೧೦. ಉಯ್ಯೋಧಿಕಸಿಕ್ಖಾಪದವಣ್ಣನಾ

ದಸಮೇ ಉಗ್ಗನ್ತ್ವಾ ಉಗ್ಗನ್ತ್ವಾ ಏತ್ಥ ಯುಜ್ಝನ್ತೀತಿ ಉಯ್ಯೋಧಿಕಂ, ಸಮ್ಪಹಾರಟ್ಠಾನಸ್ಸೇತಂ ನಾಮಂ. ಬಲಸ್ಸ ಅಗ್ಗಂ ಜಾನನ್ತಿ ಏತ್ಥಾತಿ ಬಲಗ್ಗಂ, ಬಲಗಣನಟ್ಠಾನನ್ತಿ ಅತ್ಥೋ. ಸೇನಾಯ ವಿಯೂಹಂ ಸೇನಾಬ್ಯೂಹಂ, ಸೇನಾನಿವೇಸಸ್ಸೇತಂ ನಾಮಂ. ಅನೀಕಸ್ಸ ದಸ್ಸನಂ ಅನೀಕದಸ್ಸನಂ. ಅನೀಕಂ ನಾಮ ‘‘ದ್ವಾದಸಪುರಿಸೋ ಹತ್ಥೀ, ತಿಪುರಿಸೋ ಅಸ್ಸೋ, ಚತುಪ್ಪುರಿಸೋ ರಥೋ’’ತಿಇಮಿನಾ (ಪಾಚಿ. ೩೧೪) ಲಕ್ಖಣೇನ ತಯೋ ಹತ್ಥೀ ಪಚ್ಛಿಮಕಂ ಹತ್ಥಾನೀಕಂ, ಅಸ್ಸಾನೀಕರಥಾನೀಕೇಸುಪಿ ಏಸೇವ ನಯೋ. ಚತ್ತಾರೋ ಪನ ಆವುಧಹತ್ಥಾ ಪುರಿಸಾ ಪಚ್ಛಿಮಕಂ ಪತ್ತಾನೀಕಂ. ಏತೇಸು ಯಂಕಿಞ್ಚಿ ದಸ್ಸನಾಯ ಗಚ್ಛತೋ ಪದೇ ಪದೇ ದುಕ್ಕಟಂ, ದಸ್ಸನೂಪಚಾರೇ ಠತ್ವಾ ಪಸ್ಸತೋ ಪಾಚಿತ್ತಿಯಂ, ಉಪಚಾರಂ ಪನ ವಿಜಹಿತ್ವಾ ಪುನಪ್ಪುನಂ ಪಸ್ಸತೋ ಪಯೋಗೇ ಪಯೋಗೇ ಪಾಚಿತ್ತಿಯಂ. ಸೇಸಂ ಉಯ್ಯುತ್ತಸೇನಾಸಿಕ್ಖಾಪದೇ ವುತ್ತನಯೇನೇವ ವೇದಿತಬ್ಬಂ, ಆಪತ್ತಿಭೇದೋ ಪನೇತ್ಥ ನತ್ಥೇವಾತಿ.

ಉಯ್ಯೋಧಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

ಅಚೇಲಕವಗ್ಗೋ ಪಞ್ಚಮೋ.