೯. ಛತ್ತುಪಾಹನವಗ್ಗೋ

೧. ಛತ್ತುಪಾಹನಸಿಕ್ಖಾಪದವಣ್ಣನಾ

ಛತ್ತವಗ್ಗಸ್ಸ ಪಠಮೇ ಛತ್ತುಪಾಹನನ್ತಿ ಪದಭಾಜನೇ (ಪಾಚಿ. ೧೧೭೮-೧೧೮೨) ವುತ್ತಲಕ್ಖಣಂ ಛತ್ತಞ್ಚ ಉಪಾಹನಾಯೋ ಚ. ಧಾರೇಯ್ಯಾತಿ ಪರಿಭೋಗವಸೇನ ಮಗ್ಗಗಮನೇ ಏಕಪ್ಪಯೋಗೇನೇವ ದಿವಸಮ್ಪಿ ಧಾರೇನ್ತಿಯಾ ಏಕಾ ಆಪತ್ತಿ. ಸಚೇ ಪನ ತಾದಿಸಂ ಠಾನಂ ಪತ್ವಾ ಛತ್ತಮ್ಪಿ ಅಪನಾಮೇತ್ವಾ ಉಪಾಹನಾಪಿ ಓಮುಞ್ಚಿತ್ವಾ ಪುನಪ್ಪುನಂ ಧಾರೇತಿ, ಪಯೋಗಗಣನಾಯ ಪಾಚಿತ್ತಿಯಂ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಛತ್ತುಪಾಹನಧಾರಣವತ್ಥುಸ್ಮಿಂ ಪಞ್ಞತ್ತಂ, ‘‘ಅಗಿಲಾನಾ’’ತಿ ಅಯಮೇತ್ಥ ಅನುಪಞ್ಞತ್ತಿ, ಛತ್ತಸ್ಸೇವ ಉಪಾಹನಾನಂಯೇವ ವಾ ಧಾರಣೇ ದುಕ್ಕಟಂ, ಅಗಿಲಾನಾಯ ತಿಕಪಾಚಿತ್ತಿಯಂ, ಗಿಲಾನಾಯ ದ್ವಿಕದುಕ್ಕಟಂ. ಗಿಲಾನಸಞ್ಞಾಯ ಪನ, ಆರಾಮೇ ಆರಾಮೂಪಚಾರೇ ಧಾರೇನ್ತಿಯಾ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಉಭಿನ್ನಂ ಧಾರಣಂ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ದ್ವೇ ಅಙ್ಗಾನಿ. ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ.

ಛತ್ತುಪಾಹನಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ಯಾನಸಿಕ್ಖಾಪದವಣ್ಣನಾ

ದುತಿಯೇ ಯಾನೇನಾತಿ ವಯ್ಹಾದಿನಾ. ಏತ್ಥಾಪಿ ಓರೋಹಿತ್ವಾ ಪುನಪ್ಪುನಂ ಅಭಿರುಹನ್ತಿಯಾ ಪಯೋಗಗಣನಾಯ ಪಾಚಿತ್ತಿಯಂ. ಅನಾಪತ್ತಿಯಂ ‘‘ಆರಾಮೇ ಆರಾಮೂಪಚಾರೇ’’ತಿ ನತ್ಥಿ, ಸೇಸಂ ಪಠಮೇ ವುತ್ತನಯೇನೇವ ವೇದಿತಬ್ಬನ್ತಿ.

ಯಾನಸಿಕ್ಖಾಪದವಣ್ಣನಾ ನಿಟ್ಠಿತಾ.

೩. ಸಙ್ಘಾಣಿಸಿಕ್ಖಾಪದವಣ್ಣನಾ

ತತಿಯೇ ಸಙ್ಘಾಣಿನ್ತಿ ಯಂಕಿಞ್ಚಿ ಕಟೂಪಗಂ. ಧಾರೇಯ್ಯಾತಿ ಕಟಿಯಂ ಪಟಿಮುಞ್ಚೇಯ್ಯ. ಏತ್ಥಾಪಿ ಓಮುಞ್ಚಿತ್ವಾ ಓಮುಞ್ಚಿತ್ವಾ ಧಾರೇನ್ತಿಯಾ ಪಯೋಗಗಣನಾಯ ಪಾಚಿತ್ತಿಯಂ.

ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಸಙ್ಘಾಣಿಂ ಧಾರಣವತ್ಥುಸ್ಮಿಂ ಪಞ್ಞತ್ತಂ. ಆಬಾಧಪಚ್ಚಯಾ ಕಟಿಸುತ್ತಂ ಧಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೇಸಂ ವುತ್ತನಯೇನೇವ ವೇದಿತಬ್ಬಂ, ಇದಂ ಪನ ಅಕುಸಲಚಿತ್ತನ್ತಿ.

ಸಙ್ಘಾಣಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೪. ಇತ್ಥಾಲಙ್ಕಾರಸಿಕ್ಖಾಪದವಣ್ಣನಾ

ಚತುತ್ಥೇ ಇತ್ಥಾಲಙ್ಕಾರನ್ತಿ ಸೀಸೂಪಗಾದೀಸು ಅಞ್ಞತರಂ ಯಂಕಿಞ್ಚಿ ಪಿಳನ್ಧನಂ. ಇಧ ತಸ್ಸ ತಸ್ಸ ವಸೇನ ವತ್ಥುಗಣನಾಯ ಆಪತ್ತಿ ವೇದಿತಬ್ಬಾ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಇತ್ಥಾಲಙ್ಕಾರಂ ಧಾರಣವತ್ಥುಸ್ಮಿಂ ಪಞ್ಞತ್ತಂ, ಆಬಾಧಪಚ್ಚಯಾ ಕಿಞ್ಚಿದೇವ ಧಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೇಸಂ ವುತ್ತಸದಿಸಮೇವಾತಿ.

ಇತ್ಥಾಲಙ್ಕಾರಸಿಕ್ಖಾಪದವಣ್ಣನಾ ನಿಟ್ಠಿತಾ.

೫. ಗನ್ಧವಣ್ಣಕಸಿಕ್ಖಾಪದವಣ್ಣನಾ

ಪಞ್ಚಮೇ ಗನ್ಧವಣ್ಣಕೇನಾತಿ ಯೇನಕೇನಚಿ ಗನ್ಧೇನ ಚ ವಣ್ಣಕೇನ ಚ. ಇಧ ಗನ್ಧಾದಿಯೋಜನತೋ ಪಟ್ಠಾಯ ಪುಬ್ಬಪಯೋಗೇ ದುಕ್ಕಟಂ, ನಹಾನಪರಿಯೋಸಾನೇ ಪಾಚಿತ್ತಿಯಂ. ಆಬಾಧಪಚ್ಚಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಸೇಸಂ ಚತುತ್ಥಸದಿಸಮೇವಾತಿ.

ಗನ್ಧವಣ್ಣಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೬. ವಾಸಿತಕಸಿಕ್ಖಾಪದವಣ್ಣನಾ

ಛಟ್ಠೇ ವಾಸಿತಕೇನಾತಿ ಗನ್ಧವಾಸಿತಕೇನ. ಪಿಞ್ಞಾಕೇನಾತಿ ತಿಲಪಿಟ್ಠೇನ. ಸೇಸಂ ಪಞ್ಚಮಸದಿಸಮೇವಾತಿ.

ವಾಸಿತಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೭. ಭಿಕ್ಖುನಿಉಮ್ಮದ್ದಾಪನಸಿಕ್ಖಾಪದವಣ್ಣನಾ

