೧. ಕುಮ್ಭಙ್ಗಪಞ್ಹೋ

೧. ‘‘ಭನ್ತೇ ನಾಗಸೇನ, ‘ಕುಮ್ಭಸ್ಸ ಏಕಂ ಅಙ್ಗಂ ಗಹೇತಬ್ಬ’ನ್ತಿ ಯಂ ವದೇಸಿ, ಕತಮಂ ತಂ ಏಕಂ ಅಙ್ಗಂ ಗಹೇತಬ್ಬ’’ನ್ತಿ? ‘‘ಯಥಾ, ಮಹಾರಾಜ, ಕುಮ್ಭೋ ಸಮ್ಪುಣ್ಣೋ ನ ಸಣತಿ, ಏವಮೇವ ಖೋ, ಮಹಾರಾಜ, ಯೋಗಿನಾ ಯೋಗಾವಚರೇನ ಆಗಮೇ ಅಧಿಗಮೇ ಪರಿಯತ್ತಿಯಂ ಸಾಮಞ್ಞೇ ಪಾರಮಿಂ ಪತ್ವಾ ನ ಸಣಿತಬ್ಬಂ, ನ ತೇನ ಮಾನೋ ಕರಣೀಯೋ, ನ ದಬ್ಬೋ [ದಪ್ಪೋ (ಸೀ.)] ದಸ್ಸೇತಬ್ಬೋ, ನಿಹತಮಾನೇನ ನಿಹತದಬ್ಬೇನ ಭವಿತಬ್ಬಂ, ಉಜುಕೇನ ಅಮುಖರೇನ ಅವಿಕತ್ಥಿನಾ. ಇದಂ, ಮಹಾರಾಜ, ಕುಮ್ಭಸ್ಸ ಏಕಂ ಅಙ್ಗಂ ಗಹೇತಬ್ಬಂ. ಭಾಸಿತಮ್ಪೇತಂ, ಮಹಾರಾಜ, ಭಗವತಾ ದೇವಾತಿದೇವೇನ ಸುತ್ತನಿಪಾತೇ –

‘‘‘ಯದೂನಕಂ ತಂ ಸಣತಿ, ಯಂ ಪೂರಂ ಸನ್ತಮೇವ ತಂ;

ಅಡ್ಢಕುಮ್ಭೂಪಮೋ [ರಿತ್ತಕುಮ್ಭೂಪಮೋ (ಸೀ.)] ಬಾಲೋ, ರಹದೋ ಪೂರೋವ ಪಣ್ಡಿತೋ’’’ತಿ.

ಕುಮ್ಭಙ್ಗಪಞ್ಹೋ ಪಠಮೋ.