್ರ, ವಿಪ್ಪವತ್ಥುಂ ನ ವಟ್ಟತಿ.

೪೯. ರೋಗವಸ್ಸಾನಪರಿಯನ್ತಾ, ಕಣ್ಡುಚ್ಛಾದಿಕಸಾಟಿಕಾ;

ತತೋ ಪರಂ ವಿಕಪ್ಪೇಯ್ಯ, ಸೇಸಾ ಅಪರಿಯನ್ತಿಕಾ.

೫೦. ಪಚ್ಚತ್ಥರಣ ಪರಿಕ್ಖಾರ-ಮುಖಪುಞ್ಛನಚೋಳಕಂ;

ದಸಂ ಪ್ಯರತ್ತನಾದಿಣ್ಣಕಪ್ಪಂ ಲಬ್ಭಂ ನಿಸೀದನಂ.

೫೧. ಅದಸಂ ರಜಿತಂಯೇವ, ಸೇಸಚೀವರಪಞ್ಚಕಂ;

ಕಪ್ಪತಾದಿಣ್ಣಕಪ್ಪಂವ, ಸದಸಂವ ನಿಸೀದನಂ.

೫೨. ಅನಧಿಟ್ಠಿತನಿಸ್ಸಟ್ಠಂ, ಕಪ್ಪೇತ್ವಾ ಪರಿಭುಞ್ಜಯೇ;

ಹತ್ಥದೀಘಂ ತತೋಪಡ್ಢ-ವಿತ್ಥಾರಞ್ಚ ವಿಕಪ್ಪಿಯಂ.

೫೩. ತಿಚೀವರಸ್ಸ ಭಿಕ್ಖುಸ್ಸ, ಸಬ್ಬಮೇತಂ ಪಕಾಸಿತಂ;

ಪರಿಕ್ಖಾರಚೋಳಿಯೋ ಸಬ್ಬಂ, ತಥಾ ವತ್ವಾ ಅಧಿಟ್ಠತಿ.

೫೪. ಅಚ್ಛೇದವಿಸ್ಸಜ್ಜನಗಾಹವಿಬ್ಭಮಾ,