ಮೂಲಸಿಕ್ಖಾ

ಗನ್ಥಾರಮ್ಭಕಥಾ

ನತ್ವಾ ನಾಥಂ ಪವಕ್ಖಾಮಿ, ಮೂಲಸಿಕ್ಖಂ ಸಮಾಸತೋ;

ಭಿಕ್ಖುನಾ ನವಕೇನಾದೋ, ಮೂಲಭಾಸಾಯ ಸಿಕ್ಖಿತುಂ.

೧. ಪಾರಾಜಿಕನಿದ್ದೇಸೋ

೧. ಸಂ ನಿಮಿತ್ತಂ ಪವೇಸನ್ತೋ, ಭಿಕ್ಖು ಮಗ್ಗತ್ತಯೇ ಚುತೋ;

ಪವೇಸನಟ್ಠಿತುದ್ಧಾರ-ಪವಿಟ್ಠೇ ಚೇಪಿ ಸಾದಿಯಂ.

೨. ಅದಿನ್ನಂ ಮಾನುಸಂ ಭಣ್ಡಂ, ಥೇಯ್ಯಾಯೇಕೇನ ಆದಿಯಂ;

ಪಞ್ಚವೀಸಾವಹಾರೇಸು, ಗರುಕಂ ಚೇ ಚುತೋ ಭವೇ.

೩. ಆದಿಯನ್ತೋ ಹರನ್ತೋವ-ಹರನ್ತೋಪಿರಿಯಾಪಥಂ;

ವಿಕೋಪೇನ್ತೋ ತಥಾ ಠಾನಾ, ಚಾವೇನ್ತೋಪಿ ಪರಾಜಿಕೋ.

೪. ತತ್ಥ ನಾನೇಕಭಣ್ಡಾನಂ, ಪಞ್ಚಕಾನಂ ವಸಾ ಪನ;

ಅವಹಾರಾ ದಸಞ್ಚೇತಿ, ವಿಞ್ಞಾತಬ್ಬಾ ವಿಭಾವಿನಾ.

೫. ಸಾಹತ್ಥಾಣತ್ತಿಕೋ ಚೇವ, ನಿಸ್ಸಗ್ಗೋ ಚಾತ್ಥಸಾಧಕೋ;

ಧುರನಿಕ್ಖೇಪನಞ್ಚೇವ, ಇದಂ ಸಾಹತ್ಥಪಞ್ಚಕಂ.

೬. ಪುಬ್ಬಸಹಪ್ಪಯೋಗೋ ಚ, ಸಂವಿಧಾಹರಣಮ್ಪಿ ಚ;

ಸಙ್ಕೇತಕಮ್ಮಂ ನಿಮಿತ್ತಂ, ಪುಬ್ಬಪ್ಪಯೋಗಪಞ್ಚಕಂ.

೭. ಥೇಯ್ಯಾಪಸಯ್ಹಪರಿಕಪ್ಪ-ಪ್ಪಟಿಚ್ಛನ್ನಕುಸಾದಿಕಾ;

ಅವಹಾರಾ ಇಮೇ ಪಞ್ಚ, ವಿಞ್ಞಾತಬ್ಬಾ ವಿಭಾವಿನಾ.

೮. ಮನುಸ್ಸಪಾಣಂ ಪಾಣೋತಿ, ಜಾನಂ ವಧಕಚೇತಸಾ;

ಜೀವಿತಾ ಯೋ ವಿಯೋಜೇತಿ, ಸಾಸನಾ ಸೋ ಪರಾಜಿತೋ.

೯. ಝಾನಾದಿಭೇದಂ ಹದಯೇ ಅಸನ್ತಂ,

ಅಞ್ಞಪದೇಸಞ್ಚ ವಿನಾಧಿಮಾನಂ;

ಮನುಸ್ಸಜಾತಿಸ್ಸ ವದೇಯ್ಯ ಭಿಕ್ಖು,

ಞಾತಕ್ಖಣೇ ತೇನ ಪರಾಜಿಕೋ ಭವೇತಿ.

