೮. ಕುಮಾರಿಭೂತವಗ್ಗೋ

೧-೨-೩. ಪಠಮಕುಮಾರಿಭೂತಾದಿಸಿಕ್ಖಾಪದವಣ್ಣನಾ

ಕುಮಾರಿಭೂತವಗ್ಗಸ್ಸ ಪಠಮದುತಿಯತತಿಯಾನಿ ತೀಹಿ ಗಿಹಿಗತಸಿಕ್ಖಾಪದೇಹಿ ಸದಿಸಾನೇವ. ಯಾ ಪನ ತಾ ಸಬ್ಬಪಠಮಾ ದ್ವೇ ಮಹಾಸಿಕ್ಖಮಾನಾ, ತಾ ಅತಿಕ್ಕನ್ತವೀಸತಿವಸ್ಸಾತಿ ವೇದಿತಬ್ಬಾ. ತಾ ಹಿ ಗಿಹಿಗತಾ ವಾ ಹೋನ್ತು, ಅಗಿಹಿಗತಾ ವಾ, ಸಮ್ಮುತಿಕಮ್ಮಾದೀಸು ‘‘ಸಿಕ್ಖಮಾನಾ’’ಇಚ್ಚೇವ ವತ್ತಬ್ಬಾ, ‘‘ಗಿಹಿಗತಾ’’ತಿ ವಾ ‘‘ಕುಮಾರಿಭೂತಾ’’ತಿ ವಾ ನ ವತ್ತಬ್ಬಾ. ಗಿಹಿಗತಾಯ ದಸವಸ್ಸಕಾಲೇ ಸಿಕ್ಖಾಸಮ್ಮುತಿಂ ದತ್ವಾ ದ್ವಾದಸವಸ್ಸಕಾಲೇ ಉಪಸಮ್ಪದಾ ಕಾತಬ್ಬಾ, ಏಕಾದಸವಸ್ಸಕಾಲೇ ದತ್ವಾ ತೇರಸವಸ್ಸಕಾಲೇ ಕಾತಬ್ಬಾ, ದ್ವಾದಸತೇರಸಚುದ್ದಸಪನ್ನರಸಸೋಳಸಸತ್ತರಸಅಟ್ಠಾರಸವಸ್ಸಕಾಲೇ ಸಿಕ್ಖಾಸಮ್ಮುತಿಂ ದತ್ವಾ ವೀಸತಿವಸ್ಸಕಾಲೇ ಉಪಸಮ್ಪದಾ ಕಾತಬ್ಬಾ. ಅಟ್ಠಾರಸವಸ್ಸಕಾಲತೋ ಪಟ್ಠಾಯ ಚ ಪನಾಯಂ ‘‘ಗಿಹಿಗತಾ’’ತಿಪಿ ‘‘ಕುಮಾರಿಭೂತಾ’’ತಿಪಿ ವತ್ತುಂ ವಟ್ಟತಿ. ಯಾ ಪನಾಯಂ ‘‘ಕುಮಾರಿಭೂತಾ’’ತಿ ವುತ್ತಾ ಸಾಮಣೇರೀ, ಸಾ ‘‘ಗಿಹಿಗತಾ’’ತಿ ನ ವತ್ತಬ್ಬಾ, ‘‘ಕುಮಾರಿಭೂತಾ’’ಇಚ್ಚೇವ ವತ್ತಬ್ಬಾ. ಸಿಕ್ಖಾಸಮ್ಮುತಿದಾನವಸೇನ ಪನ ಸಬ್ಬಾಪಿ ‘‘ಸಿಕ್ಖಮಾನಾ’’ತಿ ವತ್ತುಂ ವಟ್ಟತೀತಿ.

