೭. ದಿಬ್ಬಚಕ್ಖುಕಥಾವಣ್ಣನಾ

೩೭೩. ಉಪತ್ಥದ್ಧನ್ತಿ ಯಥಾ ವಿಸಯಾನುಭಾವಗೋಚರೇಹಿ ವಿಸಿಟ್ಠಂ ಹೋತಿ, ತಥಾ ಪಚ್ಚಯಭೂತೇನ ಕತಬಲಾಧಾನನ್ತಿ ಅತ್ಥೋ. ತಂಮತ್ತಮೇವಾತಿ ಪುರಿಮಂ ಮಂಸಚಕ್ಖುಮತ್ತಮೇವ ಧಮ್ಮುಪತ್ಥದ್ಧಂ ನ ಹೋತೀತಿ ಅತ್ಥೋ. ಅನಾಪಾಥಗತನ್ತಿ ಮಂಸಚಕ್ಖುನಾ ಗಹೇತಬ್ಬಟ್ಠಾನಂ ಆಪಾಥಂ ನಾಗತಂ. ಏತ್ಥ ಚ ವಿಸಯಸ್ಸ ದೀಪಕಂ ಆನುಭಾವಗೋಚರಾನಮೇವ ಅಸದಿಸತಂ ವದನ್ತೋ ಯಾದಿಸೋ ಮಂಸಚಕ್ಖುಸ್ಸ ವಿಸಯೋತಿ ವಿಸಯಗ್ಗಹಣಂ ನ ವಿಸಯವಿಸೇಸದಸ್ಸನತ್ಥಂ, ಅಥ ಖೋ ಯಾದಿಸೇ ವಿಸಯೇ ಆನುಭಾವಗೋಚರವಿಸೇಸಾ ಹೋನ್ತಿ, ತಾದಿಸಸ್ಸ ರೂಪವಿಸಯಸ್ಸ ದಸ್ಸನತ್ಥನ್ತಿ ದೀಪೇತಿ, ಸದಿಸಸ್ಸ ವಾ ವಿಸಯಸ್ಸ ಆನುಭಾವಗೋಚರವಿಸೇಸೋವ ವಿಸೇಸಂ.

ನ ಚ ಮಂಸಚಕ್ಖುಮೇವ ದಿಬ್ಬಚಕ್ಖೂತಿ ಇಚ್ಛತೀತಿ ಧಮ್ಮುಪತ್ಥದ್ಧಕಾಲೇ ಪುರಿಮಂ ಮಂಸಚಕ್ಖುಮೇವಾತಿ ನ ಇಚ್ಛತೀತಿ ಅಧಿಪ್ಪಾಯೋ. ಮಂಸಚಕ್ಖುಸ್ಸ ಉಪ್ಪಾದೋ ಮಗ್ಗೋತಿ ಮಂಸಚಕ್ಖುಪಚ್ಚಯತಾದಸ್ಸನತ್ಥಮೇವ ವುತ್ತಂ, ನ ತೇನ ಅನುಪಾದಿನ್ನತಾಸಾಧನತ್ಥಂ. ರೂಪಾವಚರಿಕಾನನ್ತಿ ರೂಪಾವಚರಜ್ಝಾನಪಚ್ಚಯೇನ ಉಪ್ಪನ್ನಾನಿ ಮಹಾಭೂತಾನಿ ರೂಪಾವಚರಿಕಾನೀತಿ ಸೋ ಇಚ್ಛತೀತಿ ಅಧಿಪ್ಪಾಯೋ. ಏಸ ನಯೋ ‘‘ಅರೂಪಾವಚರಿಕಾನ’’ನ್ತಿ ಏತ್ಥಾಪಿ. ಅರೂಪಾವಚರಕ್ಖಣೇ ರೂಪಾವಚರಚಿತ್ತಸ್ಸ ಅಭಾವಾ ಪಟಿಕ್ಖಿಪತೀತಿ ತಸ್ಮಿಂಯೇವ ಖಣೇ ರೂಪಾವಚರಂ ಹುತ್ವಾ ಅರೂಪಾವಚರಂ ನ ಜಾತನ್ತಿ ಪಟಿಕ್ಖಿಪತೀತಿ ಅಧಿಪ್ಪಾಯೋ.

೩೭೪. ಕಿಞ್ಚಾಪಿ ದಿಬ್ಬಚಕ್ಖುನೋ ಧಮ್ಮುಪತ್ಥದ್ಧಸ್ಸ ಪಞ್ಞಾಚಕ್ಖುಭಾವಂ ನ ಇಚ್ಛತಿ, ಯೇನ ತೀಣಿ ಚಕ್ಖೂನಿ ಧಮ್ಮುಪತ್ಥಮ್ಭೇನ ಚಕ್ಖುನ್ತರಭಾವಂ ವದತೋ ಭವೇಯ್ಯುನ್ತಿ ಅಧಿಪ್ಪಾಯೋ.

ದಿಬ್ಬಚಕ್ಖುಕಥಾವಣ್ಣನಾ ನಿಟ್ಠಿತಾ.