೨. ಗರುಕಾಪತ್ತಿನಿದ್ದೇಸೋ

೧೦. ಮೋಚೇತುಕಾಮಚಿತ್ತೇನ, ಉಪಕ್ಕಮ್ಮ ವಿಮೋಚಯಂ;

ಸುಕ್ಕಮಞ್ಞತ್ರ ಸುಪಿನಾ, ಸಮಣೋ ಗರುಕಂ ಫುಸೇ.

೧೧. ಕಾಯಸಂಸಗ್ಗರಾಗೇನ, ಮನುಸ್ಸಿತ್ಥಿಂ ಪರಾಮಸಂ;

ಇತ್ಥಿಸಞ್ಞೀ ಉಪಕ್ಕಮ್ಮ, ಸಮಣೋ ಗರುಕಂ ಫುಸೇ.

೧೨. ದುಟ್ಠುಲ್ಲವಾಚಸ್ಸಾದೇನ, ಮಗ್ಗಂ ವಾರಬ್ಭ ಮೇಥುನಂ;

ಓಭಾಸನ್ತೋ ಮನುಸ್ಸಿತ್ಥಿಂ, ಸುಣಮಾನಂ ಗರುಂ ಫುಸೇ.

೧೩. ವಣ್ಣಂ ವತ್ವಾತ್ತನೋಕಾಮ-ಪಾರಿಚರಿಯಾಯ ಮೇಥುನಂ;

ಇತ್ಥಿಂ ಮೇಥುನರಾಗೇನ, ಯಾಚಮಾನೋ ಗರುಂ ಫುಸೇ.

೧೪. ಸನ್ದೇಸಂ ಪಟಿಗ್ಗಣ್ಹಿತ್ವಾ, ಪುರಿಸಸ್ಸಿತ್ಥಿಯಾಪಿ ವಾ;

ವೀಮಂಸಿತ್ವಾ ಹರಂಪಚ್ಚಾ, ಸಮಣೋ ಗರುಕಂ ಫುಸೇ.

೧೫. ಚಾವೇತುಕಾಮೋ ಚೋದೇನ್ತೋ, ಅಮೂಲನ್ತಿಮವತ್ಥುನಾ;

ಚೋದಾಪಯಂ ವಾ ಸಮಣೋ, ಸುಣಮಾನಂ ಗರುಂ ಫುಸೇ.

೧೬. ಲೇಸಮತ್ತಂ ಉಪಾದಾಯ, ಅಮೂಲನ್ತಿಮವತ್ಥುನಾ;

ಚಾವೇತುಕಾಮೋ ಚೋದೇನ್ತೋ, ಸುಣಮಾನಂ ಗರುಂ ಫುಸೇತಿ.

೩. ನಿಸ್ಸಗ್ಗಿಯನಿದ್ದೇಸೋ

೧೭. ವಿಕಪ್ಪನಮಧಿಟ್ಠಾನ-ಮಕತ್ವಾ ಕಾಲಚೀವರಂ;

ದಸಾಹಮತಿಮಾಪೇತಿ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೧೮. ಭಿಕ್ಖುಸಮ್ಮುತಿಯಾಞ್ಞತ್ರ, ತಿಚೀವರಮಧಿಟ್ಠಿತಂ;

ಏಕಾಹಮತಿಮಾಪೇತಿ, ನಿಸ್ಸಗ್ಗಿ ಸಮಯಂ ವಿನಾ.

೧೯. ಅಞ್ಞಾತಿಕಾ ಭಿಕ್ಖುನಿಯಾ, ಪುರಾಣಚೀವರಂ ಪನ;

ಧೋವಾಪೇತಿ ರಜಾಪೇತಿ, ಆಕೋಟಾಪೇತಿ ತಂ ಸಿಯಾ.

