೬. ಖೀಯನಧಮ್ಮಸಿಕ್ಖಾಪದವಣ್ಣನಾ

ಛಟ್ಠೇ ಅಲಂ ತಾವ ತೇ ಅಯ್ಯೇ ವುಟ್ಠಾಪಿತೇನಾತಿ ವುಚ್ಚಮಾನಾತಿ ವುಟ್ಠಾಪನಸಮ್ಮುತಿಯಾ ಯಾಚಿತಾಯ ಸಙ್ಘೇನ ಉಪಪರಿಕ್ಖಿಪಿತ್ವಾ ‘‘ಯಸ್ಮಾ ಬಾಲಾ ಅಬ್ಯತ್ತಾ ಚ ಅಲಜ್ಜಿನೀ ಚ ಹೋತಿ, ತಸ್ಮಾ ಅಲಂ ತಾವ ತುಯ್ಹಂ ಉಪಸಮ್ಪಾದಿತೇನಾ’’ತಿ ಏವಂ ನಿವಾರೀಯಮಾನಾ. ಪಚ್ಛಾ ಖೀಯನಧಮ್ಮನ್ತಿ ಪಚ್ಛಾ ಅಞ್ಞಾಸಂ ಬ್ಯತ್ತಾನಂ ಲಜ್ಜಿನೀನಂ ವುಟ್ಠಾಪನಸಮ್ಮುತಿಂ ದಿಯ್ಯಮಾನಂ ದಿಸ್ವಾ ‘‘ಅಹಮೇವ ನೂನ ಬಾಲಾ’’ತಿಆದೀನಿ ಭಣಮಾನಾ ಯತ್ಥ ಕತ್ಥಚಿ ಖೀಯೇಯ್ಯ. ಪಾಚಿತ್ತಿಯನ್ತಿ ಏವಂ ಖೀಯನಧಮ್ಮಂ ಆಪಜ್ಜನ್ತಿಯಾ ಪಾಚಿತ್ತಿಯಂ.

ಸಾವತ್ಥಿಯಂ ಚಣ್ಡಕಾಳಿಂ ಆರಬ್ಭ ಏವಂ ಖೀಯನಧಮ್ಮಂ ಆಪಜ್ಜನವತ್ಥುಸ್ಮಿಂ ಪಞ್ಞತ್ತಂ, ಪಕತಿಯಾ ಛನ್ದಾದೀನಂ ವಸೇನ ಕರೋನ್ತೀನಂ ಖೀಯನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ವುಟ್ಠಾಪನಸಮ್ಮುತಿಯಾ ಯಾಚನಂ, ಉಪಪರಿಕ್ಖಿತ್ವಾ ನ ಛನ್ದಾದಿವಸೇನ ಪಟಿಕ್ಖಿತ್ತಾಯ ‘‘ಸಾಧೂ’’ತಿ ಪಟಿಸ್ಸವೋ, ಪಚ್ಛಾಖೀಯನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ದುಕ್ಖವೇದನನ್ತಿ.

ಖೀಯನಧಮ್ಮಸಿಕ್ಖಾಪದವಣ್ಣನಾ ನಿಟ್ಠಿತಾ.