೩೫. ಪರಿಕ್ಖಾರನಿದ್ದೇಸವಣ್ಣನಾ

೨೫೯-೨೬೦. ಗಿರಿಕೂಟನ್ತಿ ಮಕರದನ್ತಕಂ. ಸಿಬ್ಬಿತುಞ್ಚ ಛಿನ್ದಿತುಞ್ಚ ನ ವಟ್ಟತೀತಿ ಸಬ್ಬತ್ಥ ಯೋಜನಾ. ದಣ್ಡೇತಿ ಛತ್ತದಣ್ಡೇ.

೨೬೧. ಸಿಬ್ಬಿತುಂ ವಾ ಪಞ್ಜರಂ ವಿನನ್ಧಿತುಂ ವಾ ಥಿರತ್ಥಂ ಛತ್ತೇ ಬನ್ಧಿತುಂ ದಣ್ಡೇ ಲೇಖಾ ವಟ್ಟತೀತಿ ಸಮ್ಬನ್ಧೋ. ಸಚೇ ವುತ್ತಪ್ಪಕಾರಂ ಅಕಪ್ಪಿಯಛತ್ತಂ ಲಭತಿ, ಘಟಕಮ್ಪಿ ವಾಳರೂಪಮ್ಪಿ ಛಿನ್ದಿತ್ವಾ ಧಾರೇತಬ್ಬಂ, ಲೇಖಾಪಿ ಘಂಸೇತ್ವಾ ಅಪನೇತಬ್ಬಾ, ಸುತ್ತಕೇನ ವಾ ದಣ್ಡೋ ವೇಠೇತಬ್ಬೋ.

೨೬೨. ಅನುವಾತಂ ಸನ್ಧಾಯ ‘‘ಅನ್ತೇ ವಾ’’ತಿ ವುತ್ತಂ. ದ್ವಿನ್ನಂ ಪಟ್ಟಾನಂ ಸಙ್ಘಟಿತಟ್ಠಾನಂ ಸನ್ಧಾಯ ‘‘ಪಟ್ಟಮುಖೇ ವಾಪೀ’’ತಿ ವುತ್ತಂ. ವರಕಸೀಸಾಕಾರೇನ ಸಿಬ್ಬನಂ ಸನ್ಧಾಯ ‘‘ವೇಣಿಕಾ’’ತಿ ಚ ಸತಪದಾಕಾರೇನ ಸಿಬ್ಬನಂ ಸನ್ಧಾಯ ‘‘ಸಙ್ಖಲಿಕಾಪಿ ವಾ’’ತಿ ಚ ವುತ್ತಂ. ಸತಪದಿಸದಿಸಂ ಅಞ್ಞಂ ವಾ ಸೂಚಿವಿಕಾರಂ ನ ಕಪ್ಪತಿ, ಪಕತಿಸೂಚಿಕಮ್ಮಮೇವ ವಟ್ಟತೀತಿ ಅತ್ಥೋ. ಪಾಳಿಕಣ್ಣಿಕಆದಿಕಂ ಚೀವರೇ ನ ಚ ಕಪ್ಪತೀತಿ ಸಮ್ಬನ್ಧೋ.

೨೬೩-೪. ಚತುಕೋಣಾವ (ಪಾರಾ. ಅಟ್ಠ. ೧.೮೫) ಕಪ್ಪರೇತಿ ಸಮ್ಬನ್ಧೋ. ಅಗ್ಘಿಕನ್ತಿ ಅಗ್ಘಿಯಂ ಚೇತಿಯಸದಿಸಂ. ಏತ್ಥಾತಿ ಗಣ್ಠಿಪಾಸಕಪಟ್ಟೇ. ಕೋಣಸುತ್ತಾ ಚ ಪೀಳಕಾತಿ ನ ಕೇವಲಂ ಚತುಕೋಣಾ ಗಣ್ಠಿಕಪಾಸಕಪಟ್ಟಾವ ಕಪ್ಪನ್ತಿ, ಅಥ ಖೋ ದುವಿಞ್ಞೇಯ್ಯಾ ಕೋಣಸುತ್ತಪೀಳಕಾ ಚ ಕಪ್ಪರೇತಿ ಅತ್ಥೋ. ಗನ್ಧಂ ತೇಲಂ ವಾತಿ ಗನ್ಧಂ ವಾ ತೇಲಂ ವಾ.

