೭-೮. ಸಿಕ್ಖಮಾನನವುಟ್ಠಾಪನಪಠಮದುತಿಯಸಿಕ್ಖಾಪದವಣ್ಣನಾ

ಸತ್ತಮೇ ಸಾ ಪಚ್ಛಾತಿ ಸಿಕ್ಖಮಾನಾಯ ಉಪಸಮ್ಪದಾಯ ಯಾಚಿಯಮಾನಾಯ ಸಾ ಭಿಕ್ಖುನೀ ಏವಂ ವತ್ವಾ ಲದ್ಧೇ ಚೀವರೇ ಪಚ್ಛಾ ಅಸತಿ ಅನ್ತರಾಯೇ ‘‘ನೇವ ವುಟ್ಠಾಪೇಸ್ಸಾಮಿ, ನ ವುಟ್ಠಾಪನಾಯ ಉಸ್ಸುಕ್ಕಂ ಕರಿಸ್ಸಾಮೀ’’ತಿ ಧುರಂ ನಿಕ್ಖಿಪೇಯ್ಯ, ತಸ್ಸಾ ಸಹ ಧುರನಿಕ್ಖೇಪೇನ ಪಾಚಿತ್ತಿಯನ್ತಿ. ಅಟ್ಠಮೇಪಿ ಏಸೇವ ನಯೋ.

ಉಭಯಮ್ಪಿ ಸಾವತ್ಥಿಯಂ ಥುಲ್ಲನನ್ದಂ ಆರಬ್ಭ ಏತೇಸು ವತ್ಥೂಸು ಪಞ್ಞತ್ತಂ, ದ್ವೀಸುಪಿ ಸತಿ ಅನ್ತರಾಯೇ, ಪರಿಯೇಸಿತ್ವಾ ಅಲಭನ್ತಿಯಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ. ಉಭಯತ್ಥ ‘‘ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ ಪಟಿಞ್ಞಾ, ಆಕಙ್ಖಿತನಿಪ್ಫತ್ತಿ, ಪಚ್ಛಾ ಧುರನಿಕ್ಖೇಪೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ಚತ್ತಾರಿ ಅಙ್ಗಾನಿ. ಸಮುಟ್ಠಾನಾದೀನಿ ಸಮನುಭಾಸನಸದಿಸಾನೀತಿ.

ಸಿಕ್ಖಮಾನನವುಟ್ಠಾಪನಪಠಮದುತಿಯಸಿಕ್ಖಾಪದವಣ್ಣನಾ ನಿಟ್ಠಿತಾ.