ಪಾಟಿದೇಸನೀಯಕಣ್ಡೋ

೧. ಸಪ್ಪಿವಿಞ್ಞಾಪನಸಿಕ್ಖಾಪದವಣ್ಣನಾ

ಪಾಟಿದೇಸನೀಯೇಸು ಪಠಮೇ ಸಪ್ಪಿನ್ತಿ ಪುಬ್ಬೇ ವುತ್ತವಿನಿಚ್ಛಯಂ ಪಾಳಿಆಗತಂ (ಪಾಚಿ. ೧೨೩೦) ಗೋಸಪ್ಪಿಆದಿಮೇವ. ವಿಞ್ಞಾಪೇತ್ವಾ ಭುಞ್ಜೇಯ್ಯಾತಿ ಏತ್ಥ ‘‘ವಿಞ್ಞತ್ತಿಯಾ ಪಟಿಲದ್ಧಂ ಭುಞ್ಜಿಸ್ಸಾಮೀ’’ತಿ ಗಹಣೇ ದುಕ್ಕಟಂ, ಗಹಿತಸ್ಸ ಅಜ್ಝೋಹಾರೇ ಅಜ್ಝೋಹಾರೇ ಪಾಟಿದೇಸನೀಯಂ.

ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಸಪ್ಪಿಂ ವಿಞ್ಞಾಪೇತ್ವಾ ಭುಞ್ಜನವತ್ಥುಸ್ಮಿಂ ಪಞ್ಞತ್ತಂ, ‘‘ಅಗಿಲಾನಾ’’ತಿ ಅಯಮೇತ್ಥ ಅನುಪಞ್ಞತ್ತಿ, ತಿಕಪಾಟಿದೇಸನೀಯಂ, ಗಿಲಾನಾಯ ದ್ವಿಕದುಕ್ಕಟಂ. ಯಾ ಪನ ಗಿಲಾನಾ ಗಿಲಾನಸಞ್ಞಾ, ಗಿಲಾನಕಾಲೇ ವಾ ವಿಞ್ಞಾಪೇತ್ವಾ ಪಚ್ಛಾ ಅಗಿಲಾನಾ ಹುತ್ವಾ ಭುಞ್ಜತಿ, ಗಿಲಾನಾಯ ವಾ ಸೇಸಕಂ, ಞಾತಕಪ್ಪವಾರಿತಟ್ಠಾನತೋ ವಾ ವಿಞ್ಞತ್ತಂ, ಅಞ್ಞಸ್ಸ ವಾ ಅತ್ಥಾಯ, ಅತ್ತನೋ ವಾ ಧನೇನ ಗಹಿತಂ ಭುಞ್ಜತಿ, ತಸ್ಸಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ವುತ್ತಲಕ್ಖಣಸಪ್ಪಿತಾ, ಅನುಞ್ಞಾತಕಾರಣಾಭಾವೋ, ವಿಞ್ಞತ್ತಿ, ಅಜ್ಝೋಹಾರೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಅದ್ಧಾನಸದಿಸಾನೀತಿ.

ಸಪ್ಪಿವಿಞ್ಞಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ.

೨. ತೇಲವಿಞ್ಞಾಪನಾದಿಸಿಕ್ಖಾಪದವಣ್ಣನಾ

ದುತಿಯಾದೀಸುಪಿ ತೇಲಾದೀನಿ ಪುಬ್ಬೇ ವುತ್ತವಿನಿಚ್ಛಯಾನಿ ಪಾಳಿಯಂ (ಪಾಚಿ. ೧೨೩೬) ಆಗತಾನೇವ, ಪಾಳಿಯಂ ಅನಾಗತೇಸು ಪನ ಅಟ್ಠಸುಪಿ ದುಕ್ಕಟಮೇವ. ಸೇಸಂ ಸಬ್ಬತ್ಥ ಪಠಮೇ ವುತ್ತಸದಿಸಮೇವಾತಿ.

ತೇಲವಿಞ್ಞಾಪನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ.

ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ

ಭಿಕ್ಖುನಿಪಾತಿಮೋಕ್ಖೇ

ಪಾಟಿದೇಸನೀಯವಣ್ಣನಾ ನಿಟ್ಠಿತಾ.

೧. ಪರಿಮಣ್ಡಲಾದಿಸಿಕ್ಖಾಪದವಣ್ಣನಾ

ಇತೋ ಪರಂ ಪನ ಸೇಖಿಯಾನಿ ಚೇವ ಅಧಿಕರಣಸಮಥಾ ಚ ಸಬ್ಬಪಕಾರತೋ ಭಿಕ್ಖುಪಾತಿಮೋಕ್ಖವಣ್ಣನಾಯಂ ವುತ್ತನಯೇನೇವ ವೇದಿತಬ್ಬಾತಿ.

ಕಙ್ಖಾವಿತರಣಿಯಾ ಪಾತಿಮೋಕ್ಖವಣ್ಣನಾಯ

ಭಿಕ್ಖುನಿಪಾತಿಮೋಕ್ಖವಣ್ಣನಾ ನಿಟ್ಠಿತಾ.

ನಿಗಮನಕಥಾ

ಏತ್ತಾವತಾ ಚ –

ವಣ್ಣನಂ ಪಾತಿಮೋಕ್ಖಸ್ಸ, ಸೋಣತ್ಥೇರೇನ ಯಾಚಿತೋ;

ವಿನಯೇ ಜಾತಕಙ್ಖಾನಂ, ಕಙ್ಖಾವಿತರಣತ್ಥಿಕೋ.