ಪಠಮಕುಮಾರಿಭೂತಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ಊನದ್ವಾದಸವಸ್ಸಸಿಕ್ಖಾಪದವಣ್ಣನಾ

ಚತುತ್ಥೇ ಊನದ್ವಾದಸವಸ್ಸಾತಿ ಉಪಸಮ್ಪದಾವಸೇನ ಅಪರಿಪುಣ್ಣದ್ವಾದಸವಸ್ಸಾ. ಪಾಚಿತ್ತಿಯನ್ತಿ ಉಪಜ್ಝಾಯಾ ಹುತ್ವಾ ವುಟ್ಠಾಪೇನ್ತಿಯಾ ವುತ್ತನಯೇನೇವ ದುಕ್ಕಟಾನಿ ಅನ್ತರಾ, ಕಮ್ಮವಾಚಾಪರಿಯೋಸಾನೇ ಪಾಚಿತ್ತಿಯನ್ತಿ.

ಊನದ್ವಾದಸವಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ಪರಿಪುಣ್ಣದ್ವಾದಸವಸ್ಸಸಿಕ್ಖಾಪದವಣ್ಣನಾ

ಪಞ್ಚಮೇ ಸಙ್ಘೇನ ಅಸಮ್ಮತಾತಿ ಯಸ್ಸಾ ಸಙ್ಘೇನ ಪದಭಾಜನೇ (ಪಾಚಿ. ೧೧೩೨) ವುತ್ತಾ ವುಟ್ಠಾಪನಸಮ್ಮುತಿ ನ ದಿನ್ನಾ. ಸೇಸಂ ಉಭಯತ್ಥಾಪಿ ಮಹಾಸಿಕ್ಖಮಾನಾಸಿಕ್ಖಾಪದದ್ವಯಸದಿಸಮೇವಾತಿ.

ಪರಿಪುಣ್ಣದ್ವಾದಸವಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ಖೀಯನಧಮ್ಮಸಿಕ್ಖಾಪದವಣ್ಣನಾ

ಛಟ್ಠೇ ಅಲಂ ತಾವ ತೇ ಅಯ್ಯೇ ವುಟ್ಠಾಪಿತೇನಾತಿ ವುಚ್ಚಮಾನಾತಿ ವುಟ್ಠಾಪನಸಮ್ಮುತಿಯಾ ಯಾಚಿತಾಯ ಸಙ್ಘೇನ ಉಪಪರಿಕ್ಖಿಪಿತ್ವಾ ‘‘ಯಸ್ಮಾ ಬಾಲಾ ಅಬ್ಯತ್ತಾ ಚ ಅಲಜ್ಜಿನೀ ಚ ಹೋತಿ, ತಸ್ಮಾ ಅಲಂ ತಾವ ತುಯ್ಹಂ ಉಪಸಮ್ಪಾದಿತೇನಾ’’ತಿ ಏವಂ ನಿವಾರೀಯಮಾನಾ. ಪಚ್ಛಾ ಖೀಯನಧಮ್ಮನ್ತಿ ಪಚ್ಛಾ ಅಞ್ಞಾಸಂ ಬ್ಯತ್ತಾನಂ ಲಜ್ಜಿನೀನಂ ವುಟ್ಠಾಪನಸಮ್ಮುತಿಂ ದಿಯ್ಯಮಾನಂ ದಿಸ್ವಾ ‘‘ಅಹಮೇವ ನೂನ ಬಾಲಾ’’ತಿಆದೀನಿ ಭಣಮಾನಾ ಯತ್ಥ ಕತ್ಥಚಿ ಖೀಯೇಯ್ಯ. ಪಾಚಿತ್ತಿಯನ್ತಿ ಏವಂ ಖೀಯನಧಮ್ಮಂ ಆಪಜ್ಜನ್ತಿಯಾ ಪಾಚಿತ್ತಿಯಂ.

ಸಾವತ್ಥಿಯಂ ಚಣ್ಡಕಾಳಿಂ ಆರಬ್ಭ ಏವಂ ಖೀಯನಧಮ್ಮಂ ಆಪಜ್ಜನವತ್ಥುಸ್ಮಿಂ ಪಞ್ಞತ್ತಂ, ಪಕತಿಯಾ ಛನ್ದಾದೀನಂ ವಸೇನ ಕರೋನ್ತೀನಂ ಖೀಯನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ವುಟ್ಠಾಪನಸಮ್ಮುತಿಯಾ ಯಾಚನಂ, ಉಪಪರಿಕ್ಖಿತ್ವಾ ನ ಛನ್ದಾದಿವಸೇನ ಪಟಿಕ್ಖಿತ್ತಾಯ ‘‘ಸಾಧೂ’’ತಿ ಪಟಿಸ್ಸವೋ, ಪಚ್ಛಾಖೀಯನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಅದಿನ್ನಾದಾನಸದಿಸಾನಿ, ಇದಂ ಪನ ದುಕ್ಖವೇದನನ್ತಿ.