೨೦. ಅಞ್ಞಾತಿಕಾ ಭಿಕ್ಖುನಿಯಾ, ಹತ್ಥತೋ ಕಿಞ್ಚಿ ಮೂಲಕಂ;

ಅದತ್ವಾ ಚೀವರಾದಾನೇ, ನಿಸ್ಸಗ್ಗಿಯಮುದೀರಿತಂ.

೨೧. ಅಪ್ಪವಾರಿತಮಞ್ಞಾತಿಂ, ವಿಞ್ಞಾಪೇನ್ತಸ್ಸ ಚೀವರಂ;

ಅಞ್ಞತ್ರ ಸಮಯಾ ತಸ್ಸ, ನಿಸ್ಸಗ್ಗಿಯಮುದೀರಿತಂ.

೨೨. ರಜತಂ ಜಾತರೂಪಂ ವಾ, ಮಾಸಕಂ ವಾ ಕಹಾಪಣಂ;

ಗಣ್ಹೇಯ್ಯ ವಾ ಗಣ್ಹಾಪೇಯ್ಯ, ನಿಸ್ಸಗ್ಗಿ ಸಾದಿಯೇಯ್ಯ ವಾ.

೨೩. ಪರಿವತ್ತೇಯ್ಯ ನಿಸ್ಸಗ್ಗಿ, ರಜತಾದಿ ಚತುಬ್ಬಿಧಂ;

ಕಪ್ಪಿಯಂ ಕಪ್ಪಿಯೇನಾಪಿ, ಠಪೇತ್ವಾ ಸಹಧಮ್ಮಿಕೇ.

೨೪. ವಿಕಪ್ಪನಮಧಿಟ್ಠಾನ-ಮಕತ್ವಾನ ಪಮಾಣಿಕಂ;

ದಸಾಹಮತಿಮಾಪೇತಿ, ಪತ್ತಂ ನಿಸ್ಸಗ್ಗಿಯಂ ಸಿಯಾ.

೨೫. ಪಞ್ಚಬನ್ಧನತೋ ಊನ-ಪತ್ತೇ ಸತಿ ಪರಂ ಪನ;

ವಿಞ್ಞಾಪೇತಿ ನವಂ ಪತ್ತಂ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೨೬. ಪಟಿಗ್ಗಹೇತ್ವಾ ಭುಞ್ಜನ್ತೋ, ಸಪ್ಪಿತೇಲಾದಿಕಂ ಪನ;

ಸತ್ತಾಹಮತಿಮಾಪೇತಿ, ತಸ್ಸ ನಿಸ್ಸಗ್ಗಿಯಂ ಸಿಯಾ.

೨೭. ಭಿಕ್ಖುಸ್ಸ ಚೀವರಂ ದತ್ವಾ, ಅಚ್ಛಿನ್ದನ್ತಸ್ಸ ತಂ ಪುನ;

ಸಕಸಞ್ಞಾಯ ನಿಸ್ಸಗ್ಗಿ, ಅಚ್ಛಿನ್ದಾಪಯತೋಪಿ ವಾ.

೨೮. ಅಪ್ಪವಾರಿತಮಞ್ಞಾತಿಂ, ಸುತ್ತಂ ಯಾಚಿಯ ಚೀವರಂ;

ವಾಯಾಪೇನ್ತಸ್ಸ ನಿಸ್ಸಗ್ಗಿ, ವಿನಾ ಞಾತಿಪ್ಪವಾರಿತೇ.

೨೯. ಜಾನನ್ತೋ ಭಿಕ್ಖು ಸಙ್ಘಸ್ಸ, ಲಾಭಂ ಪರಿಣತಂ ಪನ;

ಅತ್ತನೋ ಪರಿಣಾಮೇತಿ, ತಸ್ಸ ನಿಸ್ಸಗ್ಗಿಯಂ ಸಿಯಾತಿ.

