೩೦. ವತ್ತನಿದ್ದೇಸವಣ್ಣನಾ

೨೧೩. ಇದಾನಿ ಆಗನ್ತುಕವತ್ತಾದೀನಿ ದಸ್ಸೇತುಂ ‘‘ವತ್ತ’’ನ್ತಿ ಮಾತಿಕಾಪದಂ ಉದ್ಧಟಂ. ಪರಿಕ್ಖಿತ್ತಸ್ಸ (ಚೂಳವ. ೩೫೬ ಆದಯೋ; ಚೂಳವ. ಅಟ್ಠ. ೩೫೭ ಆದಯೋ) ವಿಹಾರಸ್ಸ ಪರಿಕ್ಖೇಪಂ, ಅಪರಿಕ್ಖಿತ್ತಸ್ಸ ದ್ವೀಹಿ ಲೇಡ್ಡುಪಾತೇಹಿ ಪರಿಚ್ಛಿನ್ನಟ್ಠಾನಂ ಪತ್ವಾ ಉಪಾಹನಂ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಉಪಾಹನಂ ದಣ್ಡಕೇನ ಗಹೇತ್ವಾ ಛತ್ತಂ ಅಪನಾಮೇತ್ವಾ ಸೀಸಂ ವಿವರಿತ್ವಾ ಸೀಸೇ ಚೀವರಂ ಖನ್ಧೇ ಕರಿತ್ವಾ ಸಾಧುಕಂ ಅತರಮಾನೇನ ಆರಾಮೋ ಪವಿಸಿತಬ್ಬೋತಿ ಅತ್ಥೋ.

೨೧೪. ಪುಚ್ಛೇಯ್ಯ ಸಯನಾಸನನ್ತಿ ‘‘ಕತಮಂ ಮೇ ಸೇನಾಸನಂ ಪಾಪುಣಾತಿ, ಕಿಂ ಅಜ್ಝಾವುತ್ಥಂ ವಾ ಅನಜ್ಝಾವುತ್ಥಂ ವಾ’’ತಿ ಏವಂ ಪುಚ್ಛಿತಬ್ಬನ್ತಿ ಅತ್ಥೋ.

೨೧೫-೬. ಮಞ್ಚಪೀಠಾದಿದಾರುಭಣ್ಡಞ್ಚ (ಚೂಳವ. ೩೬೦; ಚೂಳವ. ಅಟ್ಠ. ೩೬೦) ರಜನಭಾಜನಾದಿಮತ್ತಿಕಾಭಣ್ಡಞ್ಚ. ಆಪುಚ್ಛಾತಿ ಭಿಕ್ಖುಸ್ಸ ವಾ ಸಾಮಣೇರಸ್ಸ ವಾ ಆರಾಮಿಕಸ್ಸ ವಾ ‘‘ಆವುಸೋ ಇಮಂ ಜಗ್ಗಾಹೀ’’ತಿ ಆರೋಚೇತ್ವಾತಿ ಅತ್ಥೋ. ಅಞ್ಞಥಾತಿ ಏವಂ ಅಕತ್ವಾತಿ ಅತ್ಥೋ.

೨೧೭-೮. ವುಡ್ಢಾಗನ್ತುಕಸ್ಸಾತಿ ಏತ್ಥ (ಚೂಳವ. ೩೫೮ ಆದಯೋ; ಚೂಳವ. ಅಟ್ಠ. ೩೫೯ ಆದಯೋ) ದೂರತೋವ ದಿಸ್ವಾ ಯದಿ ‘‘ವುಡ್ಢೋ’’ತಿ ಜಾನಾತಿ, ತಸ್ಮಿಂ ಅನಾಗತೇ ಏವ ಆಸನಪಞ್ಞಾಪನಾದಿವತ್ತಂ ಕಾತಬ್ಬನ್ತಿ ಅತ್ಥೋ. ಪಾದೋದಪ್ಪಭುತಿನ್ತಿ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬನ್ತಿ ಅತ್ಥೋ. ಪಾನೀಯೇನ ಆಪುಚ್ಛನ್ತೇನ ಸಚೇ ಸಕಿಂ ಆನೀತಂ ಪಾನೀಯಂ ಸಬ್ಬಂ ಪಿವತಿ, ಪುನಪಿ ಆಪುಚ್ಛಿತಬ್ಬೋ ಏವ. ಪಞ್ಞಪೇತಿ ‘‘ಏತಂ ತುಮ್ಹಾಕಂ ಸೇನಾಸನಂ ಪಾಪುಣಾತೀ’’ತಿ ಏವಂ ಆಚಿಕ್ಖಿತಬ್ಬನ್ತಿ ಅತ್ಥೋ.

೨೧೯-೨೦. ‘‘ಭಿಕ್ಖಾಚಾರಗಾಮೋ ಇತೋ ದೂರೇ’’ತಿ ವಾ ‘‘ಸನ್ತಿಕೇ’’ತಿ ವಾ ‘‘ಕಾಲಸ್ಸೇವ ಪಿಣ್ಡಾಯ ಚರಿತಬ್ಬ’’ನ್ತಿ ವಾ ‘‘ಉಪಟ್ಠಾಕೇ ಚರಿತಬ್ಬ’’ನ್ತಿ ವಾ ಗೋಚರೋ ಆಚಿಕ್ಖಿತಬ್ಬೋ. ಅಗೋಚರೋತಿ ಮಿಚ್ಛಾದಿಟ್ಠಿಕಾನಂ ವಾ ಗಾಮೋ, ಪರಿಚ್ಛಿನ್ನಭಿಕ್ಖಕೋ ವಾ ಗಾಮೋ, ಯತ್ಥ ಏಕಸ್ಸ ವಾ ದ್ವಿನ್ನಂ ವಾ ಭಿಕ್ಖಾ ದೀಯತಿ, ಸೋ ಆಚಿಕ್ಖಿತಬ್ಬೋತಿ ಅತ್ಥೋ. ಕತಿಕನ್ತಿ ಸಙ್ಘಸ್ಸ ಕತಿಕಟ್ಠಾನಂ. ‘‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’’ನ್ತಿ ಏವಂ ಪವೇಸನನಿಕ್ಖಮನಕಾಲಂ ಆಚಿಕ್ಖಿತಬ್ಬಂ. ಕೇಸುಚಿ ಠಾನೇಸು ಅಮನುಸ್ಸಾ ವಾ ವಾಳಾ ವಾ ಹೋನ್ತಿ, ತಸ್ಮಾ ಏವಂ ಆಚಿಕ್ಖಿತಬ್ಬಮೇವ. ನಿಸಿನ್ನೋವಾತಿ ಇದಂ ಆಪತ್ತಿಅಭಾವಮತ್ತದೀಪಕಂ, ಉಟ್ಠಹಿತ್ವಾಪಿ ಸಬ್ಬಂ ಕಾತುಂ ವಟ್ಟತೇವ. ವತ್ತವಿನಿಚ್ಛಯೋ.

ವತ್ತನಿದ್ದೇಸವಣ್ಣನಾ ನಿಟ್ಠಿತಾ.