ಖೀಯನಧಮ್ಮಸಿಕ್ಖಾಪದವಣ್ಣನಾ ನಿಟ್ಠಿತಾ.

೭-೮. ಸಿಕ್ಖಮಾನನವುಟ್ಠಾಪನಪಠಮದುತಿಯಸಿಕ್ಖಾಪದವಣ್ಣನಾ

ಸತ್ತಮೇ ಸಾ ಪಚ್ಛಾತಿ ಸಿಕ್ಖಮಾನಾಯ ಉಪಸಮ್ಪದಾಯ ಯಾಚಿಯಮಾನಾಯ ಸಾ ಭಿಕ್ಖುನೀ ಏವಂ ವತ್ವಾ ಲದ್ಧೇ ಚೀವರೇ ಪಚ್ಛಾ ಅಸತಿ ಅನ್ತರಾಯೇ ‘‘ನೇವ ವುಟ್ಠಾಪೇಸ್ಸಾಮಿ, ನ ವುಟ್ಠಾಪನಾಯ ಉಸ್ಸುಕ್ಕಂ ಕರಿಸ್ಸಾಮೀ’’ತಿ ಧುರಂ ನಿಕ್ಖಿಪೇಯ್ಯ, ತಸ್ಸಾ ಸಹ ಧುರನಿಕ್ಖೇಪೇನ ಪಾಚಿತ್ತಿಯನ್ತಿ. ಅಟ್ಠಮೇಪಿ ಏಸೇವ ನಯೋ.

ಉಭಯಮ್ಪಿ ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏತೇಸು ವತ್ಥೂಸು ಪಞ್ಞತ್ತಂ, ದ್ವೀಸುಪಿ ಸತಿ ಅನ್ತರಾಯೇ, ಪರಿಯೇಸಿತ್ವಾ ಅಲಭನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಉಭಯತ್ಥ ‘‘ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ ಪಟಿಞ್ಞಾ, ಆಕಙ್ಖಿತನಿಪ್ಫತ್ತಿ, ಪಚ್ಛಾ ಧುರನಿಕ್ಖೇಪೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಸಮನುಭಾಸನಸದಿಸಾನೀತಿ.

ಸಿಕ್ಖಮಾನನವುಟ್ಠಾಪನಪಠಮದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.

೯. ಸೋಕಾವಾಸಸಿಕ್ಖಾಪದವಣ್ಣನಾ

ನವಮೇ ಸೋಕಾವಾಸನ್ತಿ ಸಙ್ಕೇತಂ ಕತ್ವಾ ಆಗಚ್ಛಮಾನಾ ಪುರಿಸಾನಂ ಅನ್ತೋಸೋಕಂ ಪವೇಸೇತೀತಿ ಸೋಕಾವಾಸಾ, ತಂ ಸೋಕಾವಾಸಂ. ಅಥ ವಾ ಘರಂ ವಿಯ ಘರಸಾಮಿಕಾ ಅಯಮ್ಪಿ ಪುರಿಸಸಮಾಗಮಂ ಅಲಭಮಾನಾ ಸೋಕಂ ಆವಿಸತಿ, ಇತಿ ಯಂ ಆವಿಸತಿ, ಸ್ವಾಸ್ಸಾ ಆವಾಸೋ ಹೋತೀತಿ ಸೋಕಾವಾಸಾ. ತೇನೇವಸ್ಸ ಪದಭಾಜನೇ (ಪಾಚಿ. ೧೧೬೦) ‘‘ಸೋಕಾವಾಸಾ ನಾಮ ಪರೇಸಂ ದುಕ್ಖಂ ಉಪ್ಪಾದೇತಿ, ಸೋಕಂ ಆವಿಸತೀ’’ತಿ ದ್ವಿಧಾ ಅತ್ಥೋ ವುತ್ತೋ. ಪಾಚಿತ್ತಿಯನ್ತಿ ಏವರೂಪಂ ವುಟ್ಠಾಪೇನ್ತಿಯಾ ವುತ್ತನಯೇನೇವ ಕಮ್ಮವಾಚಾಪರಿಯೋಸಾನೇ ಉಪಜ್ಝಾಯಾಯ ಪಾಚಿತ್ತಿಯಂ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏವರೂಪಂ ಸಿಕ್ಖಮಾನಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ. ಅಜಾನನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೋಕಾವಾಸತಾ, ಜಾನನಂ, ವುಟ್ಠಾಪನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಗಬ್ಭಿನಿವುಟ್ಠಾಪನಸದಿಸಾನೇವಾತಿ.

ಸೋಕಾವಾಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೦. ಅನನುಞ್ಞಾತಸಿಕ್ಖಾಪದವಣ್ಣನಾ

ದಸಮೇ ಮಾತಾಪಿತೂಹೀತಿ ವಿಜಾತಮಾತರಾ ಚ ಜನಕಪಿತರಾ ಚ. ಸಾಮಿಕೇನಾತಿ ಯೇನ ಪರಿಗ್ಗಹಿತಾ, ತೇನ. ಅನನುಞ್ಞಾತನ್ತಿ ಉಪಸಮ್ಪದತ್ಥಾಯ ಅನನುಞ್ಞಾತಂ. ದ್ವಿಕ್ಖತ್ತುಞ್ಹಿ ಭಿಕ್ಖುನೀಹಿ ಆಪುಚ್ಛಿತಬ್ಬಂ, ಪಬ್ಬಜ್ಜಾಕಾಲೇ ಚ ಉಪಸಮ್ಪದಾಕಾಲೇ ಚ, ಭಿಕ್ಖೂನಂ ಪನ ಸಕಿಂ ಆಪುಚ್ಛಿತೇಪಿ ವಟ್ಟತಿ. ತಸ್ಮಾ ಯಾ ಉಪಸಮ್ಪದಾಕಾಲೇ ಅನಾಪುಚ್ಛಾ ಉಪಸಮ್ಪಾದೇತಿ, ತಸ್ಸಾ ವುತ್ತನಯೇನೇವ ಪಾಚಿತ್ತಿಯಂ.

ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಅನನುಞ್ಞಾತವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ. ಅಪಲೋಕೇತ್ವಾ ವುಟ್ಠಾಪೇನ್ತಿಯಾ, ತೇಸಂ ಅತ್ಥಿಭಾವಂ ಅಜಾನನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಅನಪಲೋಕನಂ, ಅತ್ಥಿಭಾವಜಾನನಂ, ವುಟ್ಠಾಪನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ. ಅನನುಞ್ಞಾತಸಮುಟ್ಠಾನಂ, ಕಿರಿಯಾಕಿರಿಯಂ, ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ತಿಚಿತ್ತಂ, ತಿವೇದನನ್ತಿ.

ಅನನುಞ್ಞಾತಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೧. ಪಾರಿವಾಸಿಕಸಿಕ್ಖಾಪದವಣ್ಣನಾ

ಏಕಾದಸಮೇ ಪಾರಿವಾಸಿಕಛನ್ದದಾನೇನಾತಿ ಪಾರಿವಾಸಿಯೇನ ಛನ್ದದಾನೇನ. ತತ್ಥ ಚತುಬ್ಬಿಧಂ ಪಾರಿವಾಸಿಯಂ ಪರಿಸಪಾರಿವಾಸಿಯಂ ರತ್ತಿಪಾರಿವಾಸಿಯಂ ಛನ್ದಪಾರಿವಾಸಿಯಂ ಅಜ್ಝಾಸಯಪಾರಿವಾಸಿಯನ್ತಿ.