೪. ಪಾಚಿತ್ತಿಯನಿದ್ದೇಸೋ

೩೦. ಸಮ್ಪಜಾನಮುಸಾವಾದೇ, ಪಾಚಿತ್ತಿಯಮುದೀರಿತಂ;

ಭಿಕ್ಖುಞ್ಚ ಓಮಸನ್ತಸ್ಸ, ಪೇಸುಞ್ಞಹರಣೇಪಿ ಚ.

೩೧. ಠಪೇತ್ವಾ ಭಿಕ್ಖುನಿಂ ಭಿಕ್ಖುಂ, ಅಞ್ಞೇನ ಪಿಟಕತ್ತಯಂ;

ಪದಸೋಧಮ್ಮಂ ಭಣನ್ತಸ್ಸ, ಪಾಚಿತ್ತಿಯಮುದೀರಿತಂ.

೩೨. ಅನುಪಸಮ್ಪನ್ನೇನೇವ, ಸಯಿತ್ವಾನ ತಿರತ್ತಿಯಂ;

ಪಾಚಿತ್ತಿ ಸಹಸೇಯ್ಯಾಯ, ಚತುತ್ಥತ್ಥಙ್ಗತೇ ಪುನ.

೩೩. ಇತ್ಥಿಯಾ ಏಕರತ್ತಮ್ಪಿ, ಸೇಯ್ಯಂ ಕಪ್ಪಯತೋಪಿ ವಾ;

ದೇಸೇನ್ತಸ್ಸ ವಿನಾ ವಿಞ್ಞುಂ, ಧಮ್ಮಞ್ಚ ಛಪ್ಪದುತ್ತರಿಂ.

೩೪. ದುಟ್ಠುಲ್ಲಂ ಭಿಕ್ಖುನೋ ವಜ್ಜಂ, ಭಿಕ್ಖುಸಮ್ಮುತಿಯಾ ವಿನಾ;

ಅಭಿಕ್ಖುನೋ ವದನ್ತಸ್ಸ, ಪಾಚಿತ್ತಿಯಮುದೀರಿತಂ.

೩೫. ಖಣೇಯ್ಯ ವಾ ಖಣಾಪೇಯ್ಯ, ಪಥವಿಞ್ಚ ಅಕಪ್ಪಿಯಂ;

ಭೂತಗಾಮಂ ವಿಕೋಪೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾ.

೩೬. ಅಜ್ಝೋಕಾಸೇ ತು ಮಞ್ಚಾದಿಂ, ಕತ್ವಾ ಸನ್ಥರಣಾದಿಕಂ;

ಸಙ್ಘಿಕಂ ಯಾತಿ ಪಾಚಿತ್ತಿ, ಅಕತ್ವಾಪುಚ್ಛನಾದಿಕಂ.

೩೭. ಸಙ್ಘಿಕಾವಸಥೇ ಸೇಯ್ಯಂ, ಕತ್ವಾ ಸನ್ಥರಣಾದಿಕಂ;

ಅಕತ್ವಾಪುಚ್ಛನಾದಿಂ ಯೋ, ಯಾತಿ ಪಾಚಿತ್ತಿ ತಸ್ಸಪಿ.

೩೮. ಜಾನಂ ಸಪ್ಪಾಣಕಂ ತೋಯಂ, ಪಾಚಿತ್ತಿ ಪರಿಭುಞ್ಜತೋ;

ಅಞ್ಞಾತಿಕಾ ಭಿಕ್ಖುನಿಯಾ, ಠಪೇತ್ವಾ ಪಾರಿವತ್ತಕಂ.

೩೯. ಚೀವರಂ ದೇತಿ ಪಾಚಿತ್ತಿ, ಚೀವರಂ ಸಿಬ್ಬತೋಪಿ ಚ;

ಅತಿರಿತ್ತಂ ಅಕಾರೇತ್ವಾ, ಪವಾರೇತ್ವಾನ ಭುಞ್ಜತೋ.

