೯. ವಚನಸೋಧನವಣ್ಣನಾ

೫೫-೫೯. ಪುಗ್ಗಲೋ ಉಪಲಬ್ಭತೀತಿ ಪದದ್ವಯಸ್ಸ ಅತ್ಥತೋ ಏಕತ್ತೇತಿ ಏತ್ಥ ತದೇವ ಏಕತ್ತಂ ಪರೇನ ಸಮ್ಪಟಿಚ್ಛಿತಂ ಅಸಮ್ಪಟಿಚ್ಛಿತನ್ತಿ ವಿಚಾರೇತಬ್ಬಮೇತಂ. ಪುಗ್ಗಲಸ್ಸ ಹಿ ಅವಿಭಜಿತಬ್ಬತಂ, ಉಪಲಬ್ಭತೀತಿ ಏತಸ್ಸ ವಿಭಜಿತಬ್ಬತಂ ವದನ್ತೋ ವಿಭಜಿತಬ್ಬಾವಿಭಜಿತಬ್ಬತ್ಥಾನಂ ಉಪಲಬ್ಭತಿಪುಗ್ಗಲ-ಸದ್ದಾನಂ ಕಥಂ ಅತ್ಥತೋ ಏಕತ್ತಂ ಸಮ್ಪಟಿಚ್ಛೇಯ್ಯಾತಿ? ಯಥಾ ಚ ವಿಭಜಿತಬ್ಬಾವಿಭಜಿತಬ್ಬತ್ಥಾನಂ ಉಪಲಬ್ಭತಿ-ರೂಪ-ಸದ್ದಾನಂ ತಂ ವಿಭಾಗಂ ವದತೋ ರೂಪಂ ಕಿಞ್ಚಿ ಉಪಲಬ್ಭತಿ, ಕಿಞ್ಚಿ ನ ಉಪಲಬ್ಭತೀತಿ ಅಯಂ ಪಸಙ್ಗೋ ನಾಪಜ್ಜತಿ, ಏವಂ ಏತಸ್ಸಪಿ ಯಥಾವುತ್ತವಿಭಾಗಂ ವದತೋ ಯಥಾಆಪಾದಿತೇನ ಪಸಙ್ಗೇನ ನ ಭವಿತಬ್ಬನ್ತಿ ಮಗ್ಗಿತಬ್ಬೋ ಏತ್ಥ ಅಧಿಪ್ಪಾಯೋ.

೬೦. ‘‘ಸುಞ್ಞತೋ ಲೋಕಂ ಅವೇಕ್ಖಸ್ಸೂ’’ತಿ (ಸು. ನಿ. ೧೧೨೫) ಏತೇನ ಅತ್ಥತೋ ಪುಗ್ಗಲೋ ನತ್ಥೀತಿ ವುತ್ತಂ ಹೋತೀತಿ ಆಹ ‘‘ನತ್ಥೀತಿಪಿ ವುತ್ತ’’ನ್ತಿ.

ವಚನಸೋಧನವಣ್ಣನಾ ನಿಟ್ಠಿತಾ.