ತತ್ಥ ಪರಿಸಪಾರಿವಾಸಿಯಂ ನಾಮ ಭಿಕ್ಖೂ ಕೇನಚಿದೇವ ಕರಣೀಯೇನ ಸನ್ನಿಪತಿತಾ ಹೋನ್ತಿ, ಅಥ ಮೇಘೋ ವಾ ಉಟ್ಠಹತಿ, ಉಸ್ಸಾರಣಾ ವಾ ಕರೀಯತಿ, ಮನುಸ್ಸಾ ವಾ ಅಜ್ಝೋತ್ಥರನ್ತಾ ಆಗಚ್ಛನ್ತಿ, ಭಿಕ್ಖೂ ‘‘ಅನೋಕಾಸಾ ಮಯಂ, ಅಞ್ಞತ್ರ ಗಚ್ಛಾಮಾ’’ತಿ ಛನ್ದಂ ಅವಿಸ್ಸಜ್ಜಿತ್ವಾವ ಉಟ್ಠಹನ್ತಿ, ಇದಂ ಪರಿಸಪಾರಿವಾಸಿಯಂ ನಾಮ, ಕಿಞ್ಚಾಪಿ ಪರಿಸಪಾರಿವಾಸಿಯಂ, ಛನ್ದಸ್ಸ ಪನ ಅವಿಸ್ಸಟ್ಠತ್ತಾ ಕಮ್ಮಂ ಕಾತುಂ ವಟ್ಟತಿ.

ಪುನ ಭಿಕ್ಖೂ ‘‘ಉಪೋಸಥಾದೀನಿ ಕರಿಸ್ಸಾಮಾ’’ತಿ ರತ್ತಿಂ ಸನ್ನಿಪತಿತ್ವಾ ‘‘ಯಾವ ಸಬ್ಬೇ ಸನ್ನಿಪತನ್ತಿ, ತಾವ ಧಮ್ಮಂ ಸುಣಿಸ್ಸಾಮಾ’’ತಿ ಏಕಂ ಅಜ್ಝೇಸನ್ತಿ, ತಸ್ಮಿಂ ಧಮ್ಮಕಥಂ ಕಥೇನ್ತೇಯೇವ ಅರುಣೋ ಉಗ್ಗಚ್ಛತಿ. ಸಚೇ ‘‘ಚಾತುದ್ದಸಿಕಂ ಉಪೋಸಥಂ ಕರಿಸ್ಸಾಮಾ’’ತಿ ನಿಸಿನ್ನಾ, ‘‘ಪನ್ನರಸೋ’’ತಿ ಕಾತುಂ ವಟ್ಟತಿ. ಸಚೇ ಪನ್ನರಸಿಕಂ ಕಾತುಂ ನಿಸಿನ್ನಾ, ಪಾಟಿಪದೇ ಅನುಪೋಸಥೇ ಉಪೋಸಥಂ ಕಾತುಂ ನ ವಟ್ಟತಿ. ಅಞ್ಞಂ ಪನ ಸಙ್ಘಕಿಚ್ಚಂ ಕಾತುಂ ವಟ್ಟತಿ, ಇದಂ ರತ್ತಿಪಾರಿವಾಸಿಯಂ ನಾಮ.