೪೦. ಭಿಕ್ಖುಂ ಆಸಾದನಾಪೇಕ್ಖೋ, ಪವಾರೇತಿ ಪವಾರಿತಂ;

ಅನತಿರಿತ್ತೇನ ಭುತ್ತೇ ತು, ಪಾಚಿತ್ತಿಯಮುದೀರಿತಂ.

೪೧. ಸನ್ನಿಧಿಭೋಜನಂ ಭುಞ್ಜೇ, ವಿಕಾಲೇ ಯಾವಕಾಲಿಕಂ;

ಭುಞ್ಜತೋ ವಾಪಿ ಪಾಚಿತ್ತಿ, ಅಗಿಲಾನೋ ಪಣೀತಕಂ.

೪೨. ವಿಞ್ಞಾಪೇತ್ವಾನ ಭುಞ್ಜೇಯ್ಯ, ಸಪ್ಪಿಭತ್ತಾದಿಕಮ್ಪಿ ಚ;

ಅಪ್ಪಟಿಗ್ಗಹಿತಂ ಭುಞ್ಜೇ, ದನ್ತಕಟ್ಠೋದಕಂ ವಿನಾ.

೪೩. ತಿತ್ಥಿಯಸ್ಸ ದದೇ ಕಿಞ್ಚಿ, ಭುಞ್ಜಿತಬ್ಬಂ ಸಹತ್ಥತೋ;

ನಿಸಜ್ಜಂ ವಾರಹೋ ಕಪ್ಪೇ, ಮಾತುಗಾಮೇನ ಚೇಕತೋ.

೪೪. ಸುರಾಮೇರಯಪಾನೇಪಿ, ಪಾಚಿತ್ತಿಯಮುದೀರಿತಂ;

ಅಙ್ಗುಲಿಪತೋದಕೇ ಚಾಪಿ, ಹಸಧಮ್ಮೇಪಿ ಚೋದಕೇ.

೪೫. ಅನಾದರೇಪಿ ಪಾಚಿತ್ತಿ, ಭಿಕ್ಖುಂ ಭೀಸಯತೋಪಿ ವಾ;

ಭಯಾನಕಂ ಕಥಂ ಕತ್ವಾ, ದಸ್ಸೇತ್ವಾ ವಾ ಭಯಾನಕಂ.

೪೬. ಠಪೇತ್ವಾ ಪಚ್ಚಯಂ ಕಿಞ್ಚಿ, ಅಗಿಲಾನೋ ಜಲೇಯ್ಯ ವಾ;

ಜೋತಿಂ ಜಲಾಪಯೇಯ್ಯಾಪಿ, ತಸ್ಸ ಪಾಚಿತ್ತಿಯಂ ಸಿಯಾ.

೪೭. ಕಪ್ಪಬಿನ್ದುಮನಾದಾಯ, ನವಚೀವರಭೋಗಿನೋ;

ಹಸಾಪೇಕ್ಖಸ್ಸ ಪಾಚಿತ್ತಿ, ಭಿಕ್ಖುನೋ ಚೀವರಾದಿಕಂ.

೪೮. ಅಪನೇತ್ವಾ ನಿಧೇನ್ತಸ್ಸ, ನಿಧಾಪೇನ್ತಸ್ಸ ವಾ ಪನ;

ಜಾನಂ ಪಾಣಂ ಮಾರೇನ್ತಸ್ಸ, ತಿರಚ್ಛಾನಗತಮ್ಪಿ ಚ.

೪೯. ಛಾದೇತುಕಾಮೋ ಛಾದೇತಿ, ದುಟ್ಠುಲ್ಲಂ ಭಿಕ್ಖುನೋಪಿ ಚ;

ಗಾಮನ್ತರಗತಸ್ಸಾಪಿ, ಸಂವಿಧಾಯಿತ್ಥಿಯಾ ಸಹ.