ಆರಭಿಂ ಯಮಹಂ ಸಬ್ಬಂ, ಸೀಹಳಟ್ಠಕಥಾನಯಂ;

ಮಹಾವಿಹಾರವಾಸೀನಂ, ವಾಚನಾಮಗ್ಗನಿಸ್ಸಿತಂ.

ನಿಸ್ಸಾಯ ಸಾ ಅಯಂ ನಿಟ್ಠಂ, ಗತಾ ಆದಾಯ ಸಬ್ಬಸೋ;

ಸಬ್ಬಂ ಅಟ್ಠಕಥಾಸಾರಂ, ಪಾಳಿಯತ್ಥಞ್ಚ ಕೇವಲಂ.

ನ ಹೇತ್ಥ ತಂ ಪದಂ ಅತ್ಥಿ, ಯಂ ವಿರುಜ್ಝೇಯ್ಯ ಪಾಳಿಯಾ;

ಮಹಾವಿಹಾರವಾಸೀನಂ, ಪೋರಾಣಟ್ಠಕಥಾಹಿ ವಾ.

ಯಸ್ಮಾ ತಸ್ಮಾ ಅಕತ್ವಾವ, ಏತ್ಥ ಕಙ್ಖಂ ಹಿತೇಸಿನಾ;

ಸಿಕ್ಖಿತಬ್ಬಾವ ಸಕ್ಕಚ್ಚಂ, ಕಙ್ಖಾವಿತರಣೀ ಅಯಂ.

ಯಥಾ ಚ ನಿಟ್ಠಂ ಸಮ್ಪತ್ತಾ, ಕಙ್ಖಾವಿತರಣೀ ಅಯಂ;

ದ್ವಾವೀಸತಿ ಭಾಣವಾರಪಅಮಾಣಾಯ ಪಾಳಿಯಾ.

ಏವಂ ಅನನ್ತರಾಯೇನ, ನಿಟ್ಠಂ ಕಲ್ಯಾಣನಿಸ್ಸಿತಾ;

ಅಚಿರಂ ಸಬ್ಬಸತ್ತಾನಂ, ಯನ್ತು ಸಬ್ಬೇ ಮನೋರಥಾತಿ.

ಪರಮವಿಸುದ್ಧಸದ್ಧಾಬುದ್ಧಿವೀರಿಯಪ್ಪಟಿಮಣ್ಡಿತೇನ ಸೀಲಾಚಾರಜ್ಜವಮದ್ದವಾದಿಗುಣಸಮುದಯಸಮುದಿತೇನ ಸಕಸಮಯಸಮಯನ್ತರಗಹನಜ್ಝೋಗಾಹಣಸಮತ್ಥೇನ ಪಞ್ಞಾವೇಯ್ಯತ್ತಿಯಸಮನ್ನಾಗತೇನ ತಿಪಿಟಕಪರಿಯತ್ತಿಪ್ಪಭೇದೇ ಸಾಟ್ಠಕಥೇ ಸತ್ಥುಸಾಸನೇ ಅಪ್ಪಟಿಹತಞಾಣಪ್ಪಭಾವೇನ ಮಹಾವೇಯ್ಯಾಕರಣೇನ ಕರಣಸಮ್ಪತ್ತಿಜನಿತಸುವಿನಿಗ್ಗತಮಧಉರೋದಾರವಚನಲಾವಣ್ಣಯುತ್ತೇನ ಯುತ್ತಮುತ್ತವಾದಿನಾ ವಾದೀವರೇನ ಮಹಾಕವಿನಾ ಪಭಿನ್ನಪಟಿಸಮ್ಭಿದಾಪರಿವಾರೇ ಛಳಭಿಞ್ಞಾದಿಪ್ಪಭೇದಗುಣಪ್ಪಟಿಮಣ್ಡಿತೇ ಉತ್ತರಿಮನುಸ್ಸಧಮ್ಮೇ ಸುಪ್ಪತಿಟ್ಠಿತಬುದ್ಧೀನಂ ಥೇರವಂಸಪ್ಪದೀಪಾನಂ ಥೇರಾನಂ ಮಹಾವಿಹಾರವಾಸೀನಂ ವಂಸಾಲಙ್ಕಾರಭೂತೇನ ವಿಪುಲವಿಸುದ್ಧಬುದ್ಧಿನಾ ಬುದ್ಧಘೋಸೋತಿ ಗರೂಹಿ ಗಹಿತನಾಮಧೇಯ್ಯೇನ ಥೇರೇನ ಕತಾ ಅಯಂ ಕಙ್ಖಾವಿತರಣೀ ನಾಮ ಪಾತಿಮೋಕ್ಖವಣ್ಣನಾ –

ತಾವ ತಿಟ್ಠತು ಲೋಕಸ್ಮಿಂ, ಲೋಕನಿತ್ಥರಣೇಸಿನಂ;

ದಸ್ಸೇನ್ತೀ ಕುಲಪುತ್ತಾನಂ, ನಯಂ ಸೀಲವಿಸುದ್ಧಿಯಾ.

ಯಾವ ‘‘ಬುದ್ಧೋ’’ತಿ ನಾಮಮ್ಪಿ, ಸುದ್ಧಚಿತ್ತಸ್ಸ ತಾದಿನೋ;

ಲೋಕಮ್ಹಿ ಲೋಕಜೇಟ್ಠಸ್ಸ, ಪವತ್ತತಿ ಮಹೇಸಿನೋತಿ.

ಕಙ್ಖಾವಿತರಣೀ-ಅಟ್ಠಕಥಾ ನಿಟ್ಠಿತಾ.