೪೭. ಸುದ್ಧಿನಿದ್ದೇಸವಣ್ಣನಾ

೪೫೫. ದೇಸನಾ ಸಂವರೋ ಏಟ್ಠಿ, ಪಚ್ಚವೇಕ್ಖಣ ಭೇದತೋತಿ (ಪಾರಾ. ಅಟ್ಠ. ೨.೫೮೫; ವಿಸುದ್ಧಿ. ೧.೧೯) ದೇಸನಾಸುದ್ಧಿ ಸಂವರಸುದ್ಧಿ ಪರಿಯೇಟ್ಠಿಸುದ್ಧಿ ಪಚ್ಚವೇಕ್ಖಣಸುದ್ಧೀತಿ ಏವಂ ಚತುಬ್ಬಿಧಾ ಸುದ್ಧೀತಿ ಅತ್ಥೋ. ಇದಾನಿ ತಾಹಿ ಸುದ್ಧೀಹಿ ವಿಸುಜ್ಝನಕೇ ದಸ್ಸೇತುಂ ‘‘ಪಾತಿಮೋಕ್ಖಸಂವರಸಮ್ಮತ’’ನ್ತಿಆದಿಮಾಹ.

೪೫೬. ‘‘ಪುನ ಏವಂ ನ ಕರಿಸ್ಸ’’ನ್ತಿ ಚಿತ್ತಾಧಿಟ್ಠಾನಸಂವರಾ ಯಸ್ಮಾ ಸುಜ್ಝತಿ ಇನ್ದ್ರಿಯಸಂವರೋ, ತಸ್ಮಾ ಇನ್ದ್ರಿಯಸಂವರೋ ‘‘ಸಂವರಸುದ್ಧೀ’’ತಿ ವುತ್ತೋತಿ ಸಮ್ಬನ್ಧೋ.

೪೫೭. ಪಹಾಯಾನೇಸನನ್ತಿ ಅನೇಸನಂ ಪಹಾಯ ಧಮ್ಮೇನ ಉಪ್ಪಾದೇನ್ತಸ್ಸ ಪಚ್ಚಯೇತಿ ಪಾಠಸೇಸೋ.

೪೫೮. ‘‘ಪಟಿಸಙ್ಖಾ ಯೋನಿಸೋ ಚೀವರಂ ಪಟಿಸೇವಾಮಿ…ಪೇ… ಉಪ್ಪನ್ನಾನಂ ವೇಯ್ಯಾಬಾಧಿಕಾನಂ…ಪೇ… ಪರಮತಾಯಾ’’ತಿ (ಮ. ನಿ. ೧.೨೩; ಅ. ನಿ. ೬.೫೮) ಚ ಏವಂ ಚತೂಸುಪಿ ಪಚ್ಚಯೇಸು ಯಥಾವುತ್ತಪಚ್ಚವೇಕ್ಖಣಸುಜ್ಝನಾತಿ ಅತ್ಥೋ. ಏತ್ಥ ಪನ ದುವಿಧಂ ಪಚ್ಚವೇಕ್ಖಣಂ ಪಟಿಲಾಭಕಾಲೇ ಚ ಪರಿಭೋಗಕಾಲೇ ಚ. ಪಟಿಲಾಭಕಾಲೇ ಹಿ ಧಾತುವಸೇನ ವಾ ಪಟಿಕ್ಕೂಲವಸೇನ ವಾ ಪಚ್ಚವೇಕ್ಖಿತ್ವಾ ಠಪಿತಚೀವರಾದೀನಿ ತತೋ ಉತ್ತರಿ ಪರಿಭುಞ್ಜನ್ತಸ್ಸ ಅನವಜ್ಜೋವ ಪರಿಭೋಗೋ, ಪರಿಭೋಗಕಾಲೇಪಿ. ಸುದ್ಧಿವಿನಿಚ್ಛಯೋ.

ಸುದ್ಧಿನಿದ್ದೇಸವಣ್ಣನಾ ನಿಟ್ಠಿತಾ.