ಪುನ ಭಿಕ್ಖೂ ‘‘ಕಿಞ್ಚಿದೇವ ಅಬ್ಭಾನಾದಿಸಙ್ಘಕಮ್ಮಂ ಕರಿಸ್ಸಾಮಾ’’ತಿ ಸನ್ನಿಸಿನ್ನಾ ಹೋನ್ತಿ, ತತ್ರೇಕೋ ನಕ್ಖತ್ತಪಾಠಕೋ ಭಿಕ್ಖು ಏವಂ ವದತಿ ‘‘ಅಜ್ಜ ನಕ್ಖತ್ತಂ ದಾರುಣಂ, ಮಾ ಇದಂ ಕಮ್ಮಂ ಕರೋಥಾ’’ತಿ. ತೇ ತಸ್ಸ ವಚನೇನ ಛನ್ದಂ ವಿಸ್ಸಜ್ಜೇತ್ವಾ ತತ್ಥೇವ ನಿಸಿನ್ನಾ ಹೋನ್ತಿ, ಅಥಞ್ಞೋ ಆಗನ್ತ್ವಾ ‘‘ನಕ್ಖತ್ತಂ ಪತಿಮಾನೇನ್ತಂ, ಅತ್ಥೋ ಬಾಲಂ ಉಪಜ್ಝಗಾ (ಜಾ. ೧.೧.೪೯), ಕಿಂ ನಕ್ಖತ್ತೇನ ಕರೋಥಾ’’ತಿ ವದತಿ, ಇದಂ ಛನ್ದಪಾರಿವಾಸಿಯಞ್ಚೇವ ಅಜ್ಝಾಸಯಪಾರಿವಾಸಿಯಞ್ಚ. ಏತಸ್ಮಿಂ ಪಾರಿವಾಸಿಯೇ ಪುನ ಛನ್ದಪಾರಿಸುದ್ಧಿಂ ಅನಾಹರಿತ್ವಾ ಕಮ್ಮಂ ಕಾತುಂ ನ ವಟ್ಟತಿ, ಇದಂ ಸನ್ಧಾಯ ವುತ್ತಂ ‘‘ಪಾರಿವಾಸಿಕಛನ್ದದಾನೇನಾ’’ತಿ. ಪಾಚಿತ್ತಿಯನ್ತಿ ಏವಂ ವುಟ್ಠಾಪೇನ್ತಿಯಾ ವುತ್ತನಯೇನೇವ ಕಮ್ಮವಾಚಾಪರಿಯೋಸಾನೇ ಪಾಚಿತ್ತಿಯಂ.

ರಾಜಗಹೇ ಥುಲ್ಲನನ್ದಂ ಆರಬ್ಭ ಏವಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ. ಛನ್ದಂ ಅವಿಸ್ಸಜ್ಜೇತ್ವಾವ ಅವುಟ್ಠಿತಾಯ ಪರಿಸಾಯ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಪಾರಿವಾಸಿಕಛನ್ದದಾನತಾ, ವುಟ್ಠಾಪನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ. ಸಮುಟ್ಠಾನಾದೀನಿ ಗಮ್ಭಿನಿಸಿಕ್ಖಾಪದಸದಿಸಾನೇವಾತಿ.

ಪಾರಿವಾಸಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೨. ಅನುವಸ್ಸಸಿಕ್ಖಾಪದವಣ್ಣನಾ

ದ್ವಾದಸಮೇ ಅನುವಸ್ಸನ್ತಿ ಅನುಸಂವಚ್ಛರಂ. ಏವಂ ವುಟ್ಠಾಪೇನ್ತಿಯಾಪಿ ವುತ್ತನಯೇನೇವ ಪಾಚಿತ್ತಿಯಂ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಅನುವಸ್ಸಂ ವುಟ್ಠಾಪನವತ್ಥುಸ್ಮಿಂ ಪಞ್ಞತ್ತಂ. ಏಕನ್ತರಿಕಂ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಅನುವಸ್ಸತಾ, ವುಟ್ಠಾಪನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ. ಸಮುಟ್ಠಾನಾದೀನಿ ಏಕಾದಸಮೇ ವುತ್ತನಯಾನೇವಾತಿ.

ಅನುವಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೩. ಏಕವಸ್ಸಸಿಕ್ಖಾಪದವಣ್ಣನಾ

ತೇರಸಮೇ ಏಕನ್ತರಿಕಂ ಏಕಂ ವುಟ್ಠಾಪೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೇಸಂ ದ್ವಾದಸಮೇನ ಸದಿಸಮೇವಾತಿ.

ಏಕವಸ್ಸಸಿಕ್ಖಾಪದವಣ್ಣನಾ ನಿಟ್ಠಿತಾ.

ಕುಮಾರಿಭೂತವಗ್ಗೋ ಅಟ್ಠಮೋ.