೬. ವತ್ತಾದಿಕಣ್ಡನಿದ್ದೇಸೋ

೯೬. ಉಪಜ್ಝಾಚರಿಯವತ್ತಞ್ಚ, ಗಮಿಕಾಗನ್ತುಕಮ್ಪಿ ಚ;

ಸೇನಾಸನಾದಿವತ್ತಞ್ಚ, ಕಾತಬ್ಬಂ ಪಿಯಸೀಲಿನಾ.

೯೭. ಹತ್ಥಪಾಸೇ ಠಿತೋ ಕಿಞ್ಚಿ, ಗಹಿತಬ್ಬಂ ದದೇ ತಿಧಾ;

ಗಹೇತುಕಾಮೋ ಗಣ್ಹೇಯ್ಯ, ದ್ವಿಧಾಯಂ ಸಮ್ಪಟಿಗ್ಗಹೋ.

೯೮. ಸಙ್ಘಾಟಿಮುತ್ತರಾಸಙ್ಗಂ, ತಥಾ ಅನ್ತರವಾಸಕಂ;

‘‘ಏತಂ ಇಮಂ ಅಧಿಟ್ಠಾಮಿ’’, ತಥಾ ‘‘ಪಚ್ಚುದ್ಧರಾಮಿ’’ತಿ.

೯೯. ‘‘ಇಮಂ ಇಮಾನಿ ಏತಾನಿ, ಏತಮ್ಪಿ ಚೀವರ’’ನ್ತಿ ವಾ;

‘‘ಪರಿಕ್ಖಾರಚೋಳಾನೀ’’ತಿ, ತಥಾ ‘‘ಪಚ್ಚುದ್ಧರಾಮಿ’’ತಿ.

೧೦೦. ‘‘ಏತಂ ಇಮಂ ಅಧಿಟ್ಠಾಮಿ, ಪತ್ತಂ ಪಚ್ಚುದ್ಧರಾಮಿ’’ತಿ;

ಏವಂ ಪಚ್ಚುದ್ಧರೇಧಿಟ್ಠೇ, ಚೀವರಾದಿಂ ಯಥಾವಿಧಿ.

೧೦೧. ಸಞ್ಚರಿತ್ತಂ ವಿನಾ ಸೇಸಾ, ಸಚಿತ್ತಾ ಗರುಕನ್ತಿಮಾ;

ಅಚ್ಛಿನ್ನಂ ಪರಿಣತಂ ಹಿತ್ವಾ, ನಿಸ್ಸಗ್ಗಿಯಮಚಿತ್ತಕಂ.

೧೦೨. ಪದಸೋಧಮ್ಮಂ ದುವೇ ಸೇಯ್ಯಾ, ಇತ್ಥಿಯಾ ಧಮ್ಮದೇಸನಾ;

ದುವೇ ಸೇನಾಸನಾನೀಪಿ, ಸಿಬ್ಬನಂ ಚೀವರಸ್ಸಪಿ.

೧೦೩. ಪವಾರಿತಂ ಸುರಾಪಾನಂ, ಪಞ್ಚಸನ್ನಿಧಿಆದಿಕಂ;

ಜೋತಿನುಜ್ಜಾಲನಞ್ಚೇವ, ಕಪ್ಪಬಿನ್ದುಮನಾದಿಕಂ;

ಗಾಮಪ್ಪವೇಸನನ್ತೇತೇ, ಪಾಚಿತ್ತೀಸು ಅಚಿತ್ತಕಾ.

೧೦೪. ಪಕಿಣ್ಣಕೇಸು ಉದ್ದಿಸ್ಸ-ಕತಂ ಹಿತ್ವಾಞ್ಞಮಂಸಕಂ;

ಏಕತ್ಥರಣಪಾವುರಣಂ, ಏಕಮಞ್ಚೇ ತುವಟ್ಟನಂ;

ಏಕತೋ ಭುಞ್ಜನಞ್ಚಾಪಿ, ನಚ್ಚಗೀತಾದಿಸತ್ತಪಿ.

೧೦೫. ಅಕಾಯಬನ್ಧನಞ್ಚಾಪಿ, ಪತ್ತಹತ್ಥಕವಾಟಕಂ;

ಅಚಿತ್ತಕಮಿದಂ ಸಬ್ಬಂ, ಸೇಸಮೇತ್ಥ ಸಚಿತ್ತಕಂ.

