೯. ಯಥಾಕಮ್ಮೂಪಗತಞಾಣಕಥಾವಣ್ಣನಾ

೩೭೭. ದಿಬ್ಬೇನ ಚಕ್ಖುನಾ ಯಥಾಕಮ್ಮೂಪಗೇ ಸತ್ತೇ ಪಜಾನಾತೀತಿ ಯಥಾಕಮ್ಮೂಪಗತಞಾಣಸ್ಸ ಉಪನಿಸ್ಸಯೇ ದಿಬ್ಬಚಕ್ಖುಮ್ಹಿ ಕರಣನಿದ್ದೇಸೋ ಕತೋ, ನ ಯಥಾಕಮ್ಮೂಪಗತಜಾನನಕಿಚ್ಚಕೇ. ತಂಕಿಚ್ಚಕೇಯೇವ ಪನ ಪರೋ ಕರಣನಿದ್ದೇಸಂ ಮಞ್ಞತೀತಿ ಆಹ ‘‘ಅಯೋನಿಸೋ ಗಹೇತ್ವಾ’’ತಿ. ಯಥಾಕಮ್ಮೂಪಗತಞಾಣಮೇವ ದಿಬ್ಬಚಕ್ಖುನ್ತಿ ಲದ್ಧೀತಿ ಇಮಿನಾ ವಚನೇನ ದಿಬ್ಬಚಕ್ಖುಮೇವ ಯಥಾಕಮ್ಮೂಪಗತಞಾಣನ್ತಿ ಏವಂ ಭವಿತಬ್ಬಂ. ಏವ-ಸದ್ದೋ ಚ ಅಟ್ಠಾನೇ ಠಿತೋ ದಿಬ್ಬಚಕ್ಖುಸದ್ದಸ್ಸ ಪರತೋ ಯೋಜೇತಬ್ಬೋ. ಯಥಾಕಮ್ಮೂಪಗತಞಾಣಸ್ಸ ಹಿ ಸೋ ದಿಬ್ಬಚಕ್ಖುತೋ ಅತ್ಥನ್ತರಭಾವಂ ನಿವಾರೇತಿ. ನ ಹಿ ದಿಬ್ಬಚಕ್ಖುಸ್ಸ ಯಥಾಕಮ್ಮೂಪಗತಞಾಣತೋತಿ.

ಯಥಾಕಮ್ಮೂಪಗತಞಾಣಕಥಾವಣ್ಣನಾ ನಿಟ್ಠಿತಾ.