೨೬೫. ರತ್ತನ್ತಿ (ಪಾರಾ. ಅಟ್ಠ. ೧.೮೫) ರಜಿತಂ. ಅಞ್ಞೇನ ವಾತಿ ಮುಗ್ಗರಾದಿನಾ ವಾ. ಕತ್ವಾತಿ ಠಪೇತ್ವಾ. ಪಹಾರೇ ನ ಚ ಮುಟ್ಠಿನಾತಿ ಮುಟ್ಠಿನಾ ನ ಪಹಾರೇಯ್ಯಾತಿ ಅತ್ಥೋ.

೨೬೬-೭. ಛತ್ತವಟ್ಟಿಯಂ (ಪಾರಾ. ಅಟ್ಠ. ೧.೮೫) ಲೇಖಂ ಠಪೇತ್ವಾ ಧಮ್ಮಕರಣೇ ಲೇಖಾ ನ ವಟ್ಟತೀತಿ ಸಮ್ಬನ್ಧೋ. ಕುಞ್ಚಿಕಾಯ ಚ ಪಿಪ್ಫಲೇ ಚ ಮಣಿಕಾ ಚ ಪೀಳಕಾ ಚ ನ ವಟ್ಟತೀತಿ ಸಮ್ಬನ್ಧೋ. ತತ್ಥ ಮಣಿಕಾತಿ ಏಕಾ ಏವ ವಟ್ಟಮಣಿಕಾ. ಪೀಳಕಾ ಮುತ್ತರಾಜಿಸದಿಸಾ ಬಹೂ.

೨೬೮-೯. ಮಾಲಾದ್ಯರಣಿಯನ್ತಿ (ಪಾರಾ. ಅಟ್ಠ. ೧.೮೫) ಅರಣಿಯಂ ಮಾಲಾದಿ ವಣ್ಣಮಟ್ಠಂ ನ ವಟ್ಟತೀತಿ ಸಮ್ಬನ್ಧೋ. ಏವಂ ಸಬ್ಬತ್ಥ. ತಿಪುಸೀಸಮಯೇ ಪತ್ತಮಣ್ಡಲೇ ಭಿತ್ತಿಕಮ್ಮಞ್ಚ ನ ವಟ್ಟತೀತಿ ಅತ್ಥೋ. ಹಿತ್ವಾತಿ ಠಪೇತ್ವಾ. ಸೂಚಿಸಣ್ಡಾಸಕೋ (ಪಾರಾ. ಅಟ್ಠ. ೧.೮೫) ನಾಮ ಸೂಚಿಂ ಡಂಸಾಪೇತ್ವಾ ಘಂಸಿತುಂ ಕತೋ ದಾರುಮಯೋ. ‘‘ಅನುಜಾನಾಮಿ, ಭಿಕ್ಖವೇ, ಮಕರದನ್ತಕಂ ಛಿನ್ದಿತು’’ನ್ತಿ (ಚೂಳವ. ೨೫೩) ವುತ್ತತ್ತಾ ಪತ್ತಮಣ್ಡಲೇ ಮಕರದನ್ತಕಂ ವಟ್ಟತಿ, ಅಞ್ಞಂ ಭಿತ್ತಿಕಮ್ಮಾದಿವಿಕಾರಮೇವ ನ ವಟ್ಟತಿ, ತಸ್ಮಾ ಗಿರಿಕೂಟಂ ಪತ್ತಮಣ್ಡಲೇ ಠಪೇತ್ವಾ ಅವಸೇಸೇ ನ ವಟ್ಟತೀತಿ ವೇದಿತಬ್ಬಂ.

೨೭೨. ಸೇನಾಸನೇತಿ (ಪಾರಾ. ಅಟ್ಠ. ೧.೮೫) ಪಾಸಾದಾದಿಸೇನಾಸನೇತಿ ಅತ್ಥೋ.

೨೭೩. ಪುಮಿತ್ಥಿರೂಪರಹಿತನ್ತಿ ಪುರಿಸರೂಪಇತ್ಥಿರೂಪರಹಿತನ್ತಿ ಅತ್ಥೋ. ಪರಿಕ್ಖಾರವಿನಿಚ್ಛಯೋ.

ಪರಿಕ್ಖಾರನಿದ್ದೇಸವಣ್ಣನಾ ನಿಟ್ಠಿತಾ.