೨೯. ಮಿಚ್ಛಾಜೀವವಿವಜ್ಜನಾನಿದ್ದೇಸವಣ್ಣನಾ

೨೦೯. ಚುಣ್ಣನ್ತಿ ಸಿರೀಸಚುಣ್ಣಾದಿಕನ್ತಿ ಅತ್ಥೋ. ಮತ್ತಿಕಾತಿ ಪಕತಿಮತ್ತಿಕಾ ವಾ ಪಞ್ಚವಣ್ಣಾ ವಾ ಸುದ್ಧಾ ಕುಙ್ಕುಟ್ಠಆದಿಕಾ ವಾ. ಕುಲಸಙ್ಗಹಾತಿ ಏತೇಹಿ ಸಙ್ಗಹಿತಾನಂ ಸನ್ತಿಕೇ ಲಾಭಾಸಾಯ ಕುಲಸಙ್ಗಹತ್ಥನ್ತಿ ಅತ್ಥೋ. ಏತ್ಥ ಪನ ಇಮೇಹಿ ಸಙ್ಗಹಿತಾನಂ ಸನ್ತಿಕೇ ‘‘ಕಿಞ್ಚಿ ಲಭಿಸ್ಸಾಮೀ’’ತಿ ಸಙ್ಘಿಕಂ ವಾ ಪುಗ್ಗಲಿಕಂ ವಾ ದಾತುಂ ನ ವಟ್ಟತಿ ಏವ. ಇಮಿನಾ ಪನ ನಯೇನ ಲದ್ಧಂ ಪಞ್ಚನ್ನಮ್ಪಿ ಸಹಧಮ್ಮಿಕಾನಂ ನ ವಟ್ಟತಿ, ಮಿಚ್ಛಾಜೀವಞ್ಚ ಹೋತಿ.

೨೧೦-೨೧೧. ಲಾಭಾಸಾಯ ದಾಯಕಾನಂ ದಾರಕೇ ಉಕ್ಖಿಪಿತ್ವಾ ಪರಿಭಟಭಾವೋ ಪಾರಿಭಟಕತಾ, ತಾಯ ಪಾರಿಭಟಕತಾಯ ನ ಜೀವಯೇತಿ ಸಮ್ಬನ್ಧೋ. ಸೇಸೇಸುಪಿ ಏಸೇವ ನಯೋ. ಖೇತ್ತಾದೀಸು ಪೇಸಿತಸ್ಸ ಗಮನಂ ಪಹೇಣಕಮ್ಮಂ. ಸಾಸನಪ್ಪಟಿಸಾಸನಹರಣಂ ದೂತಕಮ್ಮಂ. ಪೇಸಿತಸ್ಸ ಗೇಹತೋ ಗೇಹಗಮನಂ ಜಙ್ಘಪೇಸನಿಯಂ. ಲಾಭಾಸಾಯ ಲಞ್ಜದಾನಮನುಪ್ಪದಾನಂ. ಅಞ್ಞೇನ ವಾಪೀತಿ ಅಙ್ಗವಿಜ್ಜಾದಿನಾ.

೨೧೨. ವಿಞ್ಞತ್ತೀತಿ (ಪಾರಾ. ೫೧೫ ಆದಯೋ; ಪಾರಾ. ಅಟ್ಠ. ೨.೫೧೫ ಆದಯೋ) ಅಞ್ಞಾತಕವಿಞ್ಞತ್ತಿ. ಅನೇಸನಾತಿ ಪುಬ್ಬೇ ವುತ್ತೇನ ಪುಪ್ಫದಾನಾದಿನಾ ಪಚ್ಚಯೇಸನಾ. ಕುಹನಾದೀಹೀತಿ (ವಿಭ. ೮೬೧; ವಿಭ. ಅಟ್ಠ. ೮೬೧; ಮಹಾನಿ. ೮೭) ಕುಹನಾ ಲಪನಾ ನೇಮಿತ್ತಕತಾ ನಿಪ್ಪೇಸಿಕತಾ ಲಾಭೇನ ಲಾಭಂ ನಿಜಿಗೀಸನತಾತಿ ಇಮೇಹಿ ಪಞ್ಚಹಿ ವತ್ಥೂಹೀತಿ ಅತ್ಥೋ. ಮಿಚ್ಛಾಜೀವವಿನಿಚ್ಛಯೋ.

ಮಿಚ್ಛಾಜೀವವಿವಜ್ಜನಾನಿದ್ದೇಸವಣ್ಣನಾ ನಿಟ್ಠಿತಾ.