೪೫. ಪವಾರಣಾನಿದ್ದೇಸವಣ್ಣನಾ

೪೩೩. ‘‘ಅನುಜಾನಾಮಿ, ಭಿಕ್ಖವೇ, ಪಞ್ಚನ್ನಂ ಸಙ್ಘೇ ಪವಾರೇತು’’ನ್ತಿ (ಮಹಾವ. ೨೧೫) ವುತ್ತತ್ತಾ ‘‘ಸೇಸಾ ಸಙ್ಘಪ್ಪವಾರಣಾ’’ತಿ (ಮಹಾವ. ೨೧೫ ಆದಯೋ) ವುತ್ತಾ.

೪೩೪. ಅಜ್ಜ ಪವಾರಣಾತಿ ಏತ್ಥ (ಮಹಾವ. ೨೧೫ ಆದಯೋ) ಪನ ಚಾತುದ್ದಸಿಕಾಯ ಪವಾರಣಾಯ ‘‘ಅಜ್ಜ ಪವಾರಣಾ ಚಾತುದ್ದಸೀ’’ತಿ ಪುಬ್ಬಕಿಚ್ಚಂ ಕಾತಬ್ಬಂ, ಪನ್ನರಸಿಯಂ ‘‘ಅಜ್ಜ ಪವಾರಣಾ ಪನ್ನರಸೀ’’ತಿ.

೪೩೭. ಥೇರೇಸು ಉಕ್ಕುಟಿಕಂ ನಿಸಜ್ಜ ಪವಾರೇನ್ತೇಸು ಸಯಂ ಪನ ನವೋ ಯಾವ ಪವಾರೇತಿ, ತಾವ ಉಕ್ಕುಟಿಕೋವ ಅಚ್ಛತೂತಿ ಅತ್ಥೋ. ‘‘ನ ಭಿಕ್ಖವೇ ಥೇರೇಸು ಉಕ್ಕುಟಿಕಂ ನಿಸಿನ್ನೇಸು ಪವಾರಯಮಾನೇಸು ಆಸನೇಸು ಅಚ್ಛಿತಬ್ಬಂ. ಯೋ ಅಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತದಮನ್ತರಾ ಉಕ್ಕುಟಿಕಂ ನಿಸೀದಿತುಂ, ಯಾವ ಪವಾರೇತಿ, ಪವಾರೇತ್ವಾ ಆಸನೇ ನಿಸೀದಿತು’’ನ್ತಿ (ಮಹಾವ. ೨೧೧) ಹಿ ವುತ್ತಂ.

೪೪೦-೨. ಏವಂ ತೇವಾಚಿಕಪ್ಪವಾರಣಂ ದಸ್ಸೇತ್ವಾ ಇದಾನಿ ದ್ವೇವಾಚಿಕಏಕವಾಚಿಕಸಮಾನವಸ್ಸಿಕಪ್ಪವಾರಣಾಸು ಕತ್ತಬ್ಬಂ ದಸ್ಸೇತುಂ ‘‘ದಾನೇನಾ’’ತಿಆದಿಮಾಹ. ತತ್ಥ ದಾನೇನಾತಿ ದಾನೇನ ವಾ. ಧಮ್ಮಸಾಕಚ್ಛಾತಿ ಇಮಿನಾ ಧಮ್ಮಕಥಾಸುತ್ತಸಙ್ಗಾಯನಾವಿನಯವಿನಿಚ್ಛಯಾದಯೋ ಗಹಿತಾ. ದಾನೇನ ವಾ ಧಮ್ಮಸಾಕಚ್ಛಾಯ ವಾ ಕಲಹೇನ ವಾ ರತ್ತಿಯಾ ಖೇಪಿತಭಾವತೋ ತೇವಾಚಿಕಾಯ ಓಕಾಸೇ ಅಸತಿ ದಸವಿಧೇ ವಾ ಅನ್ತರಾಯೇ ಅನುರೂಪತೋ ಉತ್ತಿಂ ಠಪೇತ್ವಾ ಪವಾರೇಯ್ಯಾತಿ ಸಮ್ಬನ್ಧೋ.