೫೦. ಭಿಕ್ಖುಂ ಪಹರತೋ ವಾಪಿ, ತಲಸತ್ತಿಕಮುಗ್ಗಿರೇ;

ಚೋದೇತಿ ವಾ ಚೋದಾಪೇತಿ, ಗರುಕಾಮೂಲಕೇನಪಿ.

೫೧. ಕುಕ್ಕುಚ್ಚುಪ್ಪಾದನೇ ಚಾಪಿ, ಭಣ್ಡನತ್ಥಾಯುಪಸ್ಸುತಿಂ;

ಸೋತುಂ ಭಣ್ಡನಜಾತಾನಂ, ಯಾತಿ ಪಾಚಿತ್ತಿಯಂ ಸಿಯಾ.

೫೨. ಸಙ್ಘಸ್ಸ ಲಾಭಂ ಪರಿಣಾಮಿತಂ ತು,

ನಾಮೇತಿ ಯೋ ತಂ ಪರಪುಗ್ಗಲಸ್ಸ;

ಪುಚ್ಛಂ ಅಕತ್ವಾಪಿ ಚ ಸನ್ತಭಿಕ್ಖುಂ,

ಪಾಚಿತ್ತಿ ಗಾಮಸ್ಸ ಗತೇ ವಿಕಾಲೇತಿ.

೫. ಪಕಿಣ್ಣಕನಿದ್ದೇಸೋ

೫೩. ಸಙ್ಘಿಕಂ ಗರುಭಣ್ಡಂ ಯೋ, ದೇತಿ ಅಞ್ಞಸ್ಸ ಇಸ್ಸರೋ;

ಥುಲ್ಲಚ್ಚಯಂ ಯಥಾವತ್ಥುಂ, ಥೇಯ್ಯಾ ಪಾರಾಜಿಕಾದಿಪಿ.

೫೪. ಕುಸಾದಿಮಯಚೀರಾನಿ, ಕಮ್ಬಲಂ ಕೇಸವಾಲಜಂ;

ಸಮಯಂ ವಿನಾ ಧಾರಯತೋ, ಲೂಕಪಕ್ಖಾಜಿನಕ್ಖಿಪಂ.

೫೫. ಸತ್ಥಕಮ್ಮೇ ವತ್ಥಿಕಮ್ಮೇ, ಸಂ ನಿಮಿತ್ತಞ್ಚ ಛಿನ್ದತೋ;

ಥುಲ್ಲಚ್ಚಯಂ ಮನುಸ್ಸಾನಂ, ಮಂಸಾದಿಭೋಜನೇಪಿ ವಾ.

೫೬. ಕದಲೇರಕಕ್ಕದುಸ್ಸಾನಿ, ಪೋತ್ಥಕಂ ಸಬ್ಬನೀಲಕಂ;

ಸಬ್ಬಪೀತಾದಿಕಞ್ಚಾಪಿ, ಧಾರಯನ್ತಸ್ಸ ದುಕ್ಕಟಂ.

೫೭. ಹತ್ಥಿಸ್ಸುರಗಸೋಣಾನಂ, ಸೀಹಬ್ಯಗ್ಘಚ್ಛದೀಪಿನಂ;

ತರಚ್ಛಸ್ಸ ಚ ಮಂಸಾದಿಂ, ಉದ್ದಿಸ್ಸಕತಕಮ್ಪಿ ಚ.

೫೮. ಅನಾಪುಚ್ಛಿತಮಂಸಞ್ಚ, ಭುಞ್ಜತೋ ದುಕ್ಕಟಂ ಸಿಯಾ;

ಯಾತಾನುಪುಬ್ಬಂ ಹಿತ್ವಾನ, ದಕತಿತ್ಥಾದಿಕಂ ವಜೇ.

