೩೬. ಭೇಸಜ್ಜನಿದ್ದೇಸವಣ್ಣನಾ

೨೭೪-೫. ಸಹಧಮ್ಮಿನಂ ಲಬ್ಭಂ ಭೇಸಜ್ಜಕರಣನ್ತಿ ಸಮ್ಬನ್ಧೋ. ನ ಕೇವಲಂ ಪಞ್ಚನ್ನಂ ಸಹಧಮ್ಮಿಕಾನಂಯೇವ ಭಿಕ್ಖಾಚರಿಯವಿಞ್ಞತ್ತಿಸಕೇಹಿ ಭೇಸಜ್ಜಕರಣಂ ಲಬ್ಭತಿ, ಅಥ ಖೋ ಅಪರೇಸಮ್ಪಿ ಪಞ್ಚನ್ನಂ ಲಬ್ಭತಿ, ತೇ ದಸ್ಸೇನ್ತೋ ‘‘ಪಿತೂನ’’ನ್ತಿಆದಿಮಾಹ. ಪಿತೂನನ್ತಿ ಮಾತಾಪಿತೂನನ್ತಿ ಅತ್ಥೋ. ಯೇ ಮಾತಾಪಿತರೋ ಜಗ್ಗನ್ತಿ ಉಪಟ್ಠಹನ್ತಿ, ತೇ ತದುಪಟ್ಠಾಕಾ ನಾಮ. ಭಿಕ್ಖುಂ ಏವ ನಿಸ್ಸಾಯ ಜೀವನ್ತೋ ಭಿಕ್ಖುನಿಸ್ಸಿತಕೋ ನಾಮ. ಪಬ್ಬಜ್ಜಾಪೇಕ್ಖೋ ‘‘ಭಣ್ಡೂ’’ತಿ ವುಚ್ಚತಿ.

೨೭೬. ಅಪರೇಸಮ್ಪಿ ದಸನ್ನಂ ಕಾತುಂ ವಟ್ಟತಿ, ತೇ ದಸ್ಸೇತುಂ ‘‘ಮಹಾಚೂಳಪಿತಾ’’ತಿಆದಿಮಾಹ. ಏತ್ಥ (ಪಾರಾ. ಅಟ್ಠ. ೨.೧೮೫-೧೮೭) ಪನ ಮಹಾಪಿತಾ ಚೂಳಪಿತಾ ಮಹಾಮಾತಾ ಚೂಳಮಾತಾ ಮಹಾಭಾತಾ ಚೂಳಭಾತಾ ಮಹಾಭಗಿನೀ ಚೂಳಭಗಿನೀತಿ ಇಮೇಹಿ ಅಟ್ಠಹಿ ಆದಿ-ಸದ್ದೇನ ಪಿತುಭಗಿನಿಞ್ಚ ಮಾತುಭಾತಿಕಞ್ಚ ಗಹೇತ್ವಾ ದಸ. ಏತೇಸಂ ಪನ ಸಕೇನ ಭೇಸಜ್ಜೇನ ಕಾತಬ್ಬಂ. ಅತ್ತನಿಯೇ ಚ ಅಸತೀತಿ ಪಾಠಸೇಸೋ.

೨೭೭. ನ ಕೇವಲಞ್ಚ ಏತೇಸಂ ದಸನ್ನಂ, ಇಮೇಹಿ ಸಮ್ಬನ್ಧಾನಂ ಪುತ್ತನತ್ತಾದೀನಂ ಯಾವಸತ್ತಮಾ ಕುಲಪರಿವಟ್ಟಾ ಕಾತುಂ ವಟ್ಟತೀತಿ ದಸ್ಸನತ್ಥಂ ‘‘ಕುಲದೂಸನಾ’’ತಿಆದಿಮಾಹ. ಅಞ್ಞೋಪಿ (ಪಾರಾ. ಅಟ್ಠ. ೨.೨೮೫-೨೮೭) ಯೋ ಆಗನ್ತುಕೋ ವಾ ಚೋರೋ ವಾ ಯುದ್ಧಪರಾಜಿತೋ ವಾ ಇಸ್ಸರೋ ಞಾತಕೇಹಿ ಪರಿಚ್ಚತ್ತೋ ವಾ ಗಮಿಯಮನುಸ್ಸೋ ವಾ ಗಿಲಾನೋ ಹುತ್ವಾ ವಿಹಾರಂ ಪವಿಸತಿ, ಸಬ್ಬೇಸಮ್ಪಿ ಅಪಚ್ಚಾಸೀಸನ್ತೇನ ಭೇಸಜ್ಜಂ ಕಾತಬ್ಬಂ.

೨೭೮. ಮಾತಾ (ಪಾರಾ. ಅಟ್ಠ. ೨.೧೮೫-೧೮೭) ಪಿತಾ ತದುಪಟ್ಠಾಕೋ ಭಿಕ್ಖುನಿಸ್ಸಿತಕೋ ಪಣ್ಡುಪಲಾಸೋ ವೇಯ್ಯಾವಚ್ಚಕರೋತಿ ಇಮೇಸಂ ಛನ್ನಂ ಅನಾಮಟ್ಠಪಿಣ್ಡಪಾತೋ ಅವಾರಿತೋತಿ ಅತ್ಥೋ. ಕಿಞ್ಚ ಭಿಯ್ಯೋ – ದಾಮರಿಕಚೋರಸ್ಸ ಚ ಇಸ್ಸರಿಯಸ್ಸ ಚ ದಾತುಮವಾರಿತೋತಿ ಅತ್ಥೋ.

೨೭೯. ತೇಸನ್ತಿ (ಪಾರಾ. ಅಟ್ಠ. ೨.೧೮೫-೧೮೭) ಗಹಟ್ಠಾನಂ. ಸಾಸನೋಗಧನ್ತಿ ರತನಪರಿತ್ತಆಟಾನಾಟಿಯಪರಿತ್ತಾದಿಪರಿತ್ತಂ ಭಣಿತಬ್ಬನ್ತಿ ಅತ್ಥೋ.

೨೮೦. ‘‘ಆಗನ್ತ್ವಾ (ಪಾರಾ. ಅಟ್ಠ. ೨.೧೮೫-೧೮೭) ಸೀಲಂ ದೇತು, ಧಮ್ಮಞ್ಚ ಪರಿತ್ತಞ್ಚ ಭಾಸತೂ’’ತಿ ಕೇನಚಿ ಪೇಸಿತೋತಿ ಸಮ್ಬನ್ಧೋ. ದಾತುಂ ವತ್ತುನ್ತಿ ಸೀಲಂ ದಾತುಂ, ಧಮ್ಮಞ್ಚ ಪರಿತ್ತಞ್ಚ ವತ್ತುಂ ಲಬ್ಭತೀತಿ ಅತ್ಥೋ. ಭೇಸಜ್ಜವಿನಿಚ್ಛಯೋ.

ಭೇಸಜ್ಜನಿದ್ದೇಸವಣ್ಣನಾ ನಿಟ್ಠಿತಾ.