೨೬. ಸಮಾನಾಸನಿಕನಿದ್ದೇಸವಣ್ಣನಾ

೧೯೫. ತಿಣ್ಣಂ ವಸ್ಸಾನಂ ಅನ್ತರಂ ತಿವಸ್ಸನ್ತರಂ. ‘‘ಅನುಜಾನಾಮಿ, ಭಿಕ್ಖವೇ, ತಿವಸ್ಸನ್ತರೇನ ಸಹ ನಿಸೀದಿತು’’ನ್ತಿ (ಚೂಳವ. ೩೨೦) ಹಿ ವುತ್ತಂ. ಯೋ ದ್ವೀಹಿ ವಸ್ಸೇಹಿ (ಚೂಳವ. ಅಟ್ಠ. ೩೨೦) ವುಡ್ಢೋ ವಾ ನವೋ ವಾ, ಸೋ ತಿವಸ್ಸನ್ತರೋ ನಾಮ.

೧೯೬. ಮುನೀತಿ ಬುದ್ಧಮುನಿ. ಸಬ್ಬೇಹೇವಾತಿ ಅನುಪಸಮ್ಪನ್ನೇಹಿಪಿ.

೧೯೭. ಅನ್ತನ್ತಿ ಪಚ್ಛಿಮಂ. ‘‘ಅನುಜಾನಾಮಿ, ಭಿಕ್ಖವೇ, ಯಂ ತಿಣ್ಣಂ ಪಹೋತಿ, ಏತ್ತಕಂ ಪಚ್ಛಿಮಂ ದೀಘಾಸನ’’ನ್ತಿ (ಚೂಳವ. ೩೨೦) ವುತ್ತತ್ತಾ ಯಂ ತಿಣ್ಣಂ ಪಹೋತಿ, ಏತಂ ಸಂಹಾರಿಮಂ ವಾ ಹೋತು ಅಸಂಹಾರಿಮಂ ವಾ, ತಥಾರೂಪೇಸು ಫಲಕಖಣ್ಡೇಸುಪಿ ನಿಸೀದಿತುಂ ವಟ್ಟತಿ. ದ್ವಿನ್ನನ್ತಿ ದ್ವಿನ್ನಂ ಸಮಾನಾಸನಿಕಾನಂ. ‘‘ಅನುಜಾನಾಮಿ, ಭಿಕ್ಖವೇ, ದುವಗ್ಗಸ್ಸ ಮಞ್ಚಂ ದುವಗ್ಗಸ್ಸ ಪೀಠ’’ನ್ತಿ (ಚುಳವ. ೩೨೦) ವುತ್ತತ್ತಾ ದ್ವೇ ಸಮಾನಾಸನಿಕಾ ಸಹ ನಿಸೀದಿತುಂ ಲಭನ್ತಿ. ಅಞ್ಞೇಹಿ ಅಸಮಾನಾಸನಿಕೇಹಿ, ಅನುಪಸಮ್ಪನ್ನಾದೀಹಿ ವಾ ದ್ವೇ ಹುತ್ವಾಪಿ ನಿಸೀದಿತುಂ ನ ಲಭನ್ತಿ. ಸಮಾನಾಸನಿಕವಿನಿಚ್ಛಯೋ.

ಸಮಾನಾಸನಿಕನಿದ್ದೇಸವಣ್ಣನಾ ನಿಟ್ಠಿತಾ.