೧೬. ವಚ್ಚಪ್ಪಸ್ಸಾವಟ್ಠಾನಿಕನಿದ್ದೇಸವಣ್ಣನಾ

೧೫೬. ಯಥಾವುಡ್ಢಂ ನ ಕರೇಯ್ಯ ವಚ್ಚನ್ತಿ ಸಮ್ಬನ್ಧೋ. ಯಥಾನುಪುಬ್ಬಿಯಾ ಲಬ್ಭತೀತಿ ಸಮ್ಬನ್ಧೋ. ಇಮೇಸು ಪನ ತೀಸು ಠಾನೇಸು ಯೋ ಯೋ ಪಠಮಂ ಆಗಚ್ಛತಿ ವುಡ್ಢೋ ವಾ ನವೋ ವಾ, ಸೋ ಸೋ ಆಗತಪಟಿಪಾಟಿಯಾ ಕಾತುಞ್ಚ ನಹಾಯಿತುಞ್ಚ ಲಬ್ಭತೀತಿ ಅಧಿಪ್ಪಾಯೋ.

೧೫೭. ಉಬ್ಭಜಿತ್ವಾತಿ (ಚೂಳವ. ೩೭೩, ೩೭೪) ನಿವಾಸನಂ ದೂರತೋವ ಉಕ್ಖಿಪಿತ್ವಾ ನೋ ಪವಿಸೇಯ್ಯ. ಸಹಸಾ ಚ ನೋ ಪವಿಸೇಯ್ಯಾತಿ ಸಮ್ಬನ್ಧೋ. ‘‘ಬಹಿ ಠಿತೇನ ಉಕ್ಕಾಸಿತಬ್ಬ’’ನ್ತಿ ಚ ‘‘ಸಾಧುಕಂ ಅತರಮಾನೇನ ವಚ್ಚಕುಟಿ ಪವಿಸಿತಬ್ಬಾ’’ತಿ ಚ ವುತ್ತತ್ತಾ ಉಕ್ಕಾಸಿತ್ವಾವ ಅತರಮಾನೋ ಪವಿಸೇಯ್ಯಾತಿ ಅತ್ಥೋ. ‘‘ನ ಉಬ್ಭಜಿತ್ವಾ ಪವಿಸಿತಬ್ಬಾ, ವಚ್ಚಪಾದುಕಾಯ ಠಿತೇನ ಉಬ್ಭಜಿತಬ್ಬ’’ನ್ತಿ (ಚೂಳವ. ೩೭೪) ವಚನತೋ ‘‘ಉಬ್ಭಜೇಯ್ಯ ಪಾದುಕಾಸ್ವೇವ ಸಣ್ಠಿತೋ’’ತಿ ವುತ್ತಂ.

೧೫೮. ನ ಕರೇಯ್ಯ ಉಭಯಂ ನ ಕರೇಯ್ಯುಭಯಂ.

೧೫೯. ಕೂಪೇತಿ (ಚೂಳವ. ೩೭೪) ವಚ್ಚಕೂಪೇ. ಕಟ್ಠನ್ತಿ ಅವಲೇಖನಕಟ್ಠಂ. ಪಸ್ಸಾವದೋಣಿಯಾ ಖೇಳಂ ನ ಕಾತಬ್ಬನ್ತಿ ಅತ್ಥೋ. ನಾವಲೇಖೇಯ್ಯ ಫರುಸೇನಾತಿ ಫಾಲಿತಕಟ್ಠೇನ ವಾ ಖರೇನ ವಾ ಗಣ್ಠಿಕೇನ ವಾ ಕಣ್ಟಕೇನ ವಾ ಸುಸಿರೇನ ವಾ ಪೂತಿನಾ ವಾ ನಾವಲೇಖಿತಬ್ಬನ್ತಿ ಅತ್ಥೋ. ಉಹತಞ್ಚಾಪೀತಿ ಗೂಥಮಕ್ಖಿತಮ್ಪಿ ಧೋವಯೇ ಅತ್ತನಾ ವಾ ಪರೇನ ವಾ ಕತನ್ತಿ ಅಧಿಪ್ಪಾಯೋ.

೧೬೦. ಉಬ್ಭಜಿತ್ವಾ ನ ನಿಕ್ಖಮೇತಿ ಏತ್ಥ ‘‘ವಚ್ಚಪಾದುಕಾಯ ಠಿತೇನ ಪಟಿಚ್ಛಾದೇತಬ್ಬ’’ನ್ತಿ (ಚೂಳವ. ೩೭೪) ಹಿ ವುತ್ತಂ, ಪುನ ‘‘ಆಚಮನಪಾದುಕಾಯಂ ಠಿತೇನ ಉಬ್ಭಜಿತಬ್ಬ’’ನ್ತಿ (ಚೂಳವ. ೩೭೪) ಚ ವುತ್ತಂ. ‘‘ಚಪು ಚಪೂ’’ತಿ ಸದ್ದಂ ಕತ್ವಾ ನಾಚಮೇಯ್ಯಾತಿ ಅತ್ಥೋ. ವಚ್ಚಪ್ಪಸ್ಸಾವಟ್ಠಾನಿಕವಿನಿಚ್ಛಯೋ.

ವಚ್ಚಪ್ಪಸ್ಸಾವಟ್ಠಾನಿಕನಿದ್ದೇಸವಣ್ಣನಾ ನಿಟ್ಠಿತಾ.