೨೭. ಅಸಂವಾಸಿಕನಿದ್ದೇಸವಣ್ಣನಾ

೧೯೮. ಉಕ್ಖಿತ್ತೋತಿ ಆಪತ್ತಿಯಾ ಅದಸ್ಸನೇ, ಅಪ್ಪಟಿಕಮ್ಮೇ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ವಾ ಉಕ್ಖಿತ್ತಕೋತಿ ತಿವಿಧೋಪಿ ಇಧ ಉಕ್ಖಿತ್ತೋ ಗಹಿತೋ. ಅನುಪಸಮ್ಪನ್ನೋತಿ ಇಮಿನಾ ಸಿಕ್ಖಮಾನಸಾಮಣೇರಸಾಮಣೇರೀಸಿಕ್ಖಾಪಚ್ಚಕ್ಖಾತಕಾ ಗಹಿತಾತಿ ವೇದಿತಬ್ಬಾ. ಛಿನ್ನಮೂಲಕೋ ನಾಮ ಅನ್ತಿಮವತ್ಥುಂ ಅಜ್ಝಾಪನ್ನಕೋ. ನಾನಾಸಂವಾಸೋತಿ ಲದ್ಧಿನಾನಾಸಂವಾಸಕೋ. ‘‘ನಾನಾಸೀಮಾಯ ಠಿತಚತುತ್ಥೋ ಕಮ್ಮಂ ಕರೇಯ್ಯ, ಇದ್ಧಿಯಾ ವೇಹಾಸೇ ಠಿತಚತುತ್ಥೋ ಕಮ್ಮಂ ಕರೇಯ್ಯ, ಅಕಮ್ಮಂ ನ ಚ ಕರಣೀಯ’’ನ್ತಿ ಹಿ ವುತ್ತತ್ತಾ ಇಮೇಪಿ ‘‘ಅಸಂವಾಸಿಕಾ’’ತಿ ವುತ್ತಾ. ಏತೇಸು ಪನ ಉಕ್ಖಿತ್ತಕೇಹಿ ಸದ್ಧಿಂ ಉಪೋಸಥಾದೀನಿ ಕರೋನ್ತೋ ಪಾಚಿತ್ತಿಯಂ ಆಪಜ್ಜತಿ. ನಿಸ್ಸೀಮಟ್ಠವೇಹಾಸಟ್ಠೇಹಿ ಕರೋನ್ತಸ್ಸ ಕಮ್ಮಂ ಕುಪ್ಪತಿ, ದುಕ್ಕಟಞ್ಚ ಹೋತಿ, ಇತರೇಹಿ ದುಕ್ಕಟಂ. ಅಸಂವಾಸಿಕವಿನಿಚ್ಛಯೋ.

ಅಸಂವಾಸಿಕನಿದ್ದೇಸವಣ್ಣನಾ ನಿಟ್ಠಿತಾ.