೧೨. ಬಾಹಿರಾನತ್ತಹೇತುಸುತ್ತಂ

೧೪೫. ‘‘ರೂಪಾ, ಭಿಕ್ಖವೇ, ಅನತ್ತಾ. ಯೋಪಿ ಹೇತು, ಯೋಪಿ ಪಚ್ಚಯೋ ರೂಪಾನಂ ಉಪ್ಪಾದಾಯ, ಸೋಪಿ ಅನತ್ತಾ. ಅನತ್ತಸಮ್ಭೂತಾ, ಭಿಕ್ಖವೇ, ರೂಪಾ ಕುತೋ ಅತ್ತಾ ಭವಿಸ್ಸನ್ತಿ! ಸದ್ದಾ… ಗನ್ಧಾ… ರಸಾ… ಫೋಟ್ಠಬ್ಬಾ… ಧಮ್ಮಾ ಅನತ್ತಾ. ಯೋಪಿ ಹೇತು, ಯೋಪಿ ಪಚ್ಚಯೋ ಧಮ್ಮಾನಂ ಉಪ್ಪಾದಾಯ, ಸೋಪಿ ಅನತ್ತಾ. ಅನತ್ತಸಮ್ಭೂತಾ, ಭಿಕ್ಖವೇ, ಧಮ್ಮಾ ಕುತೋ ಅತ್ತಾ ಭವಿಸ್ಸನ್ತಿ! ಏವಂ ಪಸ್ಸಂ, ಭಿಕ್ಖವೇ, ಸುತವಾ ಅರಿಯಸಾವಕೋ ರೂಪೇಸುಪಿ ನಿಬ್ಬಿನ್ದತಿ, ಸದ್ದೇಸುಪಿ… ಗನ್ಧೇಸುಪಿ… ರಸೇಸುಪಿ… ಫೋಟ್ಠಬ್ಬೇಸುಪಿ… ಧಮ್ಮೇಸುಪಿ ನಿಬ್ಬಿನ್ದತಿ. ನಿಬ್ಬಿನ್ದಂ ವಿರಜ್ಜತಿ; ವಿರಾಗಾ ವಿಮುಚ್ಚತಿ; ವಿಮುತ್ತಸ್ಮಿಂ ವಿಮುತ್ತಮಿತಿ ಞಾಣಂ ಹೋತಿ. ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾ’ತಿ ಪಜಾನಾತೀ’’ತಿ. ದ್ವಾದಸಮಂ.

ದೇವದಹವಗ್ಗೋ ಚುದ್ದಸಮೋ.

ತಸ್ಸುದ್ದಾನಂ –

ದೇವದಹೋ ಖಣೋ ರೂಪಾ, ದ್ವೇ ನತುಮ್ಹಾಕಮೇವ ಚ;

ಹೇತುನಾಪಿ ತಯೋ ವುತ್ತಾ, ದುವೇ ಅಜ್ಝತ್ತಬಾಹಿರಾತಿ.