ಇದಾನಿ ಯಥಾನುರೂಪತೋ ಞತ್ತಿ ಠಪಿತಾ, ತಂ ದಸ್ಸೇತುಂ ‘‘ಸುಣಾತು ಮೇ’’ತಿಆದಿಮಾಹ. ಯಥಾಠಪಿತಞತ್ತಿಯಾತಿ ಏತ್ಥ ಸಬ್ಬಸಙ್ಗಾಹಿಕಾಚೇಞತ್ತಿಠಪಿತಾ, ತೇವಾಚಿಕದ್ವೇವಾಚಿಕಏಕವಾಚಿಕಾನಂ ವಸೇನ ಪವಾರೇತಬ್ಬಂ, ಸಮಾನವಸ್ಸಿಕಪ್ಪವಾರಣಾವ ಏಕಾ ನ ವಟ್ಟತಿ. ಸಚೇ ‘‘ಸಙ್ಘೋ ತೇವಾಚಿಕಂ ಪವಾರೇಯ್ಯಾ’’ತಿ ಠಪಿತಾ, ತೇವಾಚಿಕಾ ಏವ ವಟ್ಟತಿ, ದ್ವೇವಾಚಿಕಾದಯೋ ನ ವಟ್ಟನ್ತಿ. ‘‘ದ್ವೇವಾಚಿಕಂ ಪವಾರೇಯ್ಯಾ’’ತಿ ವುತ್ತೇ ದ್ವೇವಾಚಿಕಞ್ಚ ತೇವಾಚಿಕಞ್ಚ ವಟ್ಟತಿ, ಏಕವಾಚಿಕಸಮಾನವಸ್ಸಿಕಾ ನ ವಟ್ಟನ್ತಿ. ‘‘ಏಕವಾಚಿಕಂ ಪವಾರೇಯ್ಯಾ’’ತಿ ವುತ್ತೇ ಪನ ಸಮಾನವಸ್ಸಿಕಂ ಠಪೇತ್ವಾ ಸೇಸಾ ವಟ್ಟನ್ತಿ. ‘‘ಸಮಾನವಸ್ಸಿಕ’’ನ್ತಿ ಪನ ವುತ್ತೇ ಸಬ್ಬಂ ವಟ್ಟತೀತಿ. ಆದಿಕೇ ಚೇತ್ಥ ಆಹರೇತಿ ಏತ್ಥ ಪವಾರಣಾಯಪಿ ಪುಬ್ಬೇ ಉಪೋಸಥೇ ವುತ್ತೇ ‘‘ಯದಿ ಸಮಾ ಆಗಚ್ಛೇಯ್ಯು’’ನ್ತಿಆದಿಕೇ ವಾರೇ ಆಹರೇತಿ ಅತ್ಥೋ.

೪೪೩. ಇದಾನಿ ವತ್ತಬ್ಬಂ ಸನ್ಧಾಯ ‘‘ಏವ’’ನ್ತಿ ವುತ್ತಂ. ತಿವಗ್ಗೋ ಚ ಚತುವಗ್ಗೋ ಚ ತಿಚತುವಗ್ಗೋ.

೪೫೦. ‘‘ನ ಭಿಕ್ಖವೇ ಸಾಪತ್ತಿಕೇನ ಪವಾರೇತಬ್ಬಂ. ಯೋ ಪವಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ (ಮಹಾವ. ೨೩೫) ವುತ್ತತ್ತಾ ಸಾಪತ್ತಿಕೇನಪಿ ವೇಮತಿಕೇನಪಿ ಪವಾರಿಯಮಾನೇ ಆಪತ್ತಿಂ ಸರನ್ತೇನಪಿ ಉಪೋಸಥೇ ವುತ್ತನಯೇನ ಪಟಿಪಜ್ಜಿತಬ್ಬಂ. ‘‘ವಗ್ಗೇ ಸಮಗ್ಗೇ ವಗ್ಗೋತಿ-ಸಞ್ಞಿನೋ ವಿಮತಿಸ್ಸ ವಾ’’ತಿಆದಿಗಾಥಾತೋ ಪಟ್ಠಾಯ ಯಾವ ‘‘ಅನ್ತರಾಯಂ ವ ಸಙ್ಘಂ ವಾ-ಧಿಟ್ಠಾತುಂ ಸೀಮಮೇವ ವಾ’’ತಿ ಅವಸಾನಗಾಥಾ, ತಾವ ಸೇಸಾ ಉಪೋಸಥೇ ವುತ್ತಾ ಗಾಥಾಯೋತಿ ಅಧಿಪ್ಪೇತಾ.

೪೫೧. ಪವಾರಿತೇ ಚಾತಿ (ಮಹಾವ. ೨೧೩ ಆದಯೋ) ಪಠಮಪವಾರಣಾಯ ಸಙ್ಘಮ್ಹಿ ಪವಾರಿತೇತಿ ಅಧಿಪ್ಪಾಯೋ. ಏತ್ಥ ಅವುತ್ಥೋತಿ ಪಚ್ಛಿಮಿಕಾಯ ಉಪಗತೋ ಅಪರಿನಿಟ್ಠಿತತ್ತಾ ‘‘ಅವುತ್ಥೋ’’ತಿ ವುಚ್ಚತಿ.

೪೫೨. ಚಾತುಮಾಸಿನೀತಿ ಕತ್ತಿಕಪುಣ್ಣಮೀ. ಏತ್ಥ ವುತ್ಥವಸ್ಸಾ ನಾಮ ಪಚ್ಛಿಮಿಕಾಯ ಉಪಗತಾ. ಪವಾರಣಾವಿನಿಚ್ಛಯೋ.

ಪವಾರಣಾನಿದ್ದೇಸವಣ್ಣನಾ ನಿಟ್ಠಿತಾ.