೫೯. ಸಹಸಾ ವುಬ್ಭಜಿತ್ವಾನ, ಪವಿಸೇ ನಿಕ್ಖಮೇಯ್ಯ ವಾ;

ವಚ್ಚಪಸ್ಸಾವಕುಟಿಕಂ, ವಿನಾ ಉಕ್ಕಾಸಿಕಂ ವಿಸೇ.

೬೦. ನಿತ್ಥುನನ್ತೋ ಕರೇ ವಚ್ಚಂ, ದನ್ತಕಟ್ಠಞ್ಚ ಖಾದಯಂ;

ವಚ್ಚಪಸ್ಸಾವದೋಣೀನಂ, ಬಹಿ ವಚ್ಚಾದಿಕಂ ಕರೇ.

೬೧. ಖರೇನ ಚಾವಲೇಖೇಯ್ಯ, ಕಟ್ಠಂ ಪಾತೇಯ್ಯ ಕೂಪಕೇ;

ಊಹತಞ್ಚ ನ ಧೋವೇಯ್ಯ, ಉಕ್ಲಾಪಞ್ಚ ನ ಸೋಧಯೇ.

೬೨. ದಕಕಿಚ್ಚಂ ಕರೋನ್ತಸ್ಸ, ಕತ್ವಾ ‘‘ಚಪುಚಪೂ’’ತಿ ಚ;

ಅನಜ್ಝಿಟ್ಠೋವ ಥೇರೇನ, ಪಾತಿಮೋಕ್ಖಮ್ಪಿ ಉದ್ದಿಸೇ.

೬೩. ಅನಾಪುಚ್ಛಾಯ ಪಞ್ಹಸ್ಸ, ಕಥನೇ ವಿಸ್ಸಜ್ಜನೇಪಿ ಚ;

ಸಜ್ಝಾಯಕರಣೇ ದೀಪ-ಜಾಲನೇ ವಿಜ್ಝಾಪನೇಪಿ ಚ.

೬೪. ವಾತಪಾನಕವಾಟಾನಿ, ವಿವರೇಯ್ಯ ಥಕೇಯ್ಯ ವಾ;

ವನ್ದನಾದಿಂ ಕರೇ ನಗ್ಗೋ, ಗಮನಂ ಭೋಜನಾದಿಕಂ.

೬೫. ಪರಿಕಮ್ಮಂ ಕರೇ ಕಾರೇ, ತಿಪಟಿಚ್ಛನ್ನಕಂ ವಿನಾ;

ಕಾಯಂ ನಹಾಯಂ ಘಂಸೇಯ್ಯ, ಕುಟ್ಟೇ ಥಮ್ಭೇ ತರುಮ್ಹಿ ವಾ.

೬೬. ಕುರುವಿನ್ದಕಸುತ್ತೇನ, ಅಞ್ಞಮಞ್ಞಸ್ಸ ಕಾಯತೋ;

ಅಗಿಲಾನೋ ಬಹಾರಾಮೇ, ಚರೇಯ್ಯ ಸಉಪಾಹನೋ.

೬೭. ಉಪಾಹನಂ ಯೋ ಧಾರೇತಿ, ಸಬ್ಬನೀಲಾದಿಕಮ್ಪಿ ಚ;

ನಿಮಿತ್ತಂ ಇತ್ಥಿಯಾ ರತ್ತೋ, ಮುಖಂ ವಾ ಭಿಕ್ಖದಾಯಿಯಾ.

೬೮. ಉಜ್ಝಾನಸಞ್ಞೀ ಅಞ್ಞಸ್ಸ, ಪತ್ತಂ ವಾ ಅತ್ತನೋ ಮುಖಂ;

ಆದಾಸಾದಿಮ್ಹಿ ಪಸ್ಸೇಯ್ಯ, ಉಚ್ಚಾಸನಮಹಾಸನೇ.

೬೯. ನಿಸಜ್ಜಾದಿಂ ಕರೋನ್ತಸ್ಸ, ದುಕ್ಕಟಂ ವನ್ದನೇಪಿ ಚ;