೧೦೬. ವೀತಿಕ್ಕಮನಚಿತ್ತೇನ, ಸಚಿತ್ತಕಮಚಿತ್ತಕಂ;

ಪಞ್ಞತ್ತಿಜಾನನೇನಾಪಿ, ವದನ್ತಾಚರಿಯಾ ತಥಾ.

೧೦೭. ಪುಬ್ಬಕರಣಾದಿಕಂ ಕತ್ವಾ, ಉಪೋಸಥಪ್ಪವಾರಣಂ;

ನವಧಾ ದೀಪಿತಂ ಸಬ್ಬಂ, ಕಾತಬ್ಬಂ ಪಿಯಸೀಲಿನಾ.

೧೦೮. ಸಮ್ಮಜ್ಜನೀ ಪದೀಪೋ ಚ, ಉದಕಂ ಆಸನೇನ ಚ;

ಉಪೋಸಥಸ್ಸ ಏತಾನಿ, ಪುಬ್ಬಕರಣನ್ತಿ ವುಚ್ಚತಿ.

೧೦೯. ಛನ್ದಪಾರಿಸುದ್ಧಿಉತುಕ್ಖಾನಂ, ಭಿಕ್ಖುಗಣನಾ ಚ ಓವಾದೋ;

ಉಪೋಸಥಸ್ಸ ಏತಾನಿ, ಪುಬ್ಬಕಿಚ್ಚನ್ತಿ ವುಚ್ಚತಿ.

೧೧೦. ಉಪೋಸಥೋ ಯಾವತಿಕಾ ಚ ಭಿಕ್ಖೂ ಕಮ್ಮಪ್ಪತ್ತಾ,

ಸಭಾಗಾಪತ್ತಿಯೋ ಚ ನ ವಿಜ್ಜನ್ತಿ;

ವಜ್ಜನೀಯಾ ಚ ಪುಗ್ಗಲಾ ತಸ್ಮಿಂ ನ ಹೋನ್ತಿ,

ಪತ್ತಕಲ್ಲನ್ತಿ ವುಚ್ಚತಿ.

೧೧೧. ಪುಬ್ಬಕರಣಪುಬ್ಬಕಿಚ್ಚಾನಿ ಸಮಾಪೇತ್ವಾ ದೇಸಿತಾಪತ್ತಿಕಸ್ಸ ಸಮಗ್ಗಸ್ಸ ಭಿಕ್ಖುಸಙ್ಘಸ್ಸ ಅನುಮತಿಯಾ ಪಾತಿಮೋಕ್ಖಂ ಉದ್ದಿಸಿತುಂ ಆರಾಧನಂ ಕರೋಮ.

೧೧೨. ಪಾರಿಸುದ್ಧಿಅಧಿಟ್ಠಾನ-ಸುತ್ತುದ್ದೇಸವಸಾ ತಿಧಾ;

ಗಣಪುಗ್ಗಲಸಙ್ಘಾ ಚ, ತಂ ಕರೇಯ್ಯುಂ ಯಥಾಕ್ಕಮಂ.

೧೧೩. ಚಾತುದ್ದಸೋ ಪನ್ನರಸೋ, ಸಾಮಗ್ಗೀ ದಿನತೋ ತಿಧಾ;

ದಿನಪುಗ್ಗಲಕತ್ತಬ್ಬಾ-ಕಾರತೋ ತೇ ನವೇರಿತಾ.

೧೧೪. ತಯೋ ತಯೋತಿ ಕತ್ವಾನ, ದಿನಪುಗ್ಗಲಭೇದತೋ;

ತೇವಾಚೀದ್ವೇಕವಾಚೀತಿ, ನವ ವುತ್ತಾ ಪವಾರಣಾ.

೧೧೫. ಕತ್ತಿಕನ್ತಿಮಪಕ್ಖಮ್ಹಾ, ಹೇಮಂ ಫಗ್ಗುನಪುಣ್ಣಮಾ;

ತಸ್ಸ ಅನ್ತಿಮಪಕ್ಖಮ್ಹಾ, ಗಿಮ್ಹಂ ಆಸಾಳ್ಹಿಪುಣ್ಣಮಾ;

ವಸ್ಸಕಾಲಂ ತತೋ ಸೇಸಂ, ಚತುವೀಸತುಪೋಸಥಾ.

೧೧೬. ಚಾತುದ್ದಸಾ ಛ ಏತೇಸು, ಪಕ್ಖಾ ತತಿಯಸತ್ತಮಾ;

ಞೇಯ್ಯಾ ಪನ್ನರಸಾ ಸೇಸಾ, ಅಟ್ಠಾರಸ ಉಪೋಸಥಾ.

