೪೮. ಸನ್ತೋಸನಿದ್ದೇಸವಣ್ಣನಾ

೪೫೯. ‘‘ಚತ್ತಾರಿಮಾನಿ, ಭಿಕ್ಖವೇ, ಅಪ್ಪಾನಿ ಚೇವ ಸುಲಭಾನಿ ಚ, ತಾನಿ ಚ ಅನವಜ್ಜಾನಿ. ಕತಮಾನಿ ಚತ್ತಾರಿ? ಪಂಸುಕೂಲಂ, ಭಿಕ್ಖವೇ, ಚೀವರಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ. ಪಿಣ್ಡಿಯಾಲೋಪೋ, ಭಿಕ್ಖವೇ, ಭೋಜನಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ. ರುಕ್ಖಮೂಲಂ, ಭಿಕ್ಖವೇ, ಸೇನಾಸನಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ. ಪೂತಿಮುತ್ತಭೇಸಜ್ಜಂ, ಭಿಕ್ಖವೇ, ಭೇಸಜ್ಜಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ. ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಅಪ್ಪಾನಿ ಚೇವ ಸುಲಭಾನಿ ಚ, ತಾನಿ ಚ ಅನವಜ್ಜಾನೀ’’ತಿ (ಅ. ನಿ. ೪.೨೭; ಇತಿವು. ೧೦೧) ವಚನತೋ ‘‘ಅಪ್ಪೇನಾ’’ತಿಆದಿ ವುತ್ತಂ.

ಸನ್ತುಟ್ಠೋತಿ ಏತ್ಥ ಯಥಾಲಾಭಯಥಾಬಲಯಥಾಸಾರುಪ್ಪಸನ್ತೋಸಾನಂ ವಸೇನ ಏಕೇಕಸ್ಮಿಂ ಪಚ್ಚಯೇ ತಯೋ ತಯೋ ಕತ್ವಾ ಚತೂಸು ಪಚ್ಚಯೇಸು ದ್ವಾದಸ ಸನ್ತೋಸಾ ಹೋನ್ತಿ. ಮತ್ತಞ್ಞೂತಿ ಏತ್ಥ (ಮ. ನಿ. ಅಟ್ಠ. ೧.೪೨೨; ಸಂ. ನಿ. ಅಟ್ಠ. ೩.೪.೨೩೯; ಅ. ನಿ. ಅಟ್ಠ. ೨.೩.೧೬; ಇತಿವು. ಅಟ್ಠ. ೨೮; ಧ. ಸ. ಅಟ್ಠ. ೧೨೪-೧೩೪) ಚತ್ತಾರೋ ಮತ್ತಾ ಪರಿಯೇಸನಮತ್ತಾ ಪಟಿಗ್ಗಹಣಮತ್ತಾ ಪರಿಭೋಗಮತ್ತಾ ವಿಸ್ಸಜ್ಜನಮತ್ತಾತಿ. ಇತರೀತರೇನ ಯಾಪೇನ್ತೋ ಸುಭರೋ ನಾಮ. ಸನ್ತೋಸವಿನಿಚ್ಛಯೋ.

ಸನ್ತೋಸನಿದ್ದೇಸವಣ್ಣನಾ ನಿಟ್ಠಿತಾ.