೨. ಪಚ್ಚಯಪಚ್ಚನೀಯವಣ್ಣನಾ

೪೨-೪೪. ತೇವೀಸತಿಮೂಲಕನ್ತಿ ಇದಞ್ಚೇತ್ಥ ದುಮೂಲಕಂಯೇವ ಸನ್ಧಾಯ ವುತ್ತನ್ತಿ ಇದಂ ದುಕಮೂಲಕೇ ಪುಚ್ಛಾನಂ ಮೂಲಭೂತಾ ತೇವೀಸತಿ ದುಕಾ ಸಮ್ಭವನ್ತೀತಿ ತಸ್ಸ ‘‘ತೇವೀಸತಿಮೂಲಕ’’ನ್ತಿ ನಾಮಂ ಕತ್ವಾ ಯಾವ ಯತ್ತಕೋ ಪಭೇದೋ ಅತ್ಥಿ, ತಾವ ತತ್ತಕಂ ತೇವೀಸತಿಮೂಲಕಂ ಯಥಾನುಲೋಮೇ ವಿತ್ಥಾರಿತಂ. ಏವಂ ಪಚ್ಚನೀಯೇಪಿ ವಿತ್ಥಾರೇತಬ್ಬನ್ತಿ ದುಕಮೂಲಕೇನ ತಿಕಮೂಲಕಾದೀಸು ನಯಂ ದಸ್ಸೇತೀತಿ ಇಮಿನಾ ಅಧಿಪ್ಪಾಯೇನ ವುತ್ತಂ ಸಿಯಾ. ಯದಿ ಪನ ಯಾವ ತೇವೀಸತಿಮಂ ಮೂಲಂ ಯಥಾ ವಿತ್ಥಾರಿತನ್ತಿ ಅಯಮತ್ಥೋ ಅಧಿಪ್ಪೇತೋ, ‘‘ಯಾವ ತೇವೀಸತಿಮಂ ಮೂಲ’’ನ್ತ್ವೇವ ಪಾಠೇನ ಭವಿತಬ್ಬಂ ಸಿಯಾ. ನ ಹಿ ‘‘ತೇವೀಸತಿಮೂಲಕ’’ನ್ತಿ ಏತಸ್ಸ ಬ್ಯಞ್ಜನಸ್ಸ ತೇವೀಸತಿಮಂ ಮೂಲಕನ್ತಿ ಅಯಮತ್ಥೋ ಸಮ್ಭವತಿ. ಯಥಾ ಅನುಲೋಮೇ ‘‘ಏಕೇಕಪದಸ್ಸಾ’’ತಿಆದಿನಾ ಪನ ಏಕಮೂಲಾದಿಸಬ್ಬಮೂಲಕಪರಿಯೋಸಾನಂ ತತ್ಥ ನಯದಸ್ಸನವಸೇನ ದಸ್ಸಿತಂ ಏಕೇಕಸ್ಸ ಪದಸ್ಸ ವಿತ್ಥಾರಂ ದಸ್ಸೇತೀತಿ ಸಬ್ಬಮೂಲಕಮೇವ ಚೇತ್ಥ ‘‘ತೇವೀಸತಿಮೂಲಕ’’ನ್ತಿ ವುತ್ತನ್ತಿ ವೇದಿತಬ್ಬಂ. ತಞ್ಹಿ ತೇವೀಸತಿಯಾ ಪಚ್ಚಯಾನಂ ಅವಸೇಸಸ್ಸ ಪಚ್ಚಯಸ್ಸ ಮೂಲಭಾವತೋ ‘‘ತೇವೀಸತಿಮೂಲಕ’’ನ್ತಿ ಚ ತತೋ ಪರಂ ಮೂಲಸ್ಸ ಅಞ್ಞಸ್ಸ ಅಭಾವತೋ ‘‘ಸಬ್ಬಮೂಲಕ’’ನ್ತಿ ಚ ವುಚ್ಚತಿ.

ಪಚ್ಚಯಪಚ್ಚನೀಯವಣ್ಣನಾ ನಿಟ್ಠಿತಾ.