ಸತ್ತಮೇ ಉಮ್ಮದ್ದಾಪೇಯ್ಯಾತಿ ಉಬ್ಬಟ್ಟಾಪೇಯ್ಯ. ಪರಿಮದ್ದಾಪೇಯ್ಯಾತಿ ಸಮ್ಬಾಹಾಪೇಯ್ಯ. ಏತ್ಥ ಚ ಹತ್ಥಂ ಅಮುಞ್ಚಿತ್ವಾ ಉಬ್ಬಟ್ಟನೇ ಏಕಾವ ಆಪತ್ತಿ, ಮೋಚೇತ್ವಾ ಮೋಚೇತ್ವಾ ಉಬ್ಬಟ್ಟನೇ ಪಯೋಗಗಣನಾಯ ಆಪತ್ತಿಯೋ. ಸಮ್ಬಾಹನೇಪಿ ಏಸೇವ ನಯೋ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಭಿಕ್ಖುನಿಯಾ ಉಮ್ಮದ್ದಾಪನಪರಿಮದ್ದಾಪನವತ್ಥುಸ್ಮಿಂ ಪಞ್ಞತ್ತಂ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಇಧ ಮಗ್ಗಗಮನಪರಿಸ್ಸಮೋಪಿ ಗೇಲಞ್ಞಂ, ಚೋರಭಯಾದೀಹಿ ಸರೀರಕಮ್ಪನಾದಯೋಪಿ ಆಪದಾ. ಸೇಸಂ ಚತುತ್ಥೇ ವುತ್ತನಯೇನೇವ ವೇದಿತಬ್ಬನ್ತಿ.

ಭಿಕ್ಖುನಿಉಮ್ಮದ್ದಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ.

೮-೯-೧೦. ಸಿಕ್ಖಮಾನಉಮ್ಮದ್ದಾಪನಾದಿಸಿಕ್ಖಾಪದವಣ್ಣನಾ

ಅಟ್ಠಮನವಮದಸಮೇಸುಪಿ ಸಿಕ್ಖಮಾನಾಯ ಸಾಮಣೇರಿಯಾ ಗಿಹಿನಿಯಾತಿ ಏತ್ತಕಮೇವ ನಾನಂ. ಸೇಸಂ ಸತ್ತಮಸದಿಸಮೇವಾತಿ.

ಸಿಕ್ಖಮಾನಉಮ್ಮದ್ದಾಪನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೧. ಅನಾಪುಚ್ಛಾಸಿಕ್ಖಾಪದವಣ್ಣನಾ

ಏಕಾದಸಮೇ ಭಿಕ್ಖುಸ್ಸ ಪುರತೋತಿ ನ ಅಭಿಮುಖಮೇವಾತಿ ಅತ್ಥೋ, ಇದಂ ಪನ ಉಪಚಾರಂ ಸನ್ಧಾಯ ಕಥಿತನ್ತಿ ವೇದಿತಬ್ಬಂ. ತಸ್ಮಾ ಭಿಕ್ಖುಸ್ಸ ಉಪಚಾರೇ ಅನ್ತಮಸೋ ಛಮಾಯಪಿ ‘‘ನಿಸೀದಾಮಿ, ಅಯ್ಯಾ’’ತಿ ಅನಾಪುಚ್ಛಿತ್ವಾ ನಿಸೀದನ್ತಿಯಾ ಪಾಚಿತ್ತಿಯಂ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಅನಾಪುಚ್ಛಾ ನಿಸೀದನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಆಪುಚ್ಛಿತೇ ದ್ವಿಕದುಕ್ಕಟಂ. ತಸ್ಮಿಂ ಆಪುಚ್ಛಿತಸಞ್ಞಾಯ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಭಿಕ್ಖುಸ್ಸ ಅನಾಪುಚ್ಛಾ, ಉಪಚಾರೇ ನಿಸಜ್ಜಾ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಕಥಿನಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ.

ಅನಾಪುಚ್ಛಾಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೨. ಪಞ್ಹಾಪುಚ್ಛನಸಿಕ್ಖಾಪದವಣ್ಣನಾ

ದ್ವಾದಸಮೇ ಅನೋಕಾಸಕತನ್ತಿ ‘‘ಅಸುಕಸ್ಮಿಂ ನಾಮ ಠಾನೇ ಪುಚ್ಛಾಮೀ’’ತಿ ಏವಂ ಅಕತಓಕಾಸಂ, ತಸ್ಮಾ ಸುತ್ತನ್ತೇ ಓಕಾಸಂ ಕಾರಾಪೇತ್ವಾ ವಿನಯಂ ವಾ ಅಭಿಧಮ್ಮಂ ವಾ ಪುಚ್ಛನ್ತಿಯಾ ಪಾಚಿತ್ತಿಯಂ. ಸೇಸೇಸುಪಿ ಏಸೇವ ನಯೋ, ಸಬ್ಬಸೋ ಅಕಾರಿತೇ ಪನ ವತ್ತಬ್ಬಮೇವ ನತ್ಥಿ.

ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನವತ್ಥುಸ್ಮಿಂ ಪಞ್ಞತ್ತಂ. ತತ್ಥ ತತ್ಥ ಓಕಾಸಂ ಕಾರಾಪೇತ್ವಾ ಪುಚ್ಛನ್ತಿಯಾ, ಅನೋದಿಸ್ಸ ಓಕಾಸಂ ಕಾರಾಪೇತ್ವಾ ಯತ್ಥ ಕತ್ಥಚಿ ಪುಚ್ಛನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಭಿಕ್ಖುಸ್ಸ ಅನೋಕಾಸಕಾರಾಪನಂ, ಪಞ್ಹಂ ಪುಚ್ಛನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ. ಸಮುಟ್ಠಾನಾದೀನಿ ಪದಸೋಧಮ್ಮಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ.

ಪಞ್ಹಾಪುಚ್ಛನಸಿಕ್ಖಾಪದವಣ್ಣನಾ ನಿಟ್ಠಿತಾ.

೧೩. ಅಸಂಕಚ್ಚಿಕಸಿಕ್ಖಾಪದವಣ್ಣನಾ

ತೇರಸಮೇ ಅಸಂಕಚ್ಚಿಕಾತಿ ಅಧಕ್ಖಕಉಬ್ಭನಾಭಿಮಣ್ಡಲಸಙ್ಖಾತಸ್ಸ ಸರೀರಸ್ಸ ಪಟಿಚ್ಛಾದನತ್ಥಂ ಅನುಞ್ಞಾತಸಂಕಚ್ಚಿಕವಿರಹಿತಾ. ಗಾಮಂ ಪವಿಸೇಯ್ಯಾತಿ ಏತ್ಥ ಪರಿಕ್ಖಿತ್ತಸ್ಸ ಗಾಮಸ್ಸ ಪರಿಕ್ಖೇಪಂ, ಅಪರಿಕ್ಖಿತ್ತಸ್ಸ ಉಪಚಾರಂ ಅತಿಕ್ಕಮನ್ತಿಯಾ ವಾ ಓಕ್ಕಮನ್ತಿಯಾ ವಾ ಪಠಮಪಾದೇ ದುಕ್ಕಟಂ, ದುತಿಯೇ ಪಾಚಿತ್ತಿಯಂ.

ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಅಸಂಕಚ್ಚಿಕಾಯ ಗಾಮಂ ಪವಿಸನವತ್ಥುಸ್ಮಿಂ ಪಞ್ಞತ್ತಂ. ಯಸ್ಸಾ ಪನ ಸಂಕಚ್ಚಿಕಚೀವರಂ ಅಚ್ಛಿನ್ನಂ ವಾ ನಟ್ಠಂ ವಾ, ತಸ್ಸಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಅಸಂಕಚ್ಚಿಕತಾ, ವುತ್ತಪರಿಚ್ಛೇದಾತಿಕ್ಕಮೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ. ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ.

ಅಸಂಕಚ್ಚಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

ಛತ್ತುಪಾಹನವಗ್ಗೋ ನವಮೋ.

೧೦…ಪೇ…೧೬. ಮುಸಾವಾದಾದಿವಗ್ಗೋ

ಮುಸಾವಾದಾದಿಸಿಕ್ಖಾಪದವಣ್ಣನಾ

ಇತೋ ಪರೇಸು ಮುಸಾವಾದವಗ್ಗಾದೀಸು ಸತ್ತಸು ವಗ್ಗೇಸು ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ವಿನಿಚ್ಛಯೋ ವೇದಿತಬ್ಬೋತಿ.

