೧೦. ಪಞ್ಞತ್ತಾನುಯೋಗವಣ್ಣನಾ

೬೧-೬೬. ರೂಪಕಾಯಾವಿರಹಂ ಸನ್ಧಾಯ ‘‘ರೂಪಕಾಯಸಬ್ಭಾವತೋ’’ತಿ ಆಹ. ‘‘ರೂಪಿನೋ ವಾ ಅರೂಪಿನೋ ವಾ’’ತಿ (ಇತಿವು. ೯೦) ಸುತ್ತೇ ಆಗತಪಞ್ಞತ್ತಿಂ ಸನ್ಧಾಯ ‘‘ತಥಾರೂಪಾಯ ಚ ಪಞ್ಞತ್ತಿಯಾ ಅತ್ಥಿತಾಯಾ’’ತಿ. ವೀತರಾಗಸಬ್ಭಾವತೋತಿ ಕಾಮೀಭಾವಸ್ಸ ಅನೇಕನ್ತಿಕತ್ತಾ ಕಾಮಧಾತುಯಾ ಆಯತ್ತತ್ತಾಭಾವತೋ ಚ ‘‘ಕಾಮೀ’’ತಿ ನ ವತ್ತಬ್ಬೋತಿ ಪಟಿಕ್ಖಿಪತೀತಿ ಅಧಿಪ್ಪಾಯೋ.

೬೭. ಕಾಯಾನುಪಸ್ಸನಾಯಾತಿ ಕಾರಣವಚನಮೇತಂ, ಕಾಯಾನುಪಸ್ಸನಾಯ ಕಾರಣಭೂತಾಯ ಏವಂಲದ್ಧಿಕತ್ತಾತಿ ಅತ್ಥೋ. ಆಹಚ್ಚ ಭಾಸಿತನ್ತಿ ‘‘ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ ಅಬ್ಯಾಕತಮೇತಂ ಮಯಾ’’ತಿ (ಮ. ನಿ. ೨.೧೨೮) ಆಹಚ್ಚ ಭಾಸಿತಂ.

ಪಞ್ಞತ್ತಾನುಯೋಗವಣ್ಣನಾ ನಿಟ್ಠಿತಾ.