೨. ಅನ್ತರಾಭವಕಥಾವಣ್ಣನಾ

೫೦೫. ಅತಿದೂರಸ್ಸ ಅನ್ತರಿತಸ್ಸ ಪತ್ತಬ್ಬಸ್ಸ ದೇಸಸ್ಸ ದಸ್ಸನತೋ ದಿಬ್ಬಚಕ್ಖುಕೋ ವಿಯ. ಆಕಾಸೇನ ಪಥವನ್ತರಟ್ಠಾನಾನಿ ಭಿನ್ದಿತ್ವಾ ಗಮನತೋ ಇದ್ಧಿಮಾ ವಿಯ. ನ ಸಹಧಮ್ಮೇನಾತಿ ಯದಿ ಸೋ ಭವಾನಂ ಅನ್ತರಾ ನ ಸಿಯಾ, ನ ನಾಮ ಅನ್ತರಾಭವೋತಿ ಪಟಿಕ್ಖೇಪೇ ಕರಣಂ ನತ್ಥೀತಿ ಅಧಿಪ್ಪಾಯೋ.

೫೦೬. ತತ್ಥ ಜಾತಿಜರಾಮರಣಾನಿ ಚೇವ ಚುತಿಪಟಿಸನ್ಧಿಪರಮ್ಪರಞ್ಚ ಅನಿಚ್ಛನ್ತೋತಿ ಏತೇನ ಚುತಿಅನನ್ತರಂ ಅನ್ತರಾಭವಂ ಖನ್ಧಾತಿ, ವತ್ತಮಾನಾ ಜಾತೀತಿ, ಮಾತುಕುಚ್ಛಿಮೇವ ಪವಿಟ್ಠಾ ಅನ್ತರಧಾಯಮಾನಾ ಮರಣನ್ತಿ ನ ಇಚ್ಛತಿ.

೫೦೭. ಯಥಾ ಕಾಮಭವಾದೀಸು ತತ್ಥ ತತ್ಥೇವ ಪುನಪ್ಪುನಂ ಚವಿತ್ವಾ ಉಪಪತ್ತಿವಸೇನ ಚುತಿಪಟಿಸನ್ಧಿಪರಮ್ಪರಾ ಹೋತಿ, ಏವಂ ತಂ ತತ್ಥ ನ ಇಚ್ಛತೀತಿ ದಸ್ಸೇತಿ.

ಅನ್ತರಾಭವಕಥಾವಣ್ಣನಾ ನಿಟ್ಠಿತಾ.