ಸೋಳಸಮವಗ್ಗೋ.

ಉದ್ದಿಟ್ಠಾ ಖೋ ಅಯ್ಯಾಯೋ ಛಸಟ್ಠಿಸತಾ ಪಾಚಿತ್ತಿಯಾ ಧಮ್ಮಾತಿ ಭಿಕ್ಖೂ ಆರಬ್ಭ ಪಞ್ಞತ್ತಾ ಸಾಧಾರಣಾ ಸತ್ತತಿ, ಅಸಾಧಾರಣಾ ಛನ್ನವುತೀತಿ ಏವಂ ಛಸಟ್ಠಿಸತಾ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ

ಭಿಕ್ಖುನಿಪಾತಿಮೋಕ್ಖೇ

ಸುದ್ಧಪಾಚಿತ್ತಿಯವಣ್ಣನಾ ನಿಟ್ಠಿತಾ.

ತತ್ರಾಯಂ ಸಙ್ಖೇಪತೋ ಅಸಾಧಾರಣಸಿಕ್ಖಾಪದೇಸು ಸಮುಟ್ಠಾನವಿನಿಚ್ಛಯೋ – ಗಿರಗ್ಗಸಮಜ್ಜಾ ಚಿತ್ತಾಗಾರಸಿಕ್ಖಾಪದಂ ಸಙ್ಘಾಣೀ ಇತ್ಥಾಲಙ್ಕಾರೋ ಗನ್ಧವಣ್ಣಕೋ ವಾಸಿತಕಪಿಞ್ಞಾಕೋ ಭಿಕ್ಖುನಿಆದೀಹಿ ಉಮ್ಮದ್ದನಪರಿಮದ್ದನಾತಿ ಇಮಾನಿ ದಸ ಸಿಕ್ಖಾಪದಾನಿ ಅಚಿತ್ತಕಾನಿ ಲೋಕವಜ್ಜಾನಿ ಅಕುಸಲಚಿತ್ತಾನಿ. ಅಯಂ ಪನೇತ್ಥ ಅಧಿಪ್ಪಾಯೋ, ವಿನಾಪಿ ಚಿತ್ತೇನ ಆಪಜ್ಜಿತಬ್ಬತ್ತಾ ಅಚಿತ್ತಕಾನಿ, ಚಿತ್ತೇ ಪನ ಸತಿ ಅಕುಸಲೇನೇವ ಆಪಜ್ಜಿತಬ್ಬತ್ತಾ ಲೋಕವಜ್ಜಾನಿ ಚೇವ ಅಕುಸಲಚಿತ್ತಾನಿ ಚಾತಿ. ಅವಸೇಸಾನಿ ಸಚಿತ್ತಕಾನಿ ಪಣ್ಣತ್ತಿವಜ್ಜಾನೇವ. ಚೋರಿವುಟ್ಠಾಪನಂ ಗಾಮನ್ತರಂ ಆರಾಮಸಿಕ್ಖಾಪದಂ ಗಬ್ಭಿನಿವಗ್ಗೇ ಆದಿತೋ ಪಟ್ಠಾಯ ಸತ್ತ, ಕುಮಾರಿಭೂತವಗ್ಗೇ ಆದಿತೋ ಪಟ್ಠಾಯ ಪಞ್ಚ ಪುರಿಸಾದಿಸಂಸಟ್ಠಂ ಪಾರಿವಾಸಿಕಛನ್ದದಾನಂ ಅನುವಸ್ಸವುಟ್ಠಾಪನಂ ಏಕನ್ತರಿಕವುಟ್ಠಾಪನನ್ತಿ ಇಮಾನಿ ಏಕೂನವೀಸತಿ ಸಿಕ್ಖಾಪದಾನಿ ಸಚಿತ್ತಕಾನಿ ಪಣ್ಣತ್ತಿವಜ್ಜಾನಿ. ಅವಸೇಸಾನಿ ಸಚಿತ್ತಕಾನಿ ಲೋಕವಜ್ಜಾನೇವಾತಿ.