೧೧೭. ‘‘ಛನ್ದಂ ದಮ್ಮಿ, ಛನ್ದಂ ಮೇ ಹರ, ಛನ್ದಂ ಮೇ ಆರೋಚೇಹೀ’’ತಿ ಛನ್ದಂ ದಾತಬ್ಬಂ.

೧೧೮. ‘‘ಪಾರಿಸುದ್ಧಿಂ ದಮ್ಮಿ, ಪಾರಿಸುದ್ಧಿಂ ಮೇ ಹರ, ಪಾರಿಸುದ್ಧಿಂ ಮೇ ಆರೋಚೇಹೀ’’ತಿ ಪಾರಿಸುದ್ಧಿ ದಾತಬ್ಬಾ.

೧೧೯. ‘‘ಪವಾರಣಂ ದಮ್ಮಿ, ಪವಾರಣಂ ಮೇ ಹರ, ಪವಾರಣಂ ಮೇ ಆರೋಚೇಹಿ, ಮಮತ್ಥಾಯ ಪವಾರೇಹೀ’’ತಿ ಪವಾರಣಾ ದಾತಬ್ಬಾ.

೧೨೦. ಆಪತ್ತಿದೇಸಕೇನ ‘‘ಅಹಂ, ಭನ್ತೇ, ಸಮ್ಬಹುಲಾ ನಾನಾವತ್ಥುಕಾ ಆಪತ್ತಿಯೋ ಆಪಜ್ಜಿಂ, ತಾ ತುಮ್ಹಮೂಲೇ ಪಟಿದೇಸೇಮೀ’’ತಿ ವತ್ವಾ ಪಟಿಗ್ಗಣ್ಹನ್ತೇನ ‘‘ಪಸ್ಸಸಿ, ಆವುಸೋ, ತಾ ಆಪತ್ತಿಯೋ’’ತಿ ವುತ್ತೇ ‘‘ಆಮ, ಭನ್ತೇ, ಪಸ್ಸಾಮೀ’’ತಿ ವತ್ವಾ ಪುನ ಪಟಿಗ್ಗಣ್ಹನ್ತೇನ ‘‘ಆಯತಿಂ, ಆವುಸೋ, ಸಂವರೇಯ್ಯಾಸೀ’’ತಿ ವುತ್ತೇ ‘‘ಸಾಧು, ಸುಟ್ಠು, ಭನ್ತೇ ಸಂವರಿಸ್ಸಾಮೀ’’ತಿ ತಿಕ್ಖತ್ತುಂ ವತ್ವಾ ದೇಸೇತಬ್ಬಂ.

೧೨೧. ವೇಮತಿಂ ಆರೋಚೇನ್ತೇನ ‘‘ಅಹಂ, ಭನ್ತೇ, ಸಮ್ಬಹುಲಾಸು ನಾನಾವತ್ಥುಕಾಸು ಆಪತ್ತೀಸು ವೇಮತಿಕೋ, ಯದಾ ನಿಬ್ಬೇಮತಿಕೋ ಭವಿಸ್ಸಾಮಿ, ತದಾ ತಾ ಆಪತ್ತಿಯೋ ಪಟಿಕರಿಸ್ಸಾಮೀ’’ತಿ ತಿಕ್ಖತ್ತುಂ ವತ್ವಾ ಆರೋಚೇತಬ್ಬಂ.

೧೨೨. ‘‘ಅಜ್ಜ ಮೇ ಉಪೋಸಥೋ ‘ಪನ್ನರಸೋ, ಚಾತುದ್ದಸೋ’ತಿ ವಾ ಅಧಿಟ್ಠಾಮೀ’’ತಿ ತಿಕ್ಖತ್ತುಂ ವತ್ವಾ ಪುಗ್ಗಲೇನ ಅಧಿಟ್ಠಾನುಪೋಸಥೋ ಕಾತಬ್ಬೋ.

೧೨೩. ದ್ವೀಸು ಪನ ಥೇರೇನ ‘‘ಪರಿಸುದ್ಧೋ ಅಹಂ ಆವುಸೋ, ‘ಪರಿಸುದ್ಧೋ’ತಿ ಮಂ ಧಾರೇಹೀ’’ತಿ ತಿಕ್ಖತ್ತುಂ ವತ್ತಬ್ಬಂ. ನವಕೇನಪಿ ತಥೇವ ವತ್ತಬ್ಬಂ. ‘‘ಭನ್ತೇ, ಧಾರೇಥಾ’’ತಿ ವಚನಂ ವಿಸೇಸೋ.

೧೨೪. ತೀಸು ಪನ ‘‘ಸುಣನ್ತು ಮೇ ಆಯಸ್ಮನ್ತಾ, ಅಜ್ಜುಪೋಸಥೋ ಪನ್ನರಸೋ, ಯದಾಯಸ್ಮನ್ತಾನಂ ಪತ್ತಕಲ್ಲಂ, ಮಯಂ ಅಞ್ಞಮಞ್ಞಂ ಪಾರಿಸುದ್ಧಿಉಪೋಸಥಂ ಕರೇಯ್ಯಾಮಾ’’ತಿ ಞತ್ತಿಂ ಠಪೇತ್ವಾ ಪಟಿಪಾಟಿಯಾ ವುತ್ತನಯೇನ ಪಾರಿಸುದ್ಧಿಉಪೋಸಥೋ ಕಾತಬ್ಬೋ.

೧೨೫. ‘‘ಅಜ್ಜ ಮೇ ಪವಾರಣಾ ‘ಚಾತುದ್ದಸೀ, ಪನ್ನರಸೀ’ತಿ ವಾ ಅಧಿಟ್ಠಾಮೀ’’ತಿ ತಿಕ್ಖತ್ತುಂ ವತ್ವಾ ಏಕೇನ ಪವಾರೇತಬ್ಬಂ.

೧೨೬. ದ್ವೀಸು ಪನ ಥೇರೇನ ‘‘ಅಹಂ, ಆವುಸೋ, ಆಯಸ್ಮನ್ತಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದತು ಮಂ ಆಯಸ್ಮಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ ತಿಕ್ಖತ್ತುಂ ವತ್ವಾ ಪವಾರೇತಬ್ಬಂ. ನವಕೇನಾಪಿ ತಥೇವ ವತ್ತಬ್ಬಂ. ‘‘ಭನ್ತೇ’’ತಿ ವಚನಂ ವಿಸೇಸೋ.

೧೨೭. ತೀಸು ವಾ ಚತೂಸು ವಾ ಪನ ‘‘ಸುಣನ್ತು ಮೇ ಆಯಸ್ಮನ್ತಾ, ಅಜ್ಜ ಪವಾರಣಾ ಪನ್ನರಸೀ, ಯದಾಯಸ್ಮನ್ತಾನಂ ಪತ್ತಕಲ್ಲಂ, ಮಯಂ ಅಞ್ಞಮಞ್ಞಂ ಪವಾರೇಯ್ಯಾಮಾ’’ತಿ ಞತ್ತಿಂ ಠಪೇತ್ವಾ ಥೇರೇನ ‘‘ಅಹಂ, ಆವುಸೋ, ಆಯಸ್ಮನ್ತೇ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ ತಿಕ್ಖತ್ತುಂ ವತ್ವಾ ಪವಾರೇತಬ್ಬಂ. ನವಕೇಹಿಪಿ ತಥೇವ ಪಟಿಪಾಟಿಯಾ ಪವಾರೇತಬ್ಬಂ. ‘‘ಭನ್ತೇ’’ತಿವಚನಂ ವಿಸೇಸೋ.

೧೨೮. ಚತೂಹಿ ಅಧಿಕೇಸು ಪನ ‘‘ಸುಣಾತು ಮೇ ಆವುಸೋ ಸಙ್ಘೋ, ಅಜ್ಜ ಪವಾರಣಾ ಪನ್ನರಸೀ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಪವಾರೇಯ್ಯಾ’’ತಿ ಞತ್ತಿಂ ಠಪೇತ್ವಾ ವುಡ್ಢತರೇನ ‘‘ಸಙ್ಘಂ, ಆವುಸೋ, ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ ತಿಕ್ಖತ್ತುಂ ವತ್ವಾ ಪವಾರೇತಬ್ಬಂ. ನವಕೇಹಿಪಿ ತಥೇವ ಪಟಿಪಾಟಿಯಾ ‘‘ಸಙ್ಘಂ, ಭನ್ತೇ, ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ ತಿಕ್ಖತ್ತುಂ ವತ್ವಾ ಪವಾರೇತಬ್ಬಂ.

ಮೂಲಸಿಕ್ಖಾ ನಿಟ್